མཁས་དབང་དགེ་འདུན་ཆོས་འཕེལ་གྱི་ཟབ་མོ་དབུ་མའི་ལྟ་བ་ལ་རགས་ཙམ་དཔྱད་པ།


རྩོམ་པ་པོ།   ཨ་སྔགས་ཚེ་རིང་བཀྲ་ཤིས།
 
སྤེལ་དུས།    2012-07-05    ཀློག་གྲངས།1699 ཆེ། འབྲིང་། ཆུང་།
       ཐེག་མཆོག་དབུ་མ་ཐལ་འགྱུར་བའི་ལུགས་ཀྱི་གཞི་ལམ་འབྲས་བུའི་རྣམ་གཞག་གི་གནད་རྣམས་བོད་གངས་ཅན་གྱི་ལྗོངས་འདིར་མཁས་དབང་རིམ་བྱོན་རྣམས་ཀྱི་བཞེད་སྲོལ་ལ་སྣང་ཕྱོགས་དང་སྟོང་ཕྱོགས་རྩལ་འདོན་མཛད་ཚུལ་མི་འདྲ་བའི་དབང་གིས་བོད་སྔ་རབས་པའི་ལྟ་བ་དང་ཕྱིས་བྱོན་རྗེ་བློ་བཟང་གྲགས་པའི་དཔལ་གྱི་ལུགས་འཛིན་པའི་ལྟ་བ་ཞེས་བཞེད་ལུགས་གཉིས་བྱུང་།   དེ་ཡང་མཁས་དབང་དགེ་འདུན་ཆོས་འཕེལ་ནི་སྤྱིར་ངྷི་ཚ་དང་།   བླ་བྲང་བཀྲ་ཤིས་འཁྱིལ།   འབྲས་སྤུངས་བཅས་དགེ་ལྡན་ཕྱོགས་ཀྱི་གྲྭ་ས་རིམ་གྱིས་འགྲིམས་ཏེ་གཞུང་ཆེན་པོད་ལྔར་ཐོས་བསམ་གྱི་ཕ་མཐར་སོན་ཞིང་གཞི་དེ་ལས་མཁས་པའི་ཆོ་ལོ་བརྙེས་པ་ལགས་པས་རྗེ་རིན་པོ་ཆེའི་རྒྱུད་འཛིན་པ་དང་དངོས་སུ་གྲུབ་མོད།   འོན་ཏེ་ཁོང་ཉིད་ནི་དཔྱད་མེད་ལྟ་གྲུབ་སྲུང་བའི་ལ་རྒྱ་ལ་ཐུགས་ཡེ་ནས་མི་དགྱེས་ཤིང་།   ཟབ་མོ་དབུ་མའི་ཟབ་གནད་སྙིང་པོར་དྲིལ་བའི་ལེགས་བཤད་ཀླུ་སྒྲུབ་དགོངས་རྒྱན་ནང་དུ་སྔ་ཕྱི་གཉིས་ལས་བོད་སྔ་རབས་པའི་མཁས་དབང་དག་གི་བཞེད་དགོངས་ཁ་ཤས་རང་གི་གཟུང་གནས་རིག་པའི་སྲང་དུ་གཞལ་ཏེ་འཐད་ཕྱོགས་སུ་སྒྲུབ་པ་དང་།   ཆབས་ཅིག་ཏུ་རྗེ་རིན་པོ་ཆེའི་ལུགས་འཛིན་ཕྱིས་བྱོན་མཁས་དབང་རེ་ཟུང་རྗེའི་དགོངས་པ་ཇི་བཞིན་དུ་མ་ལོན་པར་མཐོང་ནས་དངོས་ཤུགས་གཉིས་ནས་ཟུར་ཟའི་ཚུལ་གྱིས་དོགས་སློང་མང་པོ་བྱས་པས།   གངས་ཅན་ན་མངོན་པར་མཐོ་བའི་དགའ་ལྡན་ལུགས་འཛིན་གྱི་མཁས་དང་མཁས་མིན་ཇི་སྙེད་ནས་དེང་གི་བར་དགག་པ་གཏོང་སའི་འབེན་དུ་གྱུར།   དེ་ཡང་དགེ་འདུན་ཆོས་འཕེལ་འཚོ་བཞེས་དུས་སུ་ཁོང་གིས་ཅུང་མངོན་པའི་ང་རྒྱལ་ཚུལ་གྱིས།   རྗེས་སུ་འདི་ལ་རྩོད་པ་ཡོང་།   ང་རང་ཤི་མ་ཚར་བར་དུ་རྩོད་པ་མི་ཡོང་།   བྱུང་ན་ཨའུ་ཙི་ཞེས་སློབ་བུ་ཟླ་བཟང་ལ་གསུངས་པ་བཞིན་སྐུ་མ་གཤེགས་བར་དུ་རྩོད་པ་ཕུལ་མཁན་ཞིག་མ་བྱུང་ལ།   སྐུ་གཤེགས་རྗེས་ཏཱ་ལའི་བླ་མའི་ཡོངས་འཛིན་རྣམ་གཉིས་ནས་ནན་གྱིས་སྐུལ་མཛད་པ་ལྟར།   སྐབས་དེའི་ལྷ་ལྡན་དག་པའི་ཞིང་གི་བསྟན་པའི་རྩ་ལག་གཅིག་པུ་དགེ་འདུན་ཆོས་འཕེལ་རང་དང་ཕ་ཡུལ་གཅིག་ཅིང་རང་གི་དགེ་རྒན་དགེ་བཤེས་ཤེས་རབ་རྒྱ་མཚོ་ནས་ངེས་དོན་མཚན་ཉིད་པའི་སྲོལ་ལུགས་ལྟར་ཐལ་འཕྲེང་སྡུག་གུར་བཀོད་པའི་དགག་ལན་མི་འཇིགས་སེང་གེའི་ང་རོ་བརྩམས་ནས་དགེ་འདུན་ཆོས་འཕེལ་གྱི་ཀླུ་སྒྲུབ་དགོངས་རྒྱན་ནི་སྔ་ཕྱི་གང་དུའང་མི་གཏོགས་པའི་ལོག་རྩོམ་ཞིག་ཏུ་ངོས་འཛིན་མཛད།   དེ་ཡང་དགེ་འདུན་ཆོས་འཕེལ་གྱི་ཀླུ་སྒྲུབ་དགོངས་རྒྱན་ནམ་གང་དེའི་ལྟ་དགོངས་ཕྱོགས་སྔར་བྱས་ནས་དགག་ཡིག་མཛད་པ་ཁ་ཤས་ཡོད་ལ།   དེ་བཞན་རྙིང་ཕྱོགས་སོགས་ཀྱི་མཁས་པ་རེ་ཟུང་ནས་ཀྱང་དགེ་འདུན་ཆོས་འཕེལ་གྱི་ལྟ་བ་ཕྱོགས་སྐྱོར་ཚུལ་དུ་རྩོད་ལན་མཛད་པའང་ཡོད།   ཕལ་མོ་ཆེ་རང་གི་ལུགས་ལ་ཞེན་ཏེ་རང་ལུགས་ཀྱི་རྣམ་གཞག་བསྐྱར་བཤད་ཙམ་ལས་དངོས་སྟོབས་རིགས་པའི་རྩལ་ཁྱད་པར་བ་བཏོན་ཏེ་དགེ་ཆོས་ཀྱི་ཀླུ་སྒྲུབ་དགོངས་རྒྱན་ལྟར་གཟུར་གནས་ཀུན་གྱི་ཡིད་དབང་འགུགས་པ་ཞིག་ཉིན་མོའི་སྐར་མ་ཙམ་དུ་ཟད།   གང་ལྟར་དགེ་འདུན་ཆོས་འཕེལ་དང་ཁོང་གི་གསུང་ཆོས་ནི་རིགས་སྨྲ་ཀུན་གྱི་ལྷག་ཏུ་དོ་སྣང་བྱེད་སར་གྱུར་རོ།། དགེ་འདུན་ཆོས་འཕེལ་གྱི་སློབ་བུ་གྲས་ཀྱི་གསར་ཕྱོགས་སུ་སོང་བ་རྣམས་ནས་དགོངས་གཞི་དགོས་པའི་དབང་གིས་ཀླུ་སྒྲུབ་དགོངས་རྒྱན་ནི་ཁོང་གི་གསུང་ཆོས་དངོས་མིན་པར་བསྒྲུབས་ཏེ་དགེ་འདུན་ཆོས་འཕེལ་ལ་དཀར་ཆ་འདོན་ཁུལ་བྱེད་པའང་ཡོད་དེ།   ཀ་ར་སྤྲུལ་སྐུ་ནས་དགེ་ཆོས་རྣམ་ཐར་དུ།   མཁས་དབང་ཟླ་བ་བཟང་པོས་ཀླུ་སྒྲུབ་དགོངས་རྒྱན་ཞེས་པའི་བསྟན་བཅོས་ཤིག་བརྩམས་ནས།   དེའི་རྐྱེན་གྱིས་འུར་འགྲོགས་དང་ཆོས་སྤོང་གི་བུ་ལོན་ལ་སྐྱེད་འཕེལ་པོ་ཞིག་བྱུང་ཞེས་དང་།   ཀླུ་སྒྲུབ་དགོངས་རྒྱན་སྦྱོར་དངོས་རྗེས་གསུམ་དང་བཅས་པ་ནི་ཟླ་བ་བཟང་པོ་རང་ཉིད་ཀྱིས་བརྩམས་མོད་ཀྱང་།   སྐབས་དེར་རང་རེའི་བླ་དགེ་མང་པོའི་ཐུགས་ལ།   ཀླུ་སྒྲུབ་དགོངས་རྒྱན་ཆ་ཚང་དགེ་ཆོས་རིན་པོ་ཆེས་རྕོམ་པར་དགོངས་ནས་འུར་རབ་ཏུ་འུར།   འབར་རབ་ཏུ་འབར།   འཁྲུགས་རབ་ཏུ་འཁྲུགས་པའི་ཚུལ་བཞེས་ཀྱིས་རྩོད་པའི་འཁོར་ལོ་སྐོར་བར་བཞེད་སྐབས།   ཞེས་སོགས་དགེ་ཆོས་ཀྱི་རྩོམ་དངོས་མིན་ཚུལ།   ཟླ་བཟང་གིས་དེ་འདྲའི་འཆལ་གཏམ་ལབ་པ་དགེ་ཆོས་ཐུགས་མ་དགྱེས་ནས་བཀའ་བཀྱོན་གནང་ཚུལ།   དགེ་ཆོས་གཤེགས་པའི་རྗེས་ནས་ད་གཟོད་རྩོམ་མངོན་འགྱུར་དུ་ཕུད་ཚུལ་བྲིས་ཞིང་།   ཧོར་ཁང་བསོད་ནམས་དཔལ་འབར་ནས་དགེ་ཆོས་གསུང་རྩོམ་ཕྱོགས་བསྒྲིགས་ཀྱི་གླེང་གཞིར་ང་རང་གི་ལྟ་ཚུལ་བྱས་ན་མཁས་དབང་ཉིད་ཀྱི་བཞེད་ཚིག་གཙང་མ་ཞིག་ཡིན་མིན་མ་ཤེས་ཀྱང་གཞན་འདོད་ལ་བློ་སྒོ་ཕྱེ་བའི་དོགས་འདྲི་མཛད་པ་ཞིག་ནི་ཡིན་པ་གོར་མ་ཆག་པས་ཞེས་བྲིས་ཏེ་དགེ་ཆོས་ཀྱི་གསུང་དངོས་མིན་པར་བརྗོད།   དེ་ལྟར་ཡིན་ན་ཡང་ཀླུ་སྒྲུབ་དགོངས་རྒྱན་ལ་ཞིབ་མོར་བལྟས་ན་ཕྲ་ཞིབ་རིགས་པའི་འགྲོས་ཀྱིས་ཟབ་མོ་རྟོགས་དཀའ་བའི་གནད་རྣམས་གོ་སླ་བར་བཏང་སྟེ་བརྫོད་པ་སྤྱི་དང་།   སྒོས་སུ་ཚིག་གི་སྡེབ་སྒྲིག།   དོན་གྱི་གོ་བ།   ཁྱད་པར་དུ་དབུའི་མཆོད་བརྗོད་དང་ཐ་སྙད་ཚད་གྲུབ་འཇོག་ལ་བློ་མ་བདེ་ཞེས་སོགས་པར་སྐབས་ཀྱི་ཚིགས་སུ་བཅད་པ་ཤོ་ལོ་ཀ་ཉེར་གཉིས་ལས་དགེ་ཆོས་ཀྱི་གོ་སླ་བརྗོད་བདེ་དོན་འདུས་སྙན་འཇེབས་ཀྱི་རྩོམ་གཤིས་ལྷང་ངེར་གསལ་བས་དགེ་ཆོས་ཀྱི་རྩོམ་ལ་ཆ་རྒྱུས་ཅུང་ཟད་ཡོད་པ་རྣམས་ནས་སོམ་ཉིའི་རྒྱ་རུ་མི་ཚུད་ཐག་གིས་ཆོད་མོད།   འོན་ཏེ་ཞིབ་མོ་འབྱེད་དགོས་པ་ཞིག་ནི་ཀླུ་སྒྲུབ་དགོངས་རྒྱན་གྱི་དབུ་ནས་་སྙད་ཚད་གྲུབ་འཇོག་ལ་བློ་མ་བདེ་ཞེས་པའི་སི་ཁྲོན་པར་མ་ལྡེབ་༡༣༥ནས་ལྡེབ་༡༥༧ནི་དགེ་ཆོས་རང་གི་ཕྱག་སོར་ལས་བྱུང་ཞིང་དེའི་འཕྲོས་མ་རྣམས་ནི་དགེ་ཆོས་ཀྱི་གསུང་ལྟར་ཟླ་བ་བཟང་པོས་ཟིན་བྲིས་སུ་ཕབ་པར་གྲགས་ལ།   དེ་ལྟར་ཀྱང་ཡིན་ངེས་སྙམ་སྟེ།   སྔ་མ་ནི་འབྲེལ་མཚམས་དམ་ལ་རྒྱུད་རིམ་ལྡན་པས་གཞུང་ལུགས་ཀྱི་རང་བཞིན་མངོན་པར་གསལ་མོད།   འཕྲོས་མ་ནི་དུམ་བུ་ལྟར་ཟིན་བྲིས་བཏབ་པའི་བཟོ་དང་།   ནང་དོན་གྱི་ཆ་ནས་བསྐྱར་བཟླས་ཀྱི་བསླད་ཡོད་པས་སྔ་མ་ལྟར་དག་ཅིང་གཙང་ལ་གཤར་སེར་བརྗོད་པའི་ཁྱད་ཆོས་དབེན།   ཚུལ་འདི་མི་རྒན་ཤེར་རྒྱམ་གྱིས་དགེ་ཆོས་རྣམ་ཐར་དུ།   རང་རེའི་རྣམས་ཀྱིས་ཡིན་མིན་ཐག་བཅད་པ་ཐམས་ཅད་ཅེས་པ་ནས།   ཚུལ་འདི་མི་རྒན་ཤེར་རྒྱམ་གྱིས་དགེ་ཆོས་རྣམ་ཐར་དུ།   རང་རེའི་རྣམས་ཀྱིས་ཡིན་མིན་ཐག་བཅད་པ་ཐམས་ཅད་ཅེས་པ་ནས།   ཐ་སྙད་ཚད་གྲུབ་འཇོག་ལ་བློ་མ་བདེ་ཞེས་པའི་ཚིགས་བཅད་བར་བྲིས་འདུག་པ་ཞེས་པ་དེ་གནང་ནས་འདི་ལ་ལྟོས་གཉིད་འགོག་པ་ཡིན་གསུང་ནས་གནང་བྱུང་བ་ཤིན་ཏུ་ཕན་པོ་བྱུང་།   དེ་ཉིད་དཔེ་བཤུས་ནས་སྨིན་གླིང་མཁན་ཆེན་རིན་པོ་ཆེར་བསྐུར་བས་ཐུགས་ཤིན་ཏུ་དགྱེས་ནས་ཕྱག་བྲིས་ནང་ཐུགས་རྗེ་ཆེ་སོགས་དང་།   དེ་ནས་ཟླ་བཟང་ལ་དབུ་མ་བཤད་ཁྲིད་མཛད་སྐབས།   སྔར་ཁོ་བོ་ལ་གནང་བའི་དེབ་ཆུང་དེའི་འཕྲོས་ནས་ཟིན་བྲིས་འབྲི་བཅུག་སོང་སོགས་བྲིས་འདུག་པ་དེས་ཀྱང་དགེ་འདུན་ཆོས་འཕེལ་ཀྱི་གསུང་དངོས་ཡིན་པ་ར་སྤྲོད་བྱེད་ཐུབ་བོ།། 

ཟབ་མོ་དབུ་མ་ཐལ་འགྱུར་པའི་ལུགས་ཀྱི་དཀའ་གནད་སྟོན་པ་ལ་སྔོན་བྱོན་མཁས་དབང་ཕལ་མོ་ཆེས་དབུ་ཚད་སྟག་སེང་འཇིང་བསྣོལ་ཞེས་བརྗོད་པ་ལྟར་ཐལ་སྦྱོར་ལ་བརྟེན་ནས་ལྟ་བའི་འཛིན་མཚམས་སོགས་ཕྲ་ཞིབ་ཀྱི་གནད་རྣམས་རྒྱུ་མ་ཕུ་དེད་ཀྱི་ཚུལ་དུ་སྤྲོས་པ་ལགས་པས།   རྩོད་གྲྭར་འགྲིམས་པའི་སྐལ་བ་མི་ལྡན་པ་རྣམས་ཚུལ་འདིའི་རོ་བཅུད་ཇི་བཞིན་མྱོང་བའི་སྐལ་བའང་དབེན་མོད།   དགེ་འདུན་ཆོས་འཕེལ་ནས་སྔ་སྲོལ་དེ་ཉིད་ལས་འགོངས་ཏེ་ཀླུ་སྒྲུབ་དགོངས་རྒྱན་དུ་ཐལ་ཕྲེང་སྣ་གཅིག་ཀྱང་མེད་པའི་སྒོ་ནས་ཟབ་མོ་དབུ་མའི་སྙིང་པོའམ་དཀའ་གནད་གོ་བ་ཆུ་ཐུབ་ཀྱི་རིགས་པ་ལ་བརྟེན་ཏེ།   འཛམ་གླིང་མཚན་ཉིད་རིག་པའི་སྤྱི་འགྲོས་ལྟར་ལྷུག་པར་བརྗོད་པས།   གངས་ཅན་བོད་ཀྱི་མཚན་ཉིད་རིག་པའི་གཞུང་ལུགས་ཀྱི་ལྡུམ་རར་སྔོན་མེད་རྩོམ་ལུས་ལེགས་པོ་འདི་ཀོ་གསར་དུ་དྲངས་པ་ཡིན།

