【作者简介】仁青卓玛，藏族，青海同仁人，中国藏学研究中心研究馆员，主要从事藏族历史与藏文文献研究。
【译者简介】力毛措，藏族，青海省海南州人，中国藏学研究中心藏医药研究所副研究员，主要从事藏医药临床研究。
译者按：当时我看了这篇文章很感动，仁青卓玛姐以自己的亲身经历在讲述这位伟大的老师，里面有些小故事虽然很平凡很普通，但这些平凡和普通里反映出来的是陈庆英老师的为人处事以及众多人对他的尊敬与仰慕。她的这篇文章不是纯粹的在歌颂和赞扬陈老师，而更多的在介绍老师的丰功伟绩及人品。一位非藏族老师在藏文化方面取得的成绩正是藏族人学习的榜样！处于这种心态本人着手翻译仁青卓玛姐的《缅怀陈庆英老师》，在翻译过程中得到了仁青卓玛姐的指导和帮助。紧赶慢赶在陈老师的断七之前出来了，为是纪念这位可敬可佩的老师，同时也是想让更多不识汉字的藏族同胞认识这位老师！——译者中国藏学研究中心藏医药研究所副研究员力毛措于2022年5月27日
སྤྱི་ཟླ5པའི་ཚེས11ཉིན་ནི་རྒན་ཁྲིན་ཆིན་དབྱིན་ལགས་ང་ཚོ་དང་གཏན་དུ་བྲལ་ནས་ཏག་ཏག་ཉིན30ལོན་པའི་ཉིན་མོ་རེད། ད་ལོའི་སྤྱི་ཟླ4པའི་ཚེས11ཉིན་རྒན་ཁྲིན་ལགས་ཁྲེང་ཏུའུ་རུ་སྐུ་གཤེགས་པའི་གཏམ་ངན་དེ་ཐོས་མ་ཐག་ང་རང་སྐྱོ་སྣང་ཚད་མེད་པ་ཞིག་སྐྱེས་བྱུང་། ངས་ཉེ་ལམ་རྒན་ཁྲིན་ལགས་ཀྱི་སྙུན་གཞི་སྐབས་རེར་བདེ་ཞིང་ལན་རེར་སྡུག་ཏུ་འགྲོ་བཞིན་པའང་ཤེས་ཡོད་མོད། གློ་བུར་བའི་གཏམ་ངན་དེ་ཐོས་རྗེས་དུས་ཡུན་རིང་པོར་ཡིད་ཆེས་དཀའ་བར་གྱུར།
ངས་ཚེ་འདས་བོད་རིགས་རྩོམ་པ་པོ་གྲགས་ཅན་དབྱངས་སྒྲོན་ལགས་ཀྱིས་རྒན་ཁྲིན་ཆིན་དབྱིན་ལ་བཅར་འདྲི་ཞུས་པའི་རྩོམ་ཡིག་གི་རྨང་གཞིའི་ཐོག བོད་ཡིག་གི་ལམ་ནས་དམ་པ་གང་གི་བཅར་འདྲིའི་རྩོམ་ཡིག་ཅིག་ཁ་གསབ་ཀྱི་ཚུལ་དུ་འབྲི་རྩིས་སྔ་མོ་ནས་ཡོད་ཅིང་། ན་ནིང་རྒན་ཁྲིན་ལགས་ཀྱི་སྙུན་གཞི་ཇེ་སྡུག་ཏུ་སོང་རྗེས། ད་ལོའི་སྤྱི་ཟླ4པར་ཁྲེང་ཏུའུ་རུ་རྒན་ལགས་ལ་ཁམས་འདྲིར་འགྲོ་ཞོར་བཅར་འདྲིའི་ནང་དོན་འགའ་ཤས་ཀྱང་སྣོན་རྩིས་ཡོད། བསམ་ཚུལ་དེ་ངས་དེ་སྔོན་ཞའོ་ཧྭ་（རྒན་ལགས་ཀྱི་བུ་མོ་ཁྲིན་ལི་ཧྭ）ལགས་ལ་ཡང་བཤད་མྱོང་། ད་ལོའི་བོད་ཀྱི་ལོ་གསར་ནས་བཟུང་། ཉིན་གཉིས་གསུམ་རེའི་ནང་ཞའོ་ཧྭ་ལགས་ལ་རྒན་ལགས་ཀྱི་སྙུན་གཞིའི་གནས་ཚུལ་དྲིས་པ་ལས་ཁོང་ལ་ཐད་ཀར་ཐུགས་སུན་ཞུ་མ་ཕོད། ཉིན་འགའི་སྔོན་ལ་ཞའོ་ཧྭ་ལགས་ཀྱིས་རྒན་ལགས་ཀྱི་སྙུན་གཞིའི་བབ་མི་བརྟན་པར་གྱུར་འདུག་ཟེར་བར། ངས་མོ་རང་ལ་དགེ་རྒན་ལགས་ཀྱི་སྐུ་ཁམས་ཅུང་དྭངས་སྐབས། ངས་ཁ་གསབ་བྱེད་འདོད་པའི་ནང་དོན་ཁག་རྒན་ལགས་ལ་བཀའ་འདྲི་ཞུས་ཏེ་ལག་ཁྱེར་ཁ་པར་དུ་སྒྲར་འབེབས་རོགས་ཞེས་བཤད་པ་ཡིན། ངའི་ཐོག་མའི་བསམ་ཚུལ་ནི་རྒན་ཁྲིན་ལགས་ལ་བཅར་འདྲི་ཞུས་པ་བརྒྱུད། དམ་པ་ཁོང་གིས་སྐུ་ཚེ་གང་པོར་བོད་རིག་པའི་བྱ་གཞག་ཆེད་དཀའ་སྤྱད་བརྩོན་ཞིབ་བརྒྱུད་གྲུབ་འབྲས་བླ་ན་མེད་པ་བཞག་ཡོད་པ་དེ་བོད་རིགས་ཀློག་པ་པོ་རྣམས་ལ་ངེས་སུ་འཇུག་པ་དང་ཆབས་ཅིག རྒན་ཁྲིན་ལགས་ཀྱིས་ང་རང་གི་རིག་གཞུང་ཞིབ་འཇུག་ཐད་མཛུབ་སྟོན་དང་རོགས་རམ་གནང་བར་སེམས་ཁོང་ནས་སྐུ་དྲིན་ཞུ་འདོད་པ་ཡིན། ཡིན་ནའང་དོན་དེ་ལམ་ལྷོང་མ་བྱུང་བས་ངའི་མི་ཚེའི་ཁྲོད་ཀྱི་འགྱོད་གདུང་ཆེ་ཤོས་ཤིག་ཏུ་གྱུར།།
2019ལོའི་སྤྱི་ཟླ5པར། ཁང་ཏུའུ་ཆུང་ལའེ་གྲོང་ཁྱེར་གྱི་བཞུགས་ཤག་ཏུ་བསྐྱོན་པའི་སྐུ་ཞབས་ཁྲིན་ཆིང་དབྱིན་ལགས་ཀྱི་འདྲ་པར།