གཅིག   སྤྱི་བརྗོད། 

དེ་ཡང་ཟབ་མོ་དབུ་མའི་སྲོལ་འབྱེད་འཕགས་པ་ཀླུ་སྒྲུབ་ཀྱི་དབུ་མ་རྩ་ཤེར་སོགས་བསྟན་པ་སྔ་དར་གྱི་སྐབས་སུ་ལོ་ཙཱ་བ་སྐ་ཅོག་ཞང་གསུམ་གྱིས་ཐོག་མར་བོད་དུ་དྲངས་ནས་འཆད་ཉན་སྤེལ་གསུམ་གྱི་དབུ་བརྩམས་ཏེ་དེང་གི་བར་ལོ་པཎ་གསེར་རིའི་ཕྲེང་བ་བྱོན་པ་རྣམས་ནས་ཕྱོགས་འདི་ལ་བྱས་རྗེས་རང་སོ་སོའི་ནུས་པ་ལྟར་ཆེ་ཆུང་སྣ་ཚོགས་བཞག་ཡོད་པ་ནི་ཟབ་མོ་དབུ་མའི་ལུགས་དེ་གངས་ཅན་ལྗོངས་སུ་བྱུང་འཕེལ་གྱི་ལོ་རྒྱུས་ལ་ཕྱིར་མིག་ཅིག་འཕངས་པ་ལས་གསལ་ལེར་ཤེས་ཐུབ།   དེ་དག་ལས་ལོ་ཙཱ་བ་ཆེན་པོ་པཱ་ཚབ་ཉི་མ་གྲགས་པ་ནས་དཔལ་ལྡན་ཟླ་བ་གྲགས་པའི་དབུ་མ་ལ་འཇུག་པ་སོགས་ཐལ་འགྱུར་བའི་གཞུང་ལུགས་བསྒྱུར་ཅིང་ཞུས་ཏེ་གཏན་ལ་ཕབ་རྗེས་འཁོར་སློབ་ཀྱི་རྒྱ་མཚོ་བསྐྱངས་ཤིང་།   ཚིག་ལ་མཁས་པ་དར་ཡོན་ཏན་གྲགས།   དོན་ལ་མཁས་པ་གཙང་པ་ས་སྤོས།   གཉིས་ཀ་ལ་མཁས་པ་རྨ་བྱ་བྱུང་ཡེ།   གཉིས་ཀ་ལ་མི་མཁས་པ་ཞང་ཐང་ཟག་པ་ཞེས་བུ་ཆེན་བཞི་བྱོན་ཏེ་སྙན་པའི་གྲགས་པ་ཕྱོགས་བཅུར་འབར་བ་བྱུང་།   དེ་ནས་སློབ་བརྒྱུད་དེ་དག་ལས་མཆེད་པའི་ཐལ་འགྱུར་བའི་འཆད་ཉན་གྱི་ལུགས་འདྲ་མིན་སྣ་ཚོགས་རྒྱ་མཚོ་ཆེན་པོའི་ཀློང་བརྡོལ་བ་ལྟ་བུ་སྟེ།   རྨ་བྱ་བྱང་བརྩོན་ནས་མཆེད་པའི་སློབ་བརྒྱུད་ལས་བུ་སྟོན་རིན་ཆེན་གྲུབ་དང་རེད་མདའ་བ་གཞོན་ནུ་བློ་གྲོས།   ཡར་འབྲོག་པ་རིན་ཆེན་ཏོག    རྗེ་ཙོང་ཁ་བ་བློ་བཟང་གྲགས་པ་སོགས་བྱོན་ཞིང་།   ཞང་ཐང་ཟག་པ་ལས་རོང་སྟོན་ཤེས་བྱ་ཀུན་ཁྱབ་དང་སྟག་ལོ་ཤེས་རབ་རིན་ཆེན།   གསེར་མདོག་པཎ་ཆེན་ཤཱཀྱ་མཆོག་ལྡན།   གོོ་རམས་བསོད་ནམས་སེང་གེ་སོགས་ཟབ་མོ་དབུ་མ་ལས་ཐལ་འགྱུར་ལུགས་བཟང་འཆད་ཉན་སྤེལ་གསུམ་ལ་བྱས་རྗེས་བླ་ལྷག་བཞག་པའི་མཁས་པ་ཚབ་མཚོན་རང་བཞིན་ཅན་དེ་རྣམས་བྱོན་པས།   གངས་ཅན་གྱི་ས་དགེ་བཀའ་རྙིང་སོགས་གྲུབ་མཐའ་རིས་མེད་ཀྱིས་ལྟ་སྤྱོད་གཉིས་ལས་ལྟ་བ་ནི་རྨད་དུ་བྱུང་བ་དཔལ་འཕགས་པ་ཀླུ་ཡི་དབང་པོ་ཁོངས་སུ་བཅོལ་བ་འདི་ཀོ་བྱུང་།   ཟབ་མོ་དབུ་མ་འཆད་སྤེལ་གྱི་ཁྲོད་མཁས་པ་སོ་སོ་ནས་གདུལ་བྱའི་བློ་ཡི་ཁྱད་པར་ལ་བསྟུན།   དོན་གྱི་གནད་ཁྲོལ་བ་ལ་རྩལ་འདོན་ལུགས་མི་འདྲ་བའི་དབང་གིས་ཐ་སྙད་ཀྱི་ཞལ་བཞེས་ཅུང་ཟད་མི་འདྲ་བ་བྱུང་མོད།   མཐར་ཐུག་གི་དགོངས་པ་དབུ་མ་ཆེན་པོ་སྤྲོས་བྲལ་མཉམ་པ་ཉིད་དུ་དབྱེ་བསྲི་མེད་པར་གཅིག་ཏུ་གཞོལ་ཞིང་འབབ་པའོ།། 

དེ་ཡང་ཐ་སྙད་ཀྱི་ཞལ་བཞེས་མི་འདྲ་བའི་དབང་གིས་སྔོན་བྱོན་མཁས་པའི་ཁྲོད་དུ་རོང་སྟོན་སྟག་ལོ་གོ་ཤཱཀ་སོགས་སྔ་རབས་ལུགས་འཛིན་གྱིས་རྗེ་བློ་བཟང་གྲགས་པའི་ཕྱོགས་འདིའི་ལྟ་གྲུབ་ལ་སྐྱོན་བརྗོད་མང་དུ་མཛད་ཅིང་།   རྗེའི་སློབ་བརྒྱུད་ལས་མཁས་གྲུབ་རྗེ་དང་སེ་ར་རྗེ་བཙུན།   པཎ་ཆེན་བདེ་ལེགས་ཉི་མ།   འཇམ་དབྱངས་དགའ་བློ།   པཎ་ཆེན་བློ་བཟང་ཆོས་རྒྱན།   འཇམ་དབྱངས་བཞད་པའི་རྡོ་རྗེ་སོགས་ནས་བརྒལ་ལན་རྒྱ་ཆེན་མཛད་དེ་རྗེའི་ལྟ་གྲུབ་སྲུང་འཛིན་བྱས།   སྔ་ཕྱི་ཕྱོགས་གཉིས་ནས་ཀྱང་རང་རང་ལ་རྒྱབ་རྟེན་གྱི་ལུང་དང་དགོངས་པའི་བབ།   རིགས་པའི་འགྲོས་ཁྱད་པར་བ་རེ་ཡོད་པས་ན།   རང་ལུགས་ཀྱི་དར་ཆ་བསྒྲེངས་ཏེ།   བརྒལ་ལན་དག་ཏུ་ཚིག་གི་ཤགས་འདྲ་མིན་གྱིས་བསྡོས་ཏེ་གཞན་ལུགས་ཚར་གཅོད་པའི་བཟོ་སྟབས་བསྟན་ཅིང་དོན་དུ་རང་སྡེའི་ལ་རྒྱ་སྲུང་བ་ཙམ་ལས་ཅིག་ཤོས་ཚར་བཅད་དེ་ལྟ་བ་རྨེག་མེད་དུ་གཏོང་བ་ནི་གཅིག་ཀྱང་མེད།   དེ་ལྟར་ཡང་ཡིན་ངེས་སྙམ་སྟེ།   ཟབ་མོ་དབུ་མ་ལྟ་བུ་འགྲོ་བ་མིའི་རིགས་ཀྱི་ཤེས་རིག་གླིང་དུ་ཚད་ཆེས་མཐོ་ཤོས་སུ་སླེབས་པའི་མཚན་ཉིད་རིག་པ་ལྟ་ཅི།   བརྡ་སྤྲོད་རིག་པ་ལྟ་བུ་རྨང་གཞིར་གྱུར་པའི་ཤེས་བྱ་ཐད་ཀྱི་ངོས་འཛིན་མི་འདྲ་བའི་ཆ་ནས་བྱུང་བའི་མཁས་པའི་བར་གྱི་རྩོད་པ་ཙམ་ཡང་རང་རང་གི་ལུགས་འཛིན་པ་ཙམ་ལས།   གཅིག་གིས་གཅིག་ཚར་གཅོད་ཐུབ་པའི་ལོ་རྒྱུས་ཤིག་ད་བར་བོད་ན་འཆད་དུ་མེད་པའི་ཕྱིར་རོ།།    ཚུལ་འདི་ལ་དགེ་ཆོས་ཀྱིས།   རང་སོ་སོའི་རྗེས་འབྲང་དག་གིས་རྒྱུ་མཚན་མེད་པར་དད་པས་ཡིད་ཆེས་ན་ནི་དེར་ཟད་ཀྱི་ཕན་ཚུན་བསྡུས་ཏེ་འདི་གཉིས་རྩོད་ཚེ།   གཅིག་གིས་གཅིག་ནམ་ཡང་སུན་ཕྱུང་མི་ནུས་པས་ཕན་ཚུན་ཁྲོ་ཞིང་ཚིག་རྩུབ་སྨྲ་བ་ཙམ་གྱི་མཐའ་ཅན་དུ་མཐའ་ཅན་དུ་འགྱུར་རོ་ཞེས་གསུངས་པ་ལྟར་རོ།།    

སྤྱིར་སྟོང་ཉིད་སྨྲ་བའི་ཁྱུ་མཆོག་ཙོང་ཁ་བ་ཞེས་གངས་ལྗོངས་གྲུབ་མཐའ་རིས་མེད་ཀྱི་ཤེས་ནས་སྨྲ་བ་ཀུན་གྱིས་མགྲིན་གཅིག་ཏུ་བརྗོད་ལ།   དོན་དུའང་དེ་ལྟར་ཡིན་ངེས་ཏེ།   རྗེ་བདག་ཉིད་ཆེན་པོ་འདི་པའི་ལྟ་གྲུབ་ནི་ཆོས་རྗེ་དོན་གྲུབ་རིན་ཆེན།   རྗེ་བཙུན་རེད་མདའ་བ།   བླ་མ་དབུ་མ་པ།   ལྷོ་བྲག་ནམ་མཁའ་རྒྱལ་མཚན།   སྐྱབས་ཆེན་ལོ་ཆེན་དཔལ་བཟང་སོགས་སྐབས་དེའི་ཡུལ་གངས་ཅན་གྱི་གྲུབ་མཐའ་རིས་མེད་ཀྱི་གཞུང་ལུགས་རབ་འབྱམས་སྨྲ་བ་སྔ་གཞུག་བཞི་བཅུ་ཉེ་བ་གུས་པས་རྩེ་གཅིག་ཏུ་བསྟེན་ཏེ་བྱུང་བ་ལགས་པས།   དེ་སྔོན་གྲུབ་མཐའ་རིས་མེད་ཀྱི་ལེགས་པའི་སྙིང་བཅུད་འདུས་ཡོད་པ་སྨོས་མེད་ཡིན་སྟབས་གངས་ཅན་ན་མངོན་པར་མཐོ་ཡིན་མོད།   འོན་ཏེ་གདུལ་བྱ་བློ་ཡི་མོས་པ་སྣ་ཚོགས་ལ་གང་ལ་གང་འཚམས་དེ་བསྟུན་གྱི་ཚུལ་དུ་སོང་བས་གྲུབ་མཐའ་གཞན་དག་ཀྱང་རང་སོ་སོའི་ཐུན་མིན་གྱི་ཁྱད་ཆོས་རེ་ཡོད་པས་མཐའ་གཅིག་ཏུ་འདི་ནི་མཆོག་དང་འདི་ནི་དམན་ནོ་ཞེས་པའི་ཤན་འབྱེད་དུ་མེད་ལ་གཅིག་ཚབ་གཅིག་གིས་ཀྱང་བྱེད་ག་ལ་ཐུབ་སྙམ་མོ།།    གལ་སྲིད་ཕན་ཚུན་རིགས་པའི་འགྲོ་གླེང་བྱེང་དུས་གྲུབ་མཐའི་ལ་རྒྱའི་ཤན་ངན་མི་ཞུགས་ལ།   མཐའ་གཅིག་ཏུ་རང་ལྟ་མཆོག་འཛིན་གྱིས་གཞན་ཕྱོགས་ལ་ལྟ་ངན་ལོག་ཆོས་སོགས་ཀྱི་ཚིག་གིས་དམོད་པར་མི་བྱེད་པར་ངོ་མཚར་བའི་ལུང་རིགས་ཀྱི་འཕྲུལ་འཁོར་སྐོར་བ་ཞིག་ཡིན་ན།   ཆོས་ལུགས་པ་ཞིག་གི་ངོར་དེ་ནི་རང་བཞིན་གྱི་ཁ་བཏོན་དགེ་སྦྱོར་གང་གིས་ཀྱང་འགྲན་མི་ནུས་པའི་རླབས་ཆེན་གྱི་ཚོགས་བསག་ཡིན་ལ།   རིག་གནས་འཛུགས་སྐྲུན་གྱི་ལས་ལ་གཞོལ་བའི་འཇིག་རྟེན་པའི་ངོར་དེ་ནི་མེ་ཏོག་མཉམ་བཞད།   མཁས་བརྒྱ་འགྲན་གླེང་གི་རྣམ་པ་སྟེ་རིག་གནས་གོང་འཕེལ་དུ་འགྲོ་བཞིན་པའི་དན་རྟགས་རྣལ་མ་ཡིན་ནོ།།

        དེ་བཞིན་སྐབས་སུ་བབ་པ་གླེང་བར་བྱ་བའི་གཞི་དགེ་ཆོས་ཀྱི་ཀླུ་སྒྲུབ་དགོངས་རྒྱན་དུ་ཟབ་མོ་དབུ་མའི་དཀའ་གནད་སྐོར་ཞིག་སྟེ།   ཐ་སྙད་ཚད་གྲུབ་འདོད་མིན།   དབུ་མ་བ་ལ་ཁས་ལེན་ཡོད་མེད།   བདེན་གཉིས་གང་གཞི་གཙོ་བོར་འཛིན་པ་སོགས་ཀྱི་ཐད་ལ་གྲགས་པའི་རྗེས་སུ་མ་འབྲང་པར་རང་གི་དཔྱད་སྟོབས་རིགས་པས་ཕྲ་ཞིང་ཞིབ་པར་འཇུག་པ་བྱས་ཏེ་བོད་སྔ་རབས་དང་ཕྱི་རབས་གང་གི་ལུགས་ལའང་སྔ་རྒོལ་དུ་དམིགས་སུ་མ་བཟུང་པར་དོགས་པ་སློང་བའི་ཚུལ་གྱིས་རང་ལུགས་ཤུགས་ནས་བཞག་སྟེ་བརྗོད་ཅིང་།   ཐ་སྙད་ཚད་མས་གྲུབ་མིན་དང་དབུ་མ་བ་ལ་ཁས་ལེན་ཡོད་མེད་སྐོར་ལ་དངོས་སྟོབས་རིགས་པའི་རྗེས་སུ་འབྲངས་ཏེ་སྔ་རབས་ལུགས་འཛིན་གོོ་རམས་པའི་ལྟ་བ་འཐད་ཕྱོགས་སུ་དམིགས་ཤིང་རྗེ་བློ་བཟང་གྲགས་པའི་ལུགས་འཛིན་གྱི་མཁས་པ་དག་གི་དགོངས་པ་ལ་ཅུང་ཟུར་ཟ་ཚུལ་དུ་སོང་བས་རྗེ་ཤེས་རབ་རྒྱ་མཚོ་ནས་ཀླུ་སྒྲུབ་དགོངས་རྒྱན་ལ་ཆེ་ལོང་དུ་བརྟགས་པ་མི་འཇིགས་སེང་གེའི་ང་རོ་ཞེས་པ་དགག་ཡིག་བརྩམས་ཏེ་སུན་འབྱིན་མཛད།   ལར་མི་འཇིགས་སེང་གེའི་ང་རོ་ལྟ་བུ་བརྒལ་བརྟག་གི་གཞུང་འདི་རྒྱབ་རྫོང་གི་ལུང་དང་།   གོ་བ་ཆུ་ཐུབ་ཀྱི་རིགས་པ་སོགས་ཕྱོགས་གང་ནས་གཞིགས་ཀྱང་རྗེ་རིན་པོ་ཆེའི་ལྟ་གྲུབ་གསལ་ཁ་བཏོན་པའི་གཞུང་བཟང་རིན་ཆེན་དང་པོའི་གཤིས་སུ་སོང་བས་དགེ་ལྡན་ལུགས་བཟང་འཛིན་པའི་སྐྱེས་བུ་ལྟ་ཅི།   གངས་ལྗོངས་རྒྱལ་བསྟན་རིས་མེད་ཀྱི་གཟུར་གནས་མཁས་དབང་རྣམས་ཀྱིས་ཀྱང་ཨེ་མ་ཧོ་ཞེས་བསྟོད་སྤྲིན་ཕུན་བའི་གནས་སུ་སོང་མོད།   