རྒན་ལགས་ལ་མྱ་ངན་ཞུ་བའི་ཉིན་མོར་རྒྱུ་རྐྱེན་སྣ་ཚོགས་ཀྱི་དབང་གིས་ང་རང་ཁྲེང་ཏུའུ་ལ་ཁོང་གི་གདུང་མཇལ་དང་མཐའ་མའི་ཕེབས་སྐྱེལ་ལའང་འགྲོ་ཐུབ་མ་སོང་། དེ་བས་ངས་ཉིན་མོ་དེར་འགྱོད་གདུང་དང་བཅས་དེ་སྔར་རྒན་ལགས་ལ་སྐད་འཕྲིན་གྱི་ལམ་ནས་ཁ་བརྡ་བྱས་པའི་ཟིན་ཐོར་བལྟས་པ་ཡིན། ཟིན་ཐོའི་ནང་དོན་མང་ཆེ་ཤོས་ནི་ངས་ཁོང་ལ་རིག་གཞུང་སྐོར་ནས་བཀའ་འདྲི་ཞུས་པ་དག་རེད། 2018ལོའི་ཚུན་གྱི་གླེང་མོལ་གྱི་ཟིན་ཐོ་མང་པོ་ཞིག་ད་དུང་ཉར་ཚགས་བྱས་ཡོད་ལ། སྐབས་རེར་ནང་དོན་ཁ་ཤས་ལ་བསྐྱར་དུ་ལྟ་དགོས་པས་ངས་བསུབ་མ་ཕོད། ད་ལྟ་ངས་ཟིན་ཐོ་དེ་དག་སྔར་ལས་ཀྱང་བསུབ་མི་ཕོད་པར་དྲན་གསོའི་རྟེན་དུ་ཡུན་ནས་ཡུན་དུ་ཉར་རྩིས་ཡིན།
དམིགས་བསལ་གྱི་ཉིན་མོ་འདིར། འདས་ཟིན་པའི་ལོ་ཟླའི་ནང་དྲན་དབང་གང་དང་འབྲེལ་ཡོད་ཀྱི་འདས་དོན་ལ་དྲན་གསོ་ཞུ་རྒྱུ་དེ་ནི་ཆེས་ཡིད་སྐྱོ་ཞིང་སེམས་ལ་ཟུག་གཟེར་སློང་བ་ཞིག་རེད་ཨང་། རྒན་ཁྲིན་ལགས་དང་ངེད་གཉིས་ལས་གྲོགས་ཡིན་ལ“དགེ་སློབ”ཀྱང་ཡིན། ངས་དེ་སྔ་ཀྲུང་གོའི་བོད་རིག་པ་ལྟེ་གནས་དཔེ་མཛོད་ཁང་དུ་ལས་ཀ་བྱེད་སྐབས། བྱ་བའི་དགོས་དབང་གིས1999ལོ་ནས2000ལོའི་བར་ང་རང་རྒྱ་ཡིག་དཔེ་དེབ་དཀར་ཆག་སྒྲིག་པའི་སྡེ་ཁག་ཏུ་ལས་བགོས་གནང་བ་དང་། རྒན་ཁྲིན་ལགས་ཀྱི་ཚེ་འདས་སྐུ་ཟླ་རྒན་ཡུང་ཧུང་ལགས་དང་ཆབས་ཅིག་གཞུང་ལས་ཁང་གཅིག་ཏུ་ལས་ཀ་བྱས། རྒན་ཡུང་ཧུང་ལགས་ནི་མི་རྣམ་དག་བརྩེ་སེམས་ཅན་ཞིག་ཡིན་ལ། ངེད་གཉིས་ཀྱི་འབྲེལ་བའང་ལེགས་པོ་ཡོད། ཁོང་གིས་ང་རང་དུས་རྒྱུན་སློབ་སྦྱོང་ལ་དགའ་བ་དང་། སྐབས་འགར་རྩོམ་ཡིག་རེ་གཉིས་ཀྱང་བྲིས་ནས་དེབ་ཏུ་སྤེལ་བཞིན་ཡོད་པ་མཐོང་ནས། ང་ལ་རྒན་ཁྲིན་ལགས་ཀྱི་དཔེ་ཁྲིད་ལ་མཉན་རྒྱུར་སྐུལ་མ་བཏང་། སྐབས་དེར་རྒན་ཁྲིན་ལགས་ཀྱིས་ཁོང་གི་གཞུང་ལས་ཁང་དུ་ཀྲུང་དབྱང་མི་རིགས་སློབ་ཆེན་གྱི་བོད་རིག་པའི་སློབ་གླིང་གི་འབུམ་རམས་པ་རྣམས་ལ་དཔེ་ཁྲིད་གནང་བཞིན་ཡོད། ཁོང་གི་འཁྲིད་བྱ་ནི་རྒྱ་ཡིག་གི་ལོ་རྒྱུས་དེབ་ཐེར་ནང་གི་འབྲེལ་ཡོད་བོད་ཀྱི་ལོ་རྒྱུས་སྐོར་ཡིན། ང་རང་དེ་སྔོན་ནས་རྒན་ཁྲིན་ལགས་དང་རྒྱུས་ཡོད་ལ། སྐབས་རེར་རྒན་ལགས་ལ་རིག་གཞུང་ཐད་ཀྱི་གནད་དོན་དག་བཀའ་འདྲི་ཞུ་བཞིན་ཡོད་མོད། ཐེངས་དེའི་དཔེ་ཁྲིད་ལ་མཉན་རྗེས་རྒན་ཁྲིན་ལགས་ནི་ལོ་རྒྱུས་སྤྱི་དང་སྒོས་སུ་བོད་རིག་པའི་ཐད་དུ་མཁྱེན་ཡོན་རྒྱ་ཆེན་པོ་མངའ་བ་དང་། ཕྲ་ཞིང་མཛངས་ལ་ཞིབ་པའི་བློ་གྲོས་ཀྱིས་ཕྱུག་པ་དེ་བས་རྟོགས་པར་གྱུར། སློབ་གསེང་གི་སྐབས་སུ་རྒན་ཁྲིན་ལགས་ཀྱིས་ང་ཚོར་བོད་ཀྱི་ལོ་རྒྱུས་སྦྱང་བྱར་མཁོ་ཆེ་བའི་ལོ་རྒྱུས་དེབ་ཐེར་ཁག་ཅིག་ཀྱང་འོས་སྦྱོར་གནང་། དེ་ནས་བཟུང་ང་རང་རྟག་ཏུ་རྒན་ལགས་ཀྱི་དཔེ་ཁྲིད་ལ་ཉན་དུ་སོང་ཞིང་ཕན་ཐོགས་ཀྱང་ཆེན་པོ་བྱུང་།
དེ་ཕྱིས་ངས་རྒན་ཁྲིན་ལགས་ཀྱི་འབུམ་རམས་པར་རྒྱུགས་སྤྲོད་རྩིས་ཀྱང་བྱས་མོད། རྒྱུ་རྐྱེན་མང་པོའི་དབང་གིས་བསམ་དོན་ཇི་བཞིན་བྱུང་མ་སོང་། ང་རང་རྒན་ལགས་ཀྱི་དངོས་སློབ་མིན་རུང་། ཁོང་གི་ལས་གྲོགས་སུ་གྱུར་པར་མ་ཟད་ཐོག་ཁང་བརྩེགས་རིམ་གཅིག་ཏུ་ལས་ཀ་བྱེད་པའི་སྐལ་བ་ལྡན་པས། ག་དུས་ཡིན་ཡང་རྒན་ཁྲིན་ལགས་ལ་བཀའ་འདྲི་ཞུ་རྒྱུའི་གོ་སྐབས་རག་གི་ཡོད་ལ། རྒན་ཁྲིན་ལགས་ཀྱིས་རིག་གཞུང་ཐད་ནས་མཛུབ་སྟོན་མི་ཉུང་བ་ཞིག་གནང་བས། ང་རང་ཡང་ཁོང་གི་དགེ་ཕྲུག་ཅིག་ཏུ་བརྩིས་ཆོག་པར་སྙམ། ནམ་ཞར་རང་ཉིད་རིག་གཞུང་ཐད་ཀྱི་གནད་དོན་ཆེ་ཆུང་གང་ཞིག་ལ་ཐུག་ཚེ་རྒན་ཁྲིན་ལགས་ལ་བཀའ་འདྲི་ཞུ་རྒྱུ་ནི་རང་གི་གོམས་གཤིས་སུ་གྱུར་ཡོད་ལ། རྒན་ལགས་ཀྱིས་ཀྱང་ཐུགས་སུན་མེད་པར་ང་ལ་གསུང་གི་བདུད་རྩི་ཕངས་མེད་དུ་སྦྱིན་པར་མ་ཟད། འབྲེལ་ཡོད་ཀྱི་དེབ་ཐེར་དང་རྩོམ་ཡིག་སོགས་འོས་སྦྱོར་གནང་། ངས་དོ་ཁུར་དང་ཞིབ་འཇུག་བྱ་ཡུལ་ནི་བོད་ཀྱི་ལོ་རྒྱུས་དང་། གཞན་བོད་སོག་འབྲེལ་བའི་ལོ་རྒྱུས་དང་འབྲེལ་ཡོད་ཡིག་ཚགས་དང་བཀའ་གཏན་ཁག་ཀྱང་ཡིན། རྒན་ཁྲིན་ལགས་ནི་དེ་དག་གི་ཐད་ལ་མཁྱེན་ཡོན་རྒྱ་ཆེན་པོ་ཡོད་པས། ཁོང་གིས《ཡོན་རྒྱལ་རབས་ཀྱི་ཏི་ཤྲི་འགྲོ་མགོན་འཕགས་པའི་མཛད་རྣམ》དང་། 《བོད་སོག་མི་རིགས་འབྲེལ་བའི་ལོ་རྒྱུས་མདོར་བསྡུས》（མཉམ་མཛད）《བོད་སོག་འབྲེལ་བའི་ལོ་རྒྱུས་ཆེན་མོ་ལས་ཆབ་སྲིད་བམ་པོ》སོགས་གསུང་རྩོམ་དང་འབྲེལ་ཡོད་ལྗགས་རྩོམ་མང་པོ་མཛད་ཡོད། ཁོང་གི་ཡོན་མིང་ཆིང་རྒྱལ་རབས་སྐབས་ཀྱི་ལོ་རྒྱུས་བརྩམས་ཆོས་མང་ཆེ་བ་ནི་བོད་སོག་འབྲེལ་བའི་སྐོར་ཡིན་པ་དང་། དེའི་ཐད་ནས་གྲུབ་འབྲས་ཀྱང་གཟེངས་སུ་ཐོན་པ་བླངས་ཡོད། ངའི་བོད་ཀྱི་ནང་སོའི་སྐོར་གྱི་ཞིབ་འཇུག་ནི་རྒན་ཁྲིན་ལགས་ལ་འབྲེལ་བ་དམ་པོ་ཡོད། ཐེངས་ཤིག་ངས་རྒན་ཁྲིན་ལགས་དང་གླེང་མོལ་བྱེད་སྐབས་ང་ཚོའི་ཕ་ཡུལ་རེབ་གོང་གི་ལོ་རྒྱུས་གླེངས་ཤིང་། རྒན་ལགས་ཀྱི་བློ་བསྐྱེད་འོག་ངས་ནང་སོའི་སྐོར་ལ་དོ་སྣང་དང་ཞིབ་འཇུག་བྱེད་འགོ་ཚུགས། ངའི་ནང་སོ་དང་འབྲེལ་ཡོད་ཀྱི་རྩོམ་ཡིག་རྣམས་ལ་རྒན་ལགས་ཀྱི་རྒྱབ་སྐྱོར་དང་རོགས་རམ་མི་ཉུང་བ་ཞིག་ཐོབ་ཡོད།
2014ལོའི་དབྱར་ཁར། ང་རང་རྒན་ཁྲིན་ལགས་དང་མཉམ་དུ་ཉིན་བདུན་རིང“ཆེད་མཁས་པ་གྲགས་ཅན་མཚོ་སྔོན་དུ་བསྐྱོད་ནས་རྟོག་ཞིབ་བྱེད་པ”ཞེས་པའི་བྱ་འགུལ་ལ་ཞུགས་པ་ཡིན། བྱ་འགུལ་དེ་ནི་མཚོ་སྔོན་ཞིང་ཆེན་འཐབ་ཕྱོགས་གཅིག་གྱུར་པུའུ་ཡིས་སྤེལ་བ་རེད། ཉིན་བདུན་གྱི་རིང་ང་ཚོ་མཚོ་སྔོན་གྱི་སྐུ་འབུམ་བྱམས་པ་གླིང་དང་། མཚོ་བྱང་བོད་རིགས་རང་སྐྱོང་ཁུལ་མཁར་གཙོས་མདའ་བཞི་རྫོང་དང་མདོ་ལ་རྫོང་སོགས་སུ་ཡུལ་དངོས་རྟོག་ཞིབ་ལ་བསྐྱོད་ཅིང་། རང་ཉིད་ཀྱིས་རྒན་ལགས་ལ་ཞབས་ཞུ་ཞུ་ཞོར་མཉམ་དུ་རྟོག་ཞིབ་བྱས་པ་དང་། མཇུག་མཐར་ཡིག་ཐོག་ནས་རྟོག་ཞིབ་ཀྱི་མྱོང་ཚོར་དང་བསམ་འཆར་ཞིག་ཀྱང་བྲིས་ནས་འབྲེལ་ཡོད་ལས་ཁུངས་ལ་ཕུལ་བ་ཡིན། དེའི་རྗེས་ཀྱི་བྱ་འགུལ་ལ་ང་རང་ཞུགས་ཐུབ་མ་སོང་ཡང་། ཐེངས་དེར་རྒན་ཁྲིན་ལགས་ཀྱིས་རྟོག་ཞིབ་ཀྱི་མྱོང་ཚོར་དང་འབྲེལ་ནས།“མཚོ་སྔོན་ཞིང་ཆེན་གྱིས་མི་རིགས་མཐུན་སྒྲིལ་ཡར་ཐོན་གྱི་སྔོན་ཐོན་ཁུལ་གསར་འཛུགས་སྐོར་གྱི་རིགས་པའི་གཞུང་ལུགས་དང་ལག་ལེན་”ཞེས་པའི་བརྗོད་དོན་ལ་དམིགས་ཏེ། 《ཞིང་ཆེན་གྱི་གནས་ཚུལ་ལ་ངོས་འཛིན་གཏིང་ཟབ་དང་། ལོ་རྒྱུས་དང་རིག་གནས་ཀྱི་ཐོན་ཁུངས་སྔོག་འདོན་སྒོས་གསར་འཛུགས་བྱེད་སྒོར་ཞབས་འདེགས་ཞུ་བ》ཞེས་པའི་དཔྱད་རྩོམ་བྲིས་ཤིང་། དེ་ཉིད་མཚོ་སྔོན་ཞིང་ཆེན་འཐབ་ཕྱོགས་གཅིག་གྱུར་པུའུ་ཡིས་གཙོ་སྒྲིག་བྱས་པའི་《མཚོ་སྔོན་ཞིང་ཆེན་གྱིས་མི་རིགས་མཐུན་སྒྲིལ་ཡར་ཐོན་གྱི་སྔོན་ཐོན་ཁུལ་གསར་འཛུགས་སྐོར་གྱི་རིགས་པའི་གཞུང་ལུགས་དང་ལག་ལེན》ཞེས་པའི་དེབ་ཏུ་བཀོད་ཡོད།
2014ལོར་རྟོག་ཞིབ་གནང་སྐབས། པེ་ཅིང་གི་ཆེད་མཁས་པས་སྐུ་འབུམ་དགོན་པའི་དོ་དམ་ཨུ་ཡོན་ལྷན་ཁང་གི་ལས་སྣེ་པ་ཚོ་དང་བགྲོ་གླེང་གནང་བཞིན་པ།