འོན་ཏེ་གཞུང་དེ་ཉིད་སྔ་རྒོལ་ལ་ལྟ་ལོག་པ།   ཆད་ལྟ་བ།   སྨྱོན་པ།   འཆལ་བོ་སོགས་ཚིག་གི་དུག་མདའ་མང་པོ་འཕངས་ཤིང་།   ཉག་རོང་རོང་དགུའི་ཕུལ་དུ་བརྗིད་མོད་ཀྱི།།    ལ་ལས་ལས་འབྲས་མེད་པར་སྨྲ་འདི་ནོངས།།    ཟླ་གྲགས་བ་འཇོ་ཀུན་བཟང་ལྷུན་པོ་ཡང་།།    དགེ་མིང་བདུད་འདུན་ཆོས་མིན་འཕེལ་བས་སྨད།།    ཅེས་པ་ལྟ་བུ་རྩོམ་གྱི་ཉམས་ཧ་ཅང་ཆེ་བའི་ཤོ་ལོ་ཀ་མང་པོ་བར་སྐབས་སུ་བཅུག་ཏེ་ངན་དམོད་མང་པོ་བྱས་པ་ནི་ཆོས་ལ་མི་རྟོན་གང་ཟག་ལ་རྟོན་པའི་ཚུལ་གྱིས་དགེ་ཆོས་ཀྱི་ཐུན་མོང་སྣང་ངོའི་བྱ་སྤྱོད་ལ་དམོད་པའི་ཆ་ནས་ཁོང་གི་བརྕམས་ཆོས་ནང་གི་གཟི་འོད་རབ་ཏུ་འཕྲོས་པའི་རྟོག་གེ་རིགས་པའི་འོད་རླབས་དང་རིག་གནས་ལ་དཔྱད་པ་ལྷུར་ལེན་པའི་ཐབས་ལམ་མ་རྨད་དེ་ཉིད་མོག་པོར་བྱས་པ་ནི་ཕྱོགས་གང་ནས་དམིགས་ཀྱང་མི་འོས་པ་ཞིག་ཡིན་ལ།   དེ་བཞིན་ཀླུ་སྒྲུབ་དགོངས་རྒྱན་ལ་དགག་པ་གཏོང་བའི་དེང་གི་གསར་བྱུང་བརྩམས་ཆོས་དག་ཀྱང་སྤྱིར་རྩོད་སྒྲུབ་རིགས་པའི་བརྒལ་བརྟག་ཏུ་སོང་བས་ཚད་མཐོ་དམན་གང་ཡིན་ཡང་རུང་དེ་བསྟུན་གྱི་རིན་ཐང་ཞིག་ཡོད་ངེས་མོད་ཀྱང་།   ཕལ་མོ་ཆེ་རྩོམ་གྱི་འཇུག་པ་ཐོག་མ་ཉིད་ནས་ཕ་རོལ་པོ་ལ་ལྟ་ངན་རྒོལ་ངན་ཞེས་པ་ངན་རྟོག་གིས་དྲངས་པའི་ཚིག་འཆལ་དང་གཞན་ལ་སྤ་བཀོང་བའི་རྫིགས་ཉམས་ཀྱིས་བརྗེད་པར་བྱས་པས་སྔ་རྒོལ་ལྟ་ཅི།   གཟུར་གནས་ཀུན་གྱི་ཡིག་གར་མི་འོང་བར་བྱས་འདུག་པས་དོན་གྱི་རིན་ཐང་དེ་ཉིད་ཀྱང་སྒྲིབ་སོང་བ་ནི་བློ་ཕམ་དགོས་པའི་གནས་གཞི་ལོས་ཡིན་སྙམ།   འདི་ལ་དམིགས་ན་གོོ་རམས་པའི་ལྟ་བའི་ཤན་འབྱེད་ཐེག་མཆོག་གནད་ཀྱི་ཟླ་ཟེར་ནང་དུ།   རྗེ་ཙོང་ཁ་བའི་ལྟ་དགོངས་མི་འཐད་ཚུལ་བརྗོད་སྐབས་ཐོག་མ་ཉིད་དུ་ལེགས་པར་དཔྱོད་པའི་བློ་གྲོས་ཀྱི་གསུང་རབ་ཀྱི་དགོངས་པ་རང་སྟོབས་ཀྱིས་འགྲེལ་ཞིང་སྙིང་རྗེ་དང་སེམས་བསྐྱེད་ལ་སོགས་པའི་ཡོན་ཏན་གྱི་རྒྱན་གྱིས་མཛེས་པ་ཤར་ཙོང་ཁ་བ་བློ་བཟང་གྲགས་པའི་དཔལ་གྱི་ཞལ་སྔ་ནས་ཞེས་ཆེ་བརྗོད་ཀྱི་མཚན་ནས་དྲངས་ཏེ་ལུང་རིགས་ཀྱི་དཔྱད་པར་འཐུག་ཅིང་མཇུག་བསྡུས་སྐབས་ཀྱང་།   རྩོད་འདོད་རྒོལ་བ་ཡོད་ན་ཟླ་བ་ཡི།།    འགྲེལ་ཆེན་གསུམ་པོ་དབང་པོར་བྱས་ནས་ནི།།    རྩོད་པར་བགྱི་ཡི་བདུན་དུ་ལྷགས་པར་གྱིས།།    དེ་ལྟར་མིན་པ་དེང་སང་བྱིས་པ་ཡི།   མགོ་བོ་སྐོར་བའི་ཚིག་གི་ཟེར་ཟློས་ལ།།    ཁོ་བོ་རྩོད་པ་དག་ནི་མི་བགྱིས་སྟེ།   འཇིག་རྟེན་བྱ་བ་སྙིང་པོ་མེད་ཕྱིར་རོ།།    ངན་རྟོག་རླུང་གིས་བློ་གྲོས་མ་དཀྲུགས་པར།   གནས་ལུགས་འཁྲུལ་མེད་ཇི་བཞིན་རྟོགས་འདོད་ན།   ཞེས་པ་སོགས་རིགས་པའི་བགྲོ་གླེང་རྣལ་མ་ལས་ཆགས་སྡང་གི་རང་རྒྱུད་མ་བསླད་པ་ནི་ཇི་འདྲའི་ལེགས་པ་ལ་ཨང་།   དེས་ན།   གཞོན་སྐྱེས་རྣམ་ནས་སྤྱིར་རིགས་པའི་བརྒལ་བརྟག་ནི་རིག་གནས་དར་བའི་གསོས་སུ་དམིགས་ནས་རྗེས་སུ་ཡི་རངས་བྱེད་ཅིང་རང་ཡང་དེ་ལྟ་བུར་ཞུགས་དགོས་མོད།   འོན་ཏང་རང་གི་གྲགས་འདོད་སོགས་ངན་རྟོག་གིས་དྲངས་པའི་གཞུང་ལུགས་ཀྱི་བགྲོ་གླེང་ནི་ནམ་གཞི་མཐུན་སྒྲིལ་གྱི་གཤེད་དུ་འགྱུར་བས་དོགས་ཟོན་བྱེད་དགོས་པའི་གནས་སུ་ཤེས་པར་བྱའོ།། 

གཉིས།   ཐ་སྙད་ཚད་གྲུབ་མི་བཞེད་པའི་སྐོར། 

ཐ་སྙད་ཚད་གྲུབ་མི་བཞེད་པ་ནི་ཀླུ་སྒྲུབ་དགོངས་རྒྱན་གྱི་བརྗོད་སྙིང་གཙོ་བོ་ཡིན་ཏེ།   བསྡུས་ཏེ་བརྗོད་ན།   ཐ་སྙད་ཚད་གྲུབ་ཅེས་པ་ནི་སོ་སོ་གང་སྣང་བ་དེ་ཉིད་རང་ངོར་བསླུ་མེད་བསྙོན་མེད་དུ་གྲུབ་པར་བརྗོད་ལ།   དེ་ཉིད་མི་འདོད་པ་ནི་ཐ་སྙད་དུ་གང་སྣང་བསླུ་མེད་དུ་མྱོང་རུང་།   མྱོང་བ་དེ་ཉིད་བརྟག་ཅིང་དཔྱད་ན་ཚད་གྲུབ་ཏུ་གཅིག་ཀྱང་མེད་པར་ཐམས་ཅད་རྫུན་གྱི་སྟེང་ནས་རྣམ་གཞག་སྣ་ཚོགས་བྱེད་པའོ།   སྤྱོར་ཐ་སྙད་ཚད་གྲུབ་མི་བཞེད་པ་ནི་མཁས་དབང་དགེ་ཆོས་ཀྱི་གསར་བཏོད་ཅིག་མིན་པར་བོད་སྔ་རབས་ལུགས་འཛིན་སྟག་ལོ་སོགས་ནས་དེ་ལྟ་བུའི་ལྟ་བ་བཏོན་ཡོད་དེ།   གྲུབ་མཐའ་ཀུན་ཤེས་ལས།   གང་དག་དཔལ་ལྡན་ཟླ་བའི་རྗེས་འབྲངས་ནས།།    མ་དག་འཁྲུལ་བའི་སྣང་བ་ཚད་གྲུབ་ཏུ།   རིགས་པ་དུ་མ་དཔྱད་ནས་ཁས་ལེན་པ།།    འདི་ལ་འགལ་བའི་ཁུར་ཆེན་འདི་ལྟར་ཡོད།།    ཡུལ་ཀུན་རྫུན་དང་ཡུལ་ཅན་བསླུ་མེད་འགལ།།    ཡུལ་དེར་འཁྲུལ་དང་དེ་ལ་ཚད་མ་འགལ།།    རྗེས་དཔག་ཡོད་དང་བསྒྲུབ་ངག་མེད་པ་འགལ།   མཐུན་སྣང་མེད་དང་ཆོས་ཅན་ཚད་གྲུབ་འགལ།།    ཕྱི་དོན་ཚད་གྲུབ་རྡུལ་ཕྲན་ཆ་བཅས་འགལ།།    ཞེས་རིགས་དྲུག་ཚད་མ་རྡོས་བཅད་ཚད་གྲུབ་འགལ་སོགས་བརྗོད་དེ་ཐ་སྙད་ཚད་གྲུབ་བཞེད་པའི་ལྟ་དགོངས་ལ་འགལ་བའི་ཁུར་ཆེན་བསྟུད་མར་བརྩེགས་པ་དང་།   པཎ་ཆེན་ཤཱཀྱ་མཆོག་ལྡན་དབུ་མ་ལ་འཇུག་པའི་དཀའ་བའི་གནས་འགའ་ཞིག་རྣམ་པར་བཤད་པ་ཀུན་མུད་ཕྲེང་མཛེས་ཞེས་པར།   ཀུན་རྫོབ་བདེན་པ་འཇོག་བྱེད་ཀྱི་ཚད་མར་བཤད་པ་ཇི་སྙེད་པ་དེ་དག་དབུ་མ་པ་རང་གི་ལུགས་འཇོག་པ་ན་ཚད་མར་ཁས་བླང་དུ་མི་རུང་སྟེ།   གལ་ཏེ་རུང་ན་རང་ལུགས་ཀྱི་ཚད་མས་གྲུབ་པའི་དོན་ལ་ཚད་མ་གོ་ཆོད་པོ་གཞན་གྱིས་གནོད་པར་ཐལ་བའི་ཕྱིར་རོ།།    ཇི་སྐད་དུ།   རྣམ་ཀུན་འཇིག་རྟེན་ཚད་མིན་དེའི་ཕྱིར།།    དེ་ཉིད་སྐབས་སུ་འཇིག་རྟེན་གནོད་པ་མེད།།    ཅེས་གསུངས་སོ་ཞེས་དབུ་མ་པ་རང་གི་ལུགས་ལ་ནི་འཇིག་རྟེན་ཀུན་རྫོབ་ཀྱི་བདེན་པ་ལྟ་ཞོགརྣལ་འབྱོར་པའི་ཀུན་རྫོབ་ཙམ་ཡང་ཁས་ལེན་པ་མ་ཡིན་ཏེ།   སྤྲོས་པའི་མཚན་མ་མཐའ་དག་འགོག་པའི་ཕྱིར་ཞེས་ཐལ་འགྱུར་པའི་ལུགས་ལ་ཐ་སྙན་ཚད་གྲུབ་མི་བཞེད་པ་དང་།   ཞེས་དང་།   དེ་བཞིན་གོོ་རམས་པ་ནས་ཀྱང་དབུ་མ་འཇུག་པའི་འགྲེལ་བ་ལྟ་བ་ངན་སེལ་དང་ལྟ་བ་ཤན་འབྱེད་ཅེས་པའི་གཞུང་རྣམས་སུ་ཐལ་འགྱུར་བས་ཐ་སྙད་ཚད་གྲུབ་མི་བཞེད་ཚུལ་བརྗོད་ཡོད།   གསང་སྔགས་སྔ་འགྱུར་བའི་ལུགས་འཛིན་འཇུ་མི་ཕམ་དང་དེའི་སློབ་བརྒྱུད་རྣམས་ཀྱང་ཐ་སྙད་ཚད་གྲུབ་བཞེད་པ་ལ་སྐྱོན་བརྗོད་བྱས་ཡོད་དེ།   ངེས་ཤེས་སྒྲོན་མེ་ལས།   ཀ་བ་ཀ་བས་མི་སྟོང་དང་།།    ཆོས་ཉིད་ཀ་བས་སྟོང་ངོ་ཞེས།   སྟོང་གཞི་བཞག་ནས་གཞན་སྟོང་པ།   ཚིག་དང་དོན་གྱི་གཞན་སྟོང་གཉིས།   ཞེས་ཆོས་ཅན་ཀ་བ་མི་སྟོང་པ་ཆོས་ཉིད་ཀ་བའི་བདེན་གྲུབ་སྟོང་པ་ཞེས་པ་ནི་ཚིག་དང་དོན་གྱི་གཞན་སྟོང་དུ་འགྱུར་འདུག་ཅེས་ཟུར་ཟ་བའི་ཆ་ནས་ཐ་སྙད་ཚད་གྲུབ་མི་བཞེད་པའི་ལུགས་ལ་འཐད་པའི་འདེམ་ཤོག་འཕངས་པ་ལྟ་བུའོ།།    ལུང་རིགས་དཔེ་གསུམ་གྱི་སྒོ་ནས་ཐ་སྙད་ཚད་གྲུབ་རྒྱ་ཆེར་འགོག་མཁན་ནི་དགེ་འདུན་ཆོས་འཕེལ་ཚང་ལགས་ཏེ།   ཀླུ་སྒྲུབ་དགོངས་རྒྱན་དུ།   རང་ཅག་གིས་ཡིན་མིན་ཐག་བཅད་པ་ཐམས་ཅད་ཀྱང་རང་གི་སེམས་ལ་ཇི་ལྟར་ཤར་བ་བཞིན་ཐག་བཅད་པ་ལས།   རྩ་བ་གཞན་ཅི་ཡང་མེད་ཅེས་པ་ནས་ཐ་སྙད་ཚད་གྲུབ་འཇོག་ལ་བློ་མ་བདེ་ཞེས་པའི་བར་དུ་ཐ་སྙད་ཚད་གྲུབ་འདོད་མི་ནུས་ཚུལ་དང་འདོད་ན་སྐྱོན་འབབ་ཚུལ་ལུང་གི་རྒྱབ་རྟེན་ཡོད་ཐོག།   དངོས་སྟོབས་རིག་པ་གཙོ་བོ་བྱས་ཏེ་རྒྱུ་མ་ཕུ་དེད་ཀྱི་ཚུལ་དུ་རྒྱ་ཆེར་སྤྲོས་ཡོད།   རང་ཅག་གིས་གང་ཚད་གྲུབ་ཏུ་ཐག་བཅད་ཚད་ཐམས་ཅད་ཀྱི་རྩ་བ་མཐར་ཐུག་ཞིག་ཏུ་དཔྱད་ཚེ་རང་རང་གི་བློ་ལ་ཚད་མར་བཅོལ་བ་མ་གཏོགས་གཞན་ཅི་ཡང་མི་སྣང་ཚུལ་དེ་རྫིགས་རྫིགས་ཇི་ལྟར་བཤད་ཀྱང་སེང་གེའི་དཔང་པོ་སྟགསྟག་གི་དཔང་པོ་གཡག་དེའི་དཔང་པོ་ལ་ཁྱི།   ཁྱི་ཡི་དཔང་པོ་ལ་བྱི་བ།   བྱི་བའི་དཔང་བོ་ལ་འབུ་བཙུགས་འདུག་པའི་དཔེ་ངོ་མཚར་བ་དག་བཀོད་ནས་ཟབ་རྒྱས་གོ་དཀའ་བའི་དབུ་མའི་དཀའ་གནད་དེ་ཉིད་རང་བཞིན་གྱི་གླེང་མོལ་ལྟར་བརྗོད་པས་ཀུན་གྱིས་འཇུག་བདེ་བ་ལྟར་བྱས་སོ།། དེས་ན་ཀླུ་སྒྲུབ་དགོངས་རྒྱན་གྱི་གཞུང་འདིའི་རྩ་བའི་འཛིན་ས།   རྩ་བ་དེ་ཉིད་གསལ་པོར་བསྟན་པའི་གཞུང་གི་སྒྲིག་གཞི།   གཞི་རྩ་བ་དེ་ལས་གྱེས་པའི་འབྲེལ་ཡོད་ཀྱི་ཆ་ལག་སོགས་དབུ་ནས་ཞབས་སུ་བསྡུ་བའི་དོན་ཐམས་ཅད་ལ་དམིགས་ཏེ་བརྗོད་ན།   སྤྱིར་ཐ་སྙད་ཚད་གྲུབ་མི་བཞེད་མཁན་སྔ་ཐབས་ལུགས་འཛིན་གོ་ཤཱཀ་སྟག་གསུམ་སོགས་ཡོད་མོད་ཀྱང་།   དགེ་འདུན་ཆོས་འཕེལ་ནས་ཚུལ་ལུགས་དེ་ཉིད་སྟབས་བདེའི་རྗེས་ཟློས་བྱས་པ་ཙམ་མིན་པར་རང་གི་ཁྱད་ཆོས་མངོན་པར་ཕྱུག་པས་ན།   ཐ་སྙད་ཚད་གྲུབ་མི་འདོད་པའི་ཐད་ལ་ཚབ་མཚོན་རང་བཞིན་ཅན་གྱི་མི་སྣ་ནི་མཁས་དབང་འདི་པ་བརྩིས་རུས་ལ།   ཕྱོགས་འདི་ཡིས་དགེ་ཆོས་གངས་ཅན་བསམ་བློ་བ་ཆེན་པོ་བཅུ་ཡི་ཡ་གྱལ་དུ་རིགས་སྨྲ་འབྲོང་བུ་སོགས་ཀྱིས་བགྲངས་འདུག་པ་དེའང་རྒྱུ་མཚན་ཅན་དུ་སྣང་ངོ་།།   