ཐེངས་དེར་རྟོག་ཞིབ་བྱེད་སྐབས། རྒན་ཁྲིན་ལགས་གནས་གང་ལ་སླེབས་ན་དེ་ན་རིག་གཞུང་ཐད་ཀྱི་བཀའ་འདྲི་ཞུ་མཁན་དང་ཐུག་འཕྲད་ཞུ་མཁན་མང་པོ་ཡོད་ལ། ཐེངས་ཤིག་མཚོ་བྱང་ཁུལ་མཁར་དུ་ང་ཚོས་དགོང་ཟས་སྤྱད་རྗེས་མགྲོན་ཁང་གི་སྒོ་ཁར་སླེབས་པ་ན། ཁུལ་སྲིད་གྲོས་རིག་གནས་ལོ་རྒྱུས་གཞུང་ལས་ཁང་གི་ལས་བྱེད་པ་གཉིས་ཀྱིས་རྒན་ཁྲིན་ལགས་ལ་བསྒུགས་འདུག ཁོ་ཚོས《མཚོ་བྱང་ཁུལ་གྱི་རིག་གནས་ལོ་རྒྱུས་ཡིག་ཆ་（ཞབས་དྲུང་དཀར་པོ）》ཞེས་པའི་དེབ་ཅིག་རྩོམ་སྒྲིག་བྱ་འཆར་ཡོད་པས། རྒན་ཁྲིན་ལགས་ལ་ཞབས་དྲུང་དཀར་པོ་སྐུ་ཕྲེང་བརྒྱད་པའི་ལོ་རྒྱུས་སྐོར་གྱི་འབྲེལ་ཡོད་ཤེས་བྱའི་སྐོར་བཀའ་འདྲི་ཞུ་དགོས་ཟེར། རྒན་ཁྲིན་ལགས་ཀྱིས་ཐུགས་གཤིས་འཇམ་པོའི་ངང་ནས་ང་ཚོ་ཁོང་གི་ཁང་པའི་ནང་དུ་བསུས་ཏེ་ཅུང་སྒུག་ཏུ་བཅུག་རྗེས་ཁོང་ཉིད་ཆབ་གསང་དུ་ཕེབས་སོང་། སྐབས་དེར་རྒན་ལགས་ཀྱི་སྐུ་ཁམས་ཅུང་བདེ་པོ་མེད་པ་འདྲ། ང་རང་གིས་ཀྱང་ལ་མོ་ཞབས་དྲུང་དཀར་པོ་དང་འབྲེལ་ཡོད་ཀྱི་ལོ་རྒྱུས་ལ་དོ་སྣང་དང་ཞིབ་འཇུག་བྱེད་ཀྱིན་ཡོད་པས། ང་ཚོས་རྒན་ལགས་ལ་སྒུག་པའི་དུས་ཡུན་ནང་ངས་ཁོང་ཚོར་ཞབས་དྲུང་དཀར་པོའི་སྐོར་གྱི་ལོ་རྒྱུས་གླེངས་པར་མ་ཟད། འབྲེལ་ཡོད་ཡིག་ཚགས་དང་ཡིག་ཆ་ཁག་ཀྱང་ངོ་སྤྲོད་བྱས་པ་ཡིན། དགེ་རྒན་ཁྲིན་ལགས་ཕྱིར་ཕེབས་རྗེས། ཁོང་གིས་ཞིབ་ཚགས་ལྡན་པའི་ངང་ནས་ཁོ་ཚོར་ལོ་རྒྱུས་ཐོག་གི་ཞབས་དྲུང་དཀར་པོ་དང་། ད་དུང་ཉིན་དེར་རྟོག་ཞིབ་གནང་བའི་ལ་མོ་སྒར་ཐོག（ལ་མོ་སྒར་ཐོག་ཁམས་གསུམ་རྣམ་རྒྱལ་ཀུན་ཏུ་བདེ་བའི་གླིང）དང་མཚོ་བྱང་རྡུལ་ཕྲན་གྲོང་དང་འབྲེལ། ཞབས་དྲུང་དཀར་པོ་སྐུ་ཕྲེང་བརྒྱད་པས་ཀྲུང་གོ་གསར་པ་བཙུགས་པའི་སྔ་རྗེས་སུ་མཚོ་བྱང་ཁུལ་གྱི་སྤྱི་ཚོགས་དང་ལོ་རྒྱུས་འཕེལ་རྒྱས་ཐད་བཞག་པའི་མཛད་རྗེས་སྐོར་དང་། དེ་མིན“མདེལ་གཉིས”ཀྱི་རྟེན་གཞི་བཅས་རྒྱལ་སྲུང་འཛུགས་སྐྲུན་གྱི་ཐད་ལ་བཏོན་པའི་འཇོན་ནུས་སྐོར་སོགས་གསུང་གླེང་གནང་། རྒན་ལགས་ཀྱིས་གསུངས་པའི་གནས་ཚུལ་དང་ཁོང་གི་དེའི་ཐད་ཀྱི་བཞེད་དགོངས་ཀྱིས་ངའི་བློ་ཡི་སྒོ་མོའང་ཆེས་ཆེར་ཕྱེས་ཤིང་། ཞིབ་འཇུག་གི་རིགས་ལམ་དང་མཐོང་རྒྱ་ཡང་ཆེ་རུ་བསྐྱེད་བྱུང་།
མདོ་ལ་རྫོང་དུའང་དགེ་རྒན་ཁྲིན་ལགས་མགྲོན་དུ་བསུ་མཁན་ཡོད་ལ། ཁོང་ཉིད་གར་ཕེབས་ས་རུ་དགའ་བསུ་ཐོབ་པར་མ་ཟད། འཚམ་འདྲི་དང་རིག་གཞུང་ཐད་ནས་བཀའ་འདྲི་ཞུ་མཁན་ཡང་མི་ཉུང་བ་ཞིག་ཡོད། དངོས་གནས“ཡོན་ཏན་ལྡན་ན་སྐྱེ་བོ་ཀུན། ། མ་བསྡུས་པར་ཡང་རང་ཉིད་འདུ། ། དྲི་ལྡན་མེ་ཏོག་རྒྱང་རིང་ཡང་། ། བུང་བ་སྤྲིན་གྱི་ཚོགས་བཞིན་འཁོར། །”ཞེས་ས་སྐྱ་ལེགས་བཤད་ལས་གསུངས་པ་དེ་ཅི་མ་བདེན་སྙམ། ཐེངས་འདིའི་རྟོག་ཞིབ་ནང་ང་རང་གི་ཤེས་རྒྱ་དང་མཐོང་རྒྱ་ཆེ་རུ་བསྐྱེད་ཅིང་། མྱོང་ཚོར་ཡང་མི་ཚེ་གང་པོར་བརྗེད་ཐབས་བྲལ་བ་རེད།
2014ལོར་རྟོག་ཞིབ་གནང་སྐབས། མཚོ་བྱང་ཁུལ་མདོ་ལ་རྫོང་སྟོང་སོ་ཆུང་བར་བསྐྱོན་པའི་སྐུ་ཞབས་ཁྲིན་ཆིང་དབྱིན་ལགས་གྱི་འདྲ་པར།
2018ལོ་ནས་བཟུང་རྒན་ཁྲིན་ལགས་ཀྱི་སྐུ་བསྙུངས་ཤིང་། ལོ་འདི་འགའི་ནང་དབྱར་ཁ་སླེབས་ཐེངས་རེར་རྒན་ཁྲིན་ལགས་མཚོ་སྔོན་ཞིང་ཆེན་བོད་སྨན་ཁང་དུ་བཞུགས་ཏེ་སྨན་བཅོས་གནང་། སྐབས་རེར་ད་དུང་མཚོ་སྔོན་མི་རིགས་སློབ་ཆེན་ནས་གདན་དྲངས་པ་ལྟར་དེར་ཕེབས་ཏེ་འཆད་ཁྲིད་ཀྱང་གནང་བཞིན་ཡོད། ཉིན་བཅུ་ལྷག་གི་སྔོན་ལ་རྒན་ཁྲིན་ལགས་ཀྱི་བུ་གཉིས་པ་ཁྲིན་ལི་ཅན་གྱིས་མ་གཞི་ད་ལོའི་སྤྱི་ཟླ5པར་རྒན་ཁྲིན་ལགས་པེ་ཅིན་དུ་ལོག་ནས་དུས་ཚོད་ངེས་ཅན་ཞིག་བཞུགས་རྗེས། མཚོ་སྔོན་དུ་སྨན་བཅོས་བྱེད་དུ་ཕེབས་རྩིས་ཡོད་ཅེས་ལབ་བྱུང་། འོན་ཀྱང་ད་ནི་རྒན་ཁྲིན་ལགས་ནི་ཁོང་གི་ཕ་ཡུལ་གཉིས་པ་སྟེ་མཚོ་སྔོན་དུ་ལོག་ཕེབས་ཀྱི་སྐལ་བ་ཡེ་ནས་ཟད་སོང་།
2018ལོའི་དབྱར་ཁར་རྒན་ཁྲིན་ལགས་ཀྱིས་མཚོ་སྔོན་དུ་སྨན་བཅོས་བྱེད་སྐབས། ང་ཡང་ཟི་ལིང་དུ་གུང་གསེང་ལ་ཕྱིན་ཡོད། རྒན་ཁྲིན་ལགས་སྨན་ཁང་ནས་བུད་རྗེས། ང་རང་ཁོང་དང་མཉམ་དུ་ཟི་ལིང་ཉེ་འཁོར་གྱི་དགོན་ལུང་དགོན་པ་དང་། དམར་གཙང་བྲག སྐུ་འབུམ་བྱམས་པ་གླིང་སོགས་ལ་ལྟ་སྐོར་དུ་ཕྱིན་པ་ཡིན། དེ་དུས་རྒན་ལགས་ཀྱི་ཞབས་ཅུང་ཙམ་བདེ་པོ་མེད་པ་ཙམ་ལས་སྤྱིར་ན་སྐུ་ཁམས་དྭངས་ཤིང་། རི་ལམ་གཟར་བའི་དམར་གཙང་བྲག་ལའང་ཕེབས་རྒྱུར་ཡང་དཀའ་ཚེགས་ཅི་ཡང་མེད། རྒན་ཁྲིན་ལགས་སྐུ་གྲོངས་པའི་ཉིན་མོ་དེར། ཐེངས་དེར་ང་ཚོ་དམར་གཙང་བྲག་ལ་འཁྲིད་མཁན་རབ་འབྱམས་པ་སྙིང་བྱམས་ཚེ་རིང་ལགས་ནས་དེ་དུས་རྒན་ལགས་དང་ངེད་གཉིས་ཀྱིས་དམར་གཙང་བྲག་གི་རྡོ་རིང་ཡི་གེ་ཀློག་བཞིན་པའི་པར་ཞིག་སྐད་འཕྲིན་གྱི་གྲོགས་ཚོམས་སུ་སྤེལ་ཡོད་པ་མཐོང་བ་ན། ང་རང་སྐྱོ་གདུང་དྲག་པོས་གཟིར་བར་གྱུར་པ་དང་ཆབས་ཅིག་འདྲ་པར་དེའང་སྔར་ལས་རྩ་ཆེ་བ་ཞིག་ཏུ་གྱུར།
ཐེངས་དེའི་ཆེས་དོན་སྙིང་ལྡན་པའི་འགྲུལ་བཞུད་ནི་སྐུ་འབུམ་བྱམས་པ་གླིང་དུ་མཇལ་བ་དེ་ཡིན། རྒན་ཁྲིན་ལགས་ཀྱིས་དེ་སྔོན་མཚོ་སྔོན་ཞིང་ཆེན་སྤྱི་ཚོགས་ཚན་རིག་ཁང་དུ་ཕྱག་ལས་གནང་སྐབས།（1984ལོ་ནས1993ལོ་བར） རྒན་ལགས་དང་ཁོང་ཚོའི་ཞིབ་འཇུག་ཚོགས་པས་ལོ་འགའི་རིང་ལ་སྐུ་འབུམ་བྱམས་པ་གླིང་དུ་ཡུལ་དངོས་རྟོག་ཞིབ་གནང་ཞིང་། 《སྐུ་འབུམ་བྱམས་པ་གླིང་གི་གནས་ཚུལ་མདོར་བསྡུས》ཞེས་པའི་དེབ་ཅིག་ཀྱང་བརྩམས་ཡོད་པ་རེད། དེ་བས་རྒན་ཁྲིན་ལགས་སྐུ་འབུམ་དགོན་པའི་ལྷ་ཁང་རེ་རེ་དང་དེར་བཞུགས་པའི་བསྟན་བཅོས་དང་རྡོ་རིང་ཡི་གེ། དགོན་པའི་དུས་བཞིའི་ཆོས་ལུགས་ཆོ་ག་དང་མེ་ཏོག་མཆོད་པ་བཞེངས་ཚུལ་སོགས་ཁྱོན་ཡོངས་ལ་གསལ་ཆ་ཧ་ཅང་མངའ་བས། རྒན་ལགས་ལྷ་ཁང་གང་ཞིག་ལ་སླེབས་ཀྱང་དེ་དང་འབྲེལ་ཡོད་ཀྱི་ལོ་རྒྱུས་དང་མི་སྣ། དོན་རྐྱེན་སོགས་ཐུགས་གཞིག་མཛད་མི་དགོས་པར་ཐུགས་ཐོག་ནས་ཤར་མར་ངོ་སྤྲོད་གནང་ཐུབ་ཅིང་། ཁོང་ཉིད་སྐུ་འབུམ་བྱམས་པ་གླིང་གི་གྲུ་ཟུར་རེ་རེར་ཡང་རྒྱུས་གསལ་པོ་མངའ་བ་རེད། ངས་འགྲུལ་བཞུད་འདི་བརྒྱུད་ནས་སྐུ་འབུམ་བྱམས་པ་གླིང་དང་འབྲེལ་ཡོད་ཀྱི་ལོ་རྒྱུས་ཤེས་བྱ་མང་པོ་ཞིག་ལ་ངེས་ཤེས་འདྲོངས་པ་དང་། དེ་ནི་ང་ལ་མཚོན་ན་བརྗེད་པར་དཀའ་ཞིང་རིགས་པས་འགྲིམས་པའི་འགྲུལ་བཞུད་ཅིག་ཏུ་འཁུམས།
རྒན་ཁྲིན་ལགས་སྐུ་སྙུང་གིས་ཟིན་པའི་ལོ་ཟླའི་ནང་། ངས་ད་དུང་སྔར་བཞིན་སྐད་འཕྲིན་དང་ཁ་པར་གྱི་ལམ་ནས་ཁོང་ལ་སྐུ་ངལ་མང་པོ་བཟོས་མྱོང་ཞིང་། རྒན་ལགས་ཀྱིས་ཀྱང་སྔོན་མ་ནང་བཞིན་ཐུགས་སུན་མེད་པར་ངའི་དྲི་བར་ལན་བསྐྱོན་ཡོང་། 2020ལོར་ལྟེ་གནས་རྟེན་རྫས་བཤམས་མཛོད་ཁང་གིས《ཡོན་རྒྱལ་རབས་ཀྱི་ཞ་ལུ་དགོན་པའི་རྒྱ་བོད་སྒྱུ་རྩལ་འགྲེམས་སྟོན》ཞེས་པའི་འགྲེམས་སྟོན་སྤེལ་བ་དང་། ངེད་ཀྱིས་དེའི་ཁྲོད་ཀྱི་ཞ་ལུ་དགོན་པའི་ལོ་རྒྱུས་སྐོར་གྱི་སྡེ་ཚན་གྱི་ནང་དོན་འབྲི་བའི་འགན་ཁུར། ང་ཚོར་འབྲེལ་ཡོད་ཀྱི་ཞིབ་འཇུག་ལས་གཞིའི་རྨང་བརྟན་པོ་ཡོད་ལ། དཔྱད་གཞིའི་ཡིག་རིགས་ཀྱང་ཕུན་སུམ་ཚོགས་པ་ཡོད་མོད། ད་དུང་རྒྱུན་པར་རྒན་ཁྲིན་ལགས་ལ་དཀའ་གནད་མང་པོ་ཞིག་བཀའ་འདྲི་ཞུ་དགོས་ཀྱི་ཡོད། རྒན་ཁྲིན་ལགས་ནི་ཡོན་རྒྱལ་རབས་སྐབས་ཀྱི་ལོ་རྒྱུས་ཀྱི་ཤེས་བྱར་མངའ་བརྙེས་པ་ཞིག་ཡིན་ཞིང་། ཁོང་གིས་མཛད་པའི《ཡོན་རྒྱལ་རབས་ཀྱི་ཏི་ཤྲི་འགྲོ་མགོན་འཕགས་པའི་མཛད་རྣམ》དང་། ཁོང་གིས་འགན་འཁུར་དང་གཙོ་འགན་གཅིག་ལྕོགས་སུ་བཞེས་པའི《བོད་ཀྱི་ལོ་རྒྱུས་ཆེན་མོ》གཉིས་ནི་ཐེངས་འདིའི་འགྲེམས་སྟོན་ཁྲོད་དགོས་ངེས་ཀྱི་དཔྱད་གཞིའི་ཡིག་ཆ་གཙོ་གྲས་ཡིན་པས། ང་ཚོར་ཁོང་གི་རོགས་རམ་དང་གནད་འགག་གི་མཛུབ་སྟོན་དེ་ལས་ཀྱང་མཁོ་བ་རེད། སྐབས་འགར་དྲི་གཞིའི་ནང་དོན་ཅུང་མང་དྲགས་པས་རྒན་ལགས་ཀྱིས་ཁ་པར་སྟེང་ནས་ཕྱག་བྲིས་གནང་ན་སྐུ་ངལ་ཁག་པར་དོགས་ནས། ངག་ཐོག་ནས་གསུང་རོགས་ཞེས་ཞུས་ཀྱང་། ཁོང་གིས་སྔར་བཞིན་ཡི་གེའི་ལམ་ནས་ཕྱག་བྲིས་རིང་པོ་རིང་པོ་ཞིག་བསྐུར་ཡོང་གི་ཡོད། དོན་དེ་ལ་སོགས་པས་རྟག་པར་ང་ལ་བློ་བཟོད་ཤིན་ཏུ་མི་བདེ་བ་དང་བཅས་འཚེར་སྣང་སྐྱེ་རུ་བཅུག་མྱོང་།
གཞན་ཡང་དེ་སྔོན་རྒན་ཁྲིན་ལགས་ཀྱིས་ལྟེ་གནས་རྟེན་རྫས་བཤམས་མཛོད་ཁང་གི《བོད་བརྒྱུད་ནང་བསྟན་གྱི་སྤྲུལ་སྐུའི་ཡང་སྲིད་ངོས་འཛིན་སྐོར་གྱི་ཆེད་དོན་བཤམས་སྟོན》གྱི་རིགས་གཞུང་ཐད་ཀྱི་ཇུས་འདོན་པའི་འགན་བཞེས་ཏེ་ནུས་པ་གལ་ཆེན་བཏོན་མྱོང་། 2017ལོའི་ཟླ2པར་ཁོང་གིས་འགྲེམས་སྟོན་དེ་དང་འབྲེལ་ནས།“ཆེད་ལས་མཁས་པས་བོད་བརྒྱུད་ནང་བསྟན་གྱི་སྤྲུལ་སྐུའི་ཡང་སྲིད་སྐོར་གསེད་བཀྲོལ་གནང་བ”ཞེས་པའི་ཆེད་དོན་གྱི་འཆད་ཁྲིད་གནང་། ད་ལྟ་ངང་འཇམ་ཞི་དུལ་གྱི་སྐྱེས་མཆོག་འདི་ཉིད་ང་ཚོ་དང་གཏན་དུ་གྱེས་སོང་། འདི་ནི་ཀྲུང་གོའི་བོད་རིག་པའི་སྡེ་དང་ཐ་ན་རྒྱལ་སྤྱིའི་བོད་རིག་པའི་སྡེ་ལ་མཚོན་ནའང་གྱོང་གུན་ཆེན་པོ་ཞིག་རེད།
རྒན་ཁྲིན་ལགས་ཀྱི་རིག་གཞུང་ཐད་ཀྱི་གྲུབ་འབྲས་ནི་རིག་གཞུང་ཞིབ་འཇུག་པ་ཚང་མས་མཁྱེན་གསལ་ལྟར་ཏེ། ཁོང་ལ་རིག་གཞུང་ཞིབ་འཇུག་སྐོར་གྱི་བརྩམས་ཆོས་དེབ་བཅུ་ལྷག་ཡོད་པར་མ་ཟད། འགྱུར་ཡིག་གི་དེབ་གྲངས་ཀྱང་མང་པོ་ཡོད། རིག་གཞུང་དཔྱད་རྩོམ་ནི་དེ་བས་མང་སྟེ།《ཀྲུང་གོའི་བོད་རིག་པ》དུས་དེབ་ཁོ་ནར་སྤེལ་བའི་དཔྱད་རྩོམ་ཡང30ལྷག་ཟིན་ཡོད། ཁོང་གིས་ནམ་རྒྱུན་བོད་ཡིག་ཡིག་སྒྱུར་གནང་བ་ནི་བོད་ཡིག་སློབ་སྦྱོང་བྱ་ཐབས་ཡག་པོ་ཞིག་ཏུ་ངོས་བཟུང་ཡོད་ལ། སྒོས་སུ་བོད་ཡིག་དཔེ་རྙིང་གི་ཡིག་སྒྱུར་དེ་གལ་ཆེན་དུ་འཛིན་བཞིན་ཡོད། རྒན་ཁྲིན་ལགས་ཏུན་ཧོང་ཡིག་རྙིང་ལ་མཁས་པ་དེ་ཀུན་གྱིས་མཁྱེན་མོད། ཁོང་ཉིད་དེ་ལས་ཀྱང་ཡོན་མིང་ཆིང་རྒྱལ་རབས་སྐབས་ཀྱི་བོད་ཡིག་བཀའ་ཤོག་དང་བཀའ་གཏན་གྱི་ཡིག་སྒྱུར་དང་། གསེད་བཀྲོལ། ཞིབ་འཇུག་བཅས་ཀྱི་ཐད་ལ་མཁས་ཤིང་བྱང་ཆ་ཆེས་ཆེར་ལྡན་པ་རེད། འདི་ནི་ཁོང་གི་ཐུན་མོང་མ་ཡིན་པའི་ཁྱད་ཆོས་ཤིག་ཡིན་ལ། གཞན་གྱིས་བསྒྲུན་དུ་མེད་པའི་ཡོན་ཏན་ཡང་ཡིན། ཁོང་གིས་ཡོན་རྒྱལ་རབས་སྐབས་སུ་གོང་མའི་ཏི་ཤྲིས་ཞ་ལུའི་ཁྲི་དཔོན་རྣམས་ལ་བསྩལ་བའི་བཀའ་ཤོག་དང་། འབྲེལ་ཡོད་ཀྱི་བཀའ་གཏན་སོགས་ཡིག་སྒྱུར་དང་། གསེད་བཀྲོལ། ཞིབ་འཇུག་སོགས་ཀྱི་ཕྱག་ལས་ཀྱང་མང་པོ་མཛད་ཡོད།
ལོ་འདི་འགའི་རིང་ངས་རང་གི་ལས་གཞི《ཆིང་རྒྱལ་རབས་སྲིད་གཞུང་དང་རྒྱལ་བ་པཎ་ཆེན་རྣམ་གཉིས། བོད་སོག་འགོ་པ་བཅས་ཀྱིས་ཆ་གན་ནོ་མོན་ཁང་ལ་གནང་བའི་བཀའ་གཏན་ལེགས་སྒྲིག་དང་ཡིག་སྒྱུར། ཞིབ་འཇུག》ཅེས་པའི་སྤྱི་ཚོགས་ཚན་རིག་མ་རྩའི་རྣམ་གྲངས་གཉེར་རིང་ཆ་གན་ནོ་མོན་ཁང་དང་འབྲེལ་ཡོད་བཀའ་ཤོག་དང་བཀའ་གཏན20ལྷག་ཡིག་སྒྱུར་དང་གསེད་བཀྲོལ་བྱེད་སྐབས། ཆིང་རྒྱལ་རབས་ཀྱི་ལོ་རྒྱུས་དང་བོད་སོག་དབར་གྱི་འབྲེལ་བའི་ལོ་རྒྱུས་སྐོར་ལ་རྒན་ཁྲིན་ལགས་ནས་རོགས་རམ་ཆེན་པོ་གནང་མྱོང་། བོད་སོག་དང་མན་ཇུའི་ལོ་རྒྱུས་མི་སྣ་དང་དོན་རྐྱེན། དེ་བཞིན་དཔོན་མིང་ས་མིང་སོགས་ཀྱི་དཀའ་གནད་ལ་འཕྲད་དུས་རྟག་པར་རྒན་ལགས་ལ་བཀའ་འདྲི་ཞུས་པ་དང་། རྒན་ལགས་ནས་ངའི་དོགས་གནད་གང་ཞུས་ཕལ་ཆེ་བ་ལེགས་པར་སེལ་ཅིང་། ཁོང་ལ་གསལ་ཆ་མེད་ཚེ་ཐད་ཀར་མི་ཤེས་ཞེས་བཤད་པ་ལས་ནམ་ཡང་མི་ཤེས་ཤེས་མདོག་མི་སྟོན་ལ། ཁོང་ལའང་གདེང་ཚོད་མེད་པའི་དོགས་གཞི་དེ་དག་སྤྱིར་བཏང་གཞན་སུ་ཞིག་ལ་དྲིས་ཀྱང་ལན་དོན་མཐུན་འདེབས་ཐུབ་མཁན་བྲལ། རྒན་ཁྲིན་ལགས་ཀྱིས་ཁོང་གི་ཉམས་མྱོང་དང་ལོ་རྒྱུས་ཀྱི་མཁྱེན་ཡོན་སོགས་ལ་བརྟེན་ནས་ང་ལ་དྲིས་ལན་ཡིད་ཚིམ་པ་ཞིག་བསྐྱོན་ཡོང་ཞིང་། ངའི་བཀའ་ཤོག་དང་བཀའ་གཏན་གསེད་བཀྲོལ་ཁྲོད་ཀྱི་དཀའ་གནད་མང་པོ་ཞིག་ཡང་དང་ཡང་དུ་བཀྲོལ་མྱོང་། ང་རང་བོད་ཡིག་ཆེད་ལས་འཛིན་གྲྭ་ནས་སྦྱངས་པ་ཐོན་པ་ཞིག་ཡིན་རུང་། བོད་ཡིག་བཀའ་གཏན་གྱི་ནང་དོན་འགྲེལ་སྐབས་རྒན་ལགས་ལ་བཀའ་འདྲི་ཞུ་དགོས་པའི་སྐབས་ཀྱང་ཡོད། དེ་ནི་རང་ཉིད་ཀྱི་བོད་ཡིག་ཆུ་ཚད་མ་འདངས་པའི་རྐྱེན་གྱིས་མ་ཡིན་པར། བཀའ་གཏན་གྱི་རྩོམ་གཤིས་ཐད་ལ་རྒྱུས་ཡོད་མེད་དང་བརྩོན་ཞིབ་བྱས་མིན་སོགས་ལ་རག་ལས་ཤིང་། དེའི་ཐད་དུས་ཡུན་རིང་པོར་སྦྱངས་ནས་བསགས་པའི་ཤེས་ཡོན་རྒྱ་ཆེན་པོ་ཞིག་ཀྱང་དགོས་པ་རེད། དེ་ནི་རྒན་ཁྲིན་ལགས་ཀྱིས་ཕྲན་གྱི《བོད་ཀྱི་ལོ་རྒྱུས་ཡིག་ཆ་དང་རིག་གནས་སྐོར་གྱི་དཔྱད་རྩོམ་ཕྱོགས་བསྒྲིགས》ཞེས་པའི་དེབ་ཀྱི་གླེང་གཞི་རུ།“བཀའ་ཤོག་འདི་རིགས་གསར་འགྲེལ་དང་ཡིག་སྒྱུར་བྱེད་པའི་གོ་རིམ་ཁྲོད། ལོ་རྒྱུས་དང་ཆོས་ལུགས་ཀྱི་ཐ་སྙད་དང་མིང་བརྡ་ཁག་པོ་གང་མང་པོར་འཕྲད་སྲིད་པས་དངོས་གནས་ལས་ཚེགས་ཆེ་བའི་བྱ་བ་ཞིག་རེད། སྐབས་རེར་མིང་ཚིག་གཅིག་གི་དོན་རྟོགས་པར་ཡང་དང་བསྐྱར་དུ་བསམ་གཞིག་བཏང་སྟེ་གཟའ་འཁོར་གཅིག་གམ་ཡང་ན་ཟླ་བ་གཅིག་གི་དུས་ཡུན་སྤྱད་ཀྱང་ད་དུང་གཏན་ལ་འབེབས་དཀའ་ཞིང་།
བཀའ་ཤོག་ཁྲོད་ཀྱི་འབྲེལ་ཡོད་མི་སྣ་དང་ལོ་རྒྱུས་དོན་རྐྱེན་སོགས་གོ་རིམ་མ་འཛོལ་བར་ངེས་རྒྱུ་དེ་ཡང་ལས་སླ་མོ་ཞིག་མིན”ཞེས་གསུངས་པ་ཇི་བཞིན་ནོ། ། དེ་ནི་རྒན་ཁྲིན་ལགས་ཁོང་ཉིད་ཀྱི་མྱོང་ཚོར་དངོས་ཡིན་ཞིང་། རྒན་ལགས་གྱིས་དེ་ལྟར་རིག་གཞུང་ཞིབ་འཇུག་ཐད་ལོ་དང་ཟླ་བ་མཐུད་ནས་རྒྱུན་འཁྱོངས་ལྷོད་མེད་སྒོས་བརྩོན་པ་གནང་མཐར་རིག་གཞུང་ཞིབ་འཇུག་གི་གྲུབ་འབྲས་བླ་ན་མ་མཆིས་པ་བཞག་ཡོད། ང་རང་གི་ཞིབ་འཇུག་བྱ་བའི་ཁྲོད་དུ་དམ་པ་གང་གི་རིག་གཞུང་གི་མཛུབ་སྟོན་དང་། ཁོང་གི་ཡོན་ཏན་མི་ཉུང་བ་ཞིག་བསོད་ནམས་ཀྱི་བགོ་སྐལ་དུ་ཐོབ་པ་ནི་ངའི་མི་ཚེའི་གཟི་བརྗིད་དང་འབྱོར་པ་རིན་ཐང་བྲལ་བ་ཞིག་ཏུ་སེམས་ཡོད།
རང་གི་མི་ཚེ་ཧྲིལ་པོ་བོད་རིག་པའི་བྱ་གཞག་ཐད་བསྟིམས་པའི་དམ་པ་འདི་ལ།“མཁས་བཙུན་བཟང་གསུམ་གྱི་མཛད་པས་ཕྱུག་པའི་སྐྱེས་བུ་”ཞེས་བསྟོད་བསྔགས་ཅི་བས་ཞུ་འོས་ཤིང་། འདི་ནི་བོད་ཀྱི་སྲོལ་རྒྱུན་དུ་མཁས་པ་རྣམས་ལ་ཚད་མཐོན་པོའི་གདེང་འཇོག་དང་བསྔགས་བརྗོད་ཞུ་སྲོལ་ཞིག་ཀྱང་རེད། རྒན་ཁྲིན་ལགས་ནི་མཁས་པའི་གོ་འཕང་བརྙེས་ཀྱང་ཁེངས་སྐྱུང་ལྡན་པ་ཞིག་ཡིན་པས། གཞན་གྱིས་བཅར་འདྲི་ཞུ་དུས་ཁོང་གིས་གསུངས་དོན།“ལོ་རྒྱུས་ཡུན་རིང་ལྡན་པའི་བོད་ཀྱི་རིག་གནས་ཀྱི་ཞིབ་འཇུག་གི་ཁྱབ་ཁོངས་ཧ་ཅང་ཡངས་པས། ང་ལྟ་བུའི་མི་རིགས་གཞན་པའི་བོད་རིག་པའི་ཞིབ་འཇུག་པ་ཞིག་ལ་མཚོན་ན། ཐོག་མཐའ་བར་གསུམ་དུ་བོད་ཀྱི་རིག་གཞུང་ལ་སློབ་སྦྱོང་བྱེད་ཞོར་དང་དཔྱད་བསྡུར་བྱེད་ཞོར་གྱི་བརྒྱུད་རིམ་ཁྲོད་ན་གནས། ཡིག་ཆ་གསར་པ་རེ་རག་ན་རང་གིས་བསམ་གཞིག་བྱས་པ་བརྒྱུད་སྔོན་རབས་པ་རྣམས་ཀྱིས་མ་གླེངས་པའམ་དཔྱད་པ་གང་ལེགས་མ་བྱུང་བའི་ལྟ་བ་གསར་པ་ཁ་ཤས་ཀྱང་འཐོན་སྲིད་མོད། རང་ཉིད་ཀྱི་ལྟ་བ་དང་བསྡོམས་ཚིག་ཡང་དག་ཡིན་མིན་དང་མཐའ་འཁྱོལ་མིན་ཐད། ད་དུང་ཐོག་མཐའ་བར་གསུམ་དུ་ཁེངས་སྐྱུང་དང་གཟབ་ནན་གྱི་རྣམ་འགྱུར་ཞིག་འཛིན་དགོས་སྙམ།” འདི་ནི་ཞིབ་འཇུག་པ་ཞིག་གི་ལྷད་མེད་ཀྱི་རང་གཤིས་ཡིན་ལ། རྒན་ཁྲིན་ལགས་ཀྱི་རིག་གཞུང་ཞིབ་འཇུག་ཐད་ཀྱི་རྣམ་འགྱུར་དང་བསམ་བློའི་གོ་འཕང་ཚད་ངེས་ཅན་ཞིག་ཏུ་སོན་ཡོད་པའང་མཚོན། དེ་ནི་ས་སྐྱ་ལེགས་བཤད་ལས།“བླུན་པོའི་ཡོན་ཏན་ཁར་འབྱིན་ཏེ། ། མཁས་པའི་ཡོན་ཏན་ཁོང་དུ་སྦེད། ། སོག་མ་ཆུ་ཡི་སྟེང་དུ་འཕྱོ། ། ནོར་བུ་སྟེང་དུ་བཞག་ཀྱང་འབྱིང་། ། ཞེས་གསུངས་པ་ལྟར་རོ། ། ཁོང་གི་ཁེངས་སྐྱུང་གི་མི་གཤིས་དང་། བླ་མེད་ཀྱི་ཀུན་སྤྱོད། ཁེ་གྲགས་ལ་མི་དམིགས་པའི་མཛད་པ་ནི་རིག་གཞུང་ཞིབ་འཇུག་པ་རྣམས་ཀྱི་མིག་དཔེར་གྱུར་ཡོད་དོ།།
གོང་དུ་ཞུས་པ་ནི་རང་ཉིད་ཀྱིས་དུས་ཡུན་རིང་པོར་རྒན་ཁྲིན་ལགས་ཀྱི་སློབ་སྟོན་འོག་རིག་གཞུང་ཞིབ་འཇུག་བྱས་པའི་གོ་རིམ་ཁྲོད་ཀྱི་ཕྱིར་དྲན་དང་མྱོང་ཚོར་ཙམ་ལགས་ཤིང་། ད་ལྟ་ངང་འཇམ་ཞི་དུལ་གྱི་སྐྱེས་མཆོག་འདི་ཉིད་ང་ཚོ་དང་གཏན་དུ་གྱེས་སོང་། ཁོང་གི་སྐུ་ཚེ་ཧྲིལ་པོ་བོད་རིག་པའི་བྱ་གཞག་ཐད་ཕུལ་ཡོད་པས། ང་ཚོ་རྗེས་རབས་པ་རྣམས་ཀྱིས་ཁོང་གི་གསུང་རྩོམ་ཀློག་པ་དང་། ཁོང་གི་སྐུ་ཡོན་མཐོང་བའི་ཐོག་ནས་ཁོང་གི་ཐུགས་སྟོབས་ལ་བསྔགས་བརྗོད་བྱེད་འོས། དམ་པ་གང་གིས་རིག་གཞུང་ཉམས་ཞིབ་ཐད་གཟབ་ནན་གྱིས་འཇུག་པའི་ཕྱག་ལས་གནང་སྟངས་དང་། བླ་ན་མེད་པའི་སྤྱོད་བཟང་། ཁྱད་དུ་འཕགས་པའི་མཛད་རྗེས་བཅས་མི་རབས་ནས་མི་རབས་སུ་མི་ཉམས་པར་གྱུར་ཅིག།
ཡོང་ཁུངས། ཀྲུང་གོའི་བོད་ལྗོངས་དྲ་བ།
རྩོམ་པ་པོ། རིན་ཆེན་སྒྲོལ་མ་དང་ཀླུ་མོ་མཚོ།
ཡིག་སྒྱུར་བ། ཀླུ་མོ་མཚོ།
版权所有 中国藏学研究中心。 保留所有权利。 京ICP备06045333号-1
京公网安备 11010502035580号