དེ་ཡང་བོད་སྔ་རབས་ཀྱི་ལུགས་སུ་སོང་བའི་ཐ་སྙད་ཚད་གྲུབ་མི་བཞེད་པའི་ལྟ་དགོངས་འདི་ཀོ་ཕྱིས་བྱོན་སྟོང་ཉིད་སྨྲ་བའི་ཁྱུ་མཆོག་རྗེ་ཙོང་ཁ་བ་བློ་བཟང་གྲགས་པའི་དཔལ་གྱིས་དགག་བྱ་ཁྱབ་ཆེའི་སྐྱོན་དུ་མཐོང་སྟེ་ལེགས་བཤད་ལྔ་དང་ཁྱད་པར་དུ་བྱང་ཆུབ་ལམ་རིམ་ནང་དུ་བཀག་ཡོད་པ་ལ།།    སྔ་རབས་ལུགས་འཛིན་སྟག་ལོ་ནས་རྗེའི་ལྟ་བ་ལ་འགལ་ཁུར་བཅོ་བརྒྱད་བརྩེགས་པའི་བརྒལ་བརྟག་ཕུལ།   དེ་ལའང་རྗེའི་སློབ་བརྒྱུད་སེ་ར་རྗེ་བཙུན་དང་འཇམ་དབྱངས་དགའ་བློ།   འཇམ་དབྱངས་བཞད་པ་སོགས་ནས་རྗེའི་ལྟ་བ་འཐད་ལྡན་དུ་སྒྲུབ་པའི་ཆ་ནས་གཞན་ལུགས་མ་རྟོགས་ལོག་རྟོགས་ཕྱོགས་རྟོགས་ཀྱི་སྐྱོན་གྱི་ཕུང་པོར་བཏང་ཡོད།   དགེ་ཆོས་ནས་སྔ་རབས་ལུགས་འཛིན་རྣམས་ཀྱི་ལྟ་བ་དང་ལྟ་བ་དེ་ཉིད་གཏན་ལ་འབེབས་པའི་རིགས་པ་ལ་ཡིན་རབ་ཕྱོགས་ཅིང་རྗེའི་སློབ་བརྒྱུད་དུ་གཏོགས་པའི་མཁས་པ་རེ་ཟུང་གིས་རྗེའི་ལྟ་བའི་འཛིན་མཚམས་གོལ་བར་མཐོང་སྟེ་ཟུར་ཟ་དང་དོགས་སློང་ཚུལ་གྱིས་ཐ་སྙད་ཚད་གྲུབ་འདོད་མི་རིགས་ཚུལ་རྩལ་དུ་བཏོན་ཏེ་བརྗོད་ཡོད།   དགེ་འདུན་ཆོས་འཕེལ་གྱི་ཐ་སྙད་ཚད་གྲུབ་མི་བཞེད་པའི་འདོད་ཚུལ་དེ་སྟག་ལོའི་ཚད་མ་མི་འདོད་པ་དང་ཚད་གྲུབ་མི་བཞེད་པ་ལས་གསལ་ཁ་ཆེ་ཞིང་འཇུ་མི་ཕམ་སོགས་སྔ་འགྱུར་ལུགས་འཛིན་པའི་ཚད་མའི་ལྟ་དགོངས་ལས་ཀྱང་ཐལ་ཆེ་བའི་ཚུལ་དུ་སྣང་སྟེ།   སྟག་ཚང་ལོ་ཙཱ་བས།   འོན་ཀྱང་ཐ་སྙད་ཚད་གྲུབ་འདོད་ན་ནི།།    རང་རྒྱུད་འཐད་ཕྱིར་རྒྱ་བོད་མཁས་མང་བཞེད།།    འདི་ཡང་ཀུན་རྫོབ་མ་བཏགས་ཉམས་དགའི་ངོར།།    འཇོག་ཅེས་གསུངས་ཀྱང་རྟོག་གེར་གོམས་ཆེས་པས།།    མཐུན་སྣང་རྟེན་འབྲེལ་བཏགས་བྲལ་མ་ཚང་ན།།    བློས་བཏགས་ཙམ་ལ་བྱ་བྱེད་མཁྱེན་པས།།    སྟོང་དང་བརྟེན་འབྱུང་དོན་གཅིག་མཚན་ཉིད་ལ།།    ཅུང་ཟད་འཁྲུལ་ཕྱིར་དབུ་མ་ཆེན་པོ་མིན།།    འོན་ཀྱང་དོན་དམ་རིགས་པས་དཔྱད་བཟོད་འགོག།   སྤྲོས་པ་ཉེར་ཞི་མཐར་ཐུག་དོན་དམ་དང་།   སྐྱེ་མེད་རྣམ་གྲངས་པར་བཞེད་མཐའ་བྲལ་ཕྱིར།།    དངོས་སྨྲ་ལས་ལྷག་དུབ་མ་ཁོ་ནའོ།།    ཞེས་གསུངས་པ་ལྟར་ཐ་སྙད་ཚད་གྲུབ་འདོད་པ་ནི་དབུ་མ་རང་རྒྱུད་པའི་ལྟ་བ་ལས་ཐལ་འགྱུར་བའི་ལྟ་བ་མིན་པ་བརྗོད་པ་དང་།   དེ་བཞིན་བོད་པ་སྤྲུལ་སྐུས་ལྟ་གྲུབ་ཤན་འབྱེད་དུ།   རིགས་དེ་ཐ་སྙད་ཙམ་དུ་ཡང་།།    སྐྱེ་སོགས་དཔྱད་བཟོད་མེད་པར་སྒྲུབ།   ཅེས་དོན་དམ་དཔྱོད་བྱེད་ཀྱི་རིགས་ཤེས་དེས་ནི།   ཐ་སྙད་ཙམ་དུ་ཡང་སྐྱེ་སོགས་སྤྲོས་པའི་སྣང་བ་དཔྱད་བཟོད་མེད་པར་བསྒྲུབ་པར་བྱེད་ཅེས་བརྗོད་པ་ལྟ་བུ་དང་།   འཇུ་མི་ཕམ་ནས་དོན་རྣམ་ངེས་ཤེས་རབ་རལ་གྲིར།།    དོན་དམ་ལ་ཡང་རྣམ་གྲངས་དང་།།    རྣམ་གྲངས་མིན་པའི་ཚུལ་གཉིས་ཀྱིས།   དེ་འཇལ་དོན་དམ་དཔྱོད་བྱེད་ཀྱི།།    ཚད་མ་དེ་ཡང་གཉིས་སུ་འགྱུར།།    ཞེས་གསུངས་པ་ལྟར།   དོན་དམ་ལ་ཡང་རྣམ་གྲངས་དང་རྣམ་གྲངས་མིན་པ་གཉིས་སུ་ཕྱེས་ཏེ།   རང་རྒྱུད་པས་དོན་དམ་གཏན་ལ་འབེབས་པའི་སྐབས་སུ།   བདེན་གཉིས་སོ་སེར་མ་ཕྱེས་པར་ཀུན་རྫོབ་བམ་ཐ་སྙད་ཀྱི་སྣད་བ་བཀག་སྟེ་ཁས་མ་བླངས་ན་ཆད་ལྟར་འགྱུར་གྱི་དོགས་པས།   བདེན་གཉིས་སོ་སོར་དབྱེ་སྟེ་ཐ་སྙད་ཀྱི་སྣང་བ་མི་འགོག་པར་བདེན་གྲུབ་སོགས་ཀྱི་ཁྱད་པར་སྦྱར་ཏེ།   ཆོས་ཅན་ཀ་བ་མི་འགོག་པར་ཆོས་ཉིད་ཀ་བའི་བདེན་གྲུབ་བཟློག་དགོས་པར་བརྗོད་ནས་རྣམ་གྲངས་པའི་དོན་དམ་ཙམ་བསྒྲུབ་ཅིང་།   ཐལ་འགྱུར་བས་དོན་དམ་གཏན་ལ་འབེབས་པའི་སྐབས་སུ་བདེན་གཉིས་སོ་སོར་མ་ཕྱེས་ཏེ་ཀུན་རྫོབ་ཐ་སྙད་ཀྱི་སྣང་བ་ཐད་ཀར་མ་བཀག་ན།   བདེན་གྲུབ་ཏུ་འགྱུར་བའི་ཕྱིར་དང་བདེན་གཉིས་མ་ཕྱེ་བར་ཐ་སྙད་ཀྱི་སྣང་བ་ལ།   བདེན་གྲུབ་སོགས་ཀྱི་ཁྱད་པར་གང་ཡང་མི་སྦྱོར་བར་ཀ་བ་ཀ་བས་སྟོང་པར་བརྗོད་དེ་རྣམ་གྲངས་མ་ཡིན་པའི་དོན་དམ་ཆེན་པོར་བསྒྲུབ་པ་མཛད་དོ།།    དེས་ཐ་སྙད་ཚད་གྲུབ་བཞེད་པ་ནི་རང་རྒྱུད་པའི་རྣམ་གྲངས་དོན་དམ་དུ་བརྗོད་ལ།   ཐ་སྙད་ཚད་གྲུབ་མི་བཞེད་པ་ནི་ཐལ་འགྱུར་བའི་རྣམ་གྲངས་མ་ཡིན་པའི་དོན་དམ་དུ་བཞེད་དོ།།    དགེ་འདུན་ཆོས་འཕེལ་ནས་དེ་ལྟ་བུའི་ཆ་རྐྱེན་གང་ཡང་སྦྱར་མི་དགོས་པར་ཐལ་འགྱུར་བའི་ལུགས་ལ་མཐའ་གཅིག་ཏུ་ཐ་སྙད་ཚད་གྲུབ་མི་བཞེད་སྟེ།   འཁོར་བའི་ཡུལ་འདིར་ཇི་སྲིད་གནས་པ་དེ་སྲིད་དུ་ཐག་བཅད་ཚད་ཐམས་ཅད་ཡིད་བརྟན་མེད་པའི་བློ་འདི་ལ་ཡིད་བརྟན་བྱས་ནས་ཐག་གཅོད་པ་ཙམ་ལས་ཐབས་གཞན་ཅི་ཡང་མེད་པ་ཞེས་དང་།   དེའི་ཕྱིར་དོན་དམ་པའི་དཔྱད་པ་ལྷུར་ལེན་རང་ཅག་ཐག་བཅད་ཚད་ཐམས་ཅན་རྩ་བ་ནས་མེད་པའི་བློ་བཟོ་ཤ་སྟག་ཡིན་པ་ལ་ཆ་འཇོག་དགོས་ཞེས་དང་།   རང་ཅག་གིས་ཡིན་མིན་ཐག་བཅད་པ་ཐམས་ཅད་ཀྱང་།   རང་གི་སེམས་ལ་ཇི་ལྟར་ཤར་བ་བཞིན་ཐག་བཅད་ཙམ་ལས།   རྩ་བ་གཞན་ཅི་ཡང་མེད་ཅེས་དང་།   དེས་ན་རང་ཅག་ཐོག་མ་མེད་པ་ནས་མ་རིག་པའི་སྨྱོ་ཆུ་བཏུང་བཏུང་བའི་སྨྱོན་པ་ཆེན་པོ་གཅིག་གིས།   ཡོད་མེད།   ཡིན་མིན་ཐག་བཅད་པ་ལ་ཡིད་བརྟན་ཅི་ཡང་མེད་ཅིང་།   སྨྱོན་པ་དེ་འདྲ་བརྒྱ་སྟོང་ཁྲི་འབུམ་ཁ་མཐུན་ཀྱང་ཁུངས་བཙན་དུ་འགྲོ་རྒྱུ་ཅི་ཡང་མེད་ཅེས་པ་སོགས་ཀྱིས་མཚོན།   སྣང་སྲིད་ཀྱི་ཆོས་ཀུན་རྟེན་ཅིང་འབྲེལ་འབྱུང་གི་ཟོལ་ལ་བརྟེན་ཏེ་སྣང་བ་ཙམ་ལས་བརྟག་ཅིང་དཔྱད་ན་གཅིག་གི་རྫུན་ཁུངས་གཅིག་གིས་བརྡོལ་བའི་ཕྱིར་ན་ཐ་སྙད་ཚད་གྲུབ་ཅིག་ནམ་ཡང་བཞག་ཏུ་མེད་པར་བརྗོད་དོ།།    བོད་ཕྱི་རབས་པ་ན་རེ།   ཐ་སྙད་ཚད་གྲུབ་མ་བཞེད་ན།   དགག་བྱ་ཁྱབ་ཆེས་ཆད་ལྟར་ལྷུང་བ་དང་།   རྟེན་འབྲེལ་ལ་ཡིན་རྟོད་མེད་པར་འགྱུར་རོ་ཞེས་དང་།   བུམ་པ་བུམ་པས་མི་སྟོང་བུམ་པ་བདེན་གྲུབ་ཀྱིས་སྟོང་།   རིགས་པས་བདེན་གྲུབ་འགོག་གི་བུམ་པ་མིན།   ཚད་མས་བུམ་པ་འཇོག་གི་བདེན་གྲུབ་མིན་ཞེས་བརྗོད་དེ་དགག་བྱ་ལ་བདེན་གྲུབ་ཀྱི་ཁྱད་པར་སྤྱོར་དགོས་པའི་རྣམ་གཞག་མཛད།   དགེ་འདུན་ཆོས་འཕེལ་ནས་ཚུལ་དེ་ཐུགས་ལ་མ་སོང་བས་ཀླུ་སྒྲུབ་དགོངས་རྒྱན་དུ།   ཡིད་ཀྱིས་མེད་པར་ཐག་ཆོད་ཅིང་།།    མིག་གིས་ཡོད་པར་མཐོང་བའི་ཚེ།   ཞྭ་སེར་མཁན་པོས་མ་བསླབ་ཀྱང་།   སྒྱུ་མའི་བློ་ལས་གཞན་ཅི་འབྱུང་།   ཞེས་པ་སྟེ།   བུམ་པ་ཀ་བ་སོགས་རིགས་པས་དགག་ན་ཐམས་ཅད་མེད་པར་ལྟ་བའི་ཆད་ལྟ་སྐྱེ་འགྲོ་སྙམ་པའི་འཇིག་པ་ནི་དོན་མེད་པའི་སེམས་ཁྲལ་ཏེ།   སྤྱིར་མདུན་པ་མཐོང་བཞིན་པའི་བུམ་པ་འདི་གཏན་པས་མེད་སྙམ་པའི་ཆད་ལྟ་ཞིག་སོ་སྐྱེ་རང་ག་བ་ལ་སྐྱེ་བར་མི་སྲིད་མོད།   གལ་ཏེ་དེ་འདྲའི་བློ་ཞིག་སྐྱེས་ན་བུམ་པ་མཐོང་རྒྱུ་ཡོད་པ་དང་རེག་རྒྱུ་ཡོད་པ་དངོས་སུ་ཤེས་པས།   ཤེས་བཞིན་པ་འདི་ཀོ་གཏན་ནས་མེད་དོ་སྙམ་པ་ཞིག་ཤར་ཐུབ་ན།   དེ་ནི་ཆད་ལྟ་མིན་གྱི་སྣང་ལ་སྣང་བ་ལྟར་དུ་མེད་པར་འཛིན་པའི་སྣང་སྟོང་གཉིས་ཚོགས་ཀྱི་དབུ་མའི་ལྟ་བ་ཡིན་པར་བརྗོད་པ་དང་།   ཡང་དེ་ལས།   དེའི་ཕྱིར་རིགས་པའི་དགག་བྱ་ལ་ཁ་ནས་ཁྱད་ཅི་ཙམ་ཕྱེ་ཡང་དོན་ལ་འགོག་རྒྱུ་དེ།   བུམ་པ་འགོག་དགོས།   ཀ་བ་འགོག་དགོས།   ཡོད་པ་འགོག་དགོས།   མེད་པ་འགོག་དགོས།   བུམ་པ་བཞག་ནས་བུམ་པ་བདེན་གྲུབ་བྱ་བ་ཞིག་ཏུ་འགོག་དགོས་ཟེར་བ་འདི་ཚིག་སྐམ་ཁ་ལ་བྱང་བའི་མཁས་པ་འགའ་ཞིག་གི་ངག་སྒྲོས་ཙམ་ཡིན་ཞེས་དང་།   ཚུལ་འདི་ནི་སྔ་རབས་པའི་མཁས་པ་རྣམས་སུ་མ་ཟད།   དགེ་ལྡན་ཕྱོགས་ཀྱི་མཁས་གྲུབ་ཉམས་མྱོང་ཅན་ཚོས་ཀྱང་གསལ་བ་དགོངས་འདུག་སྟེ།   དཔེར་ན་ལྕང་སྐྱ་རིན་པོ་ཆེས།   སྣང་བ་ལིང་ལིང་འདི་རང་སོར་བཞག་ནས།   དགག་རྒྱུ་རྭ་ཅན་ཞིག་འཚོལ་བར་འདུག་སྟེ།   སོགས་མ་མཉེས་པའི་གསུང་བྱུང་བ་བཞིན།   གུང་ཐང་བསྟན་པའི་སྒྲོན་མེ་དང་།   པཎ་ཆེན་བློ་བཟང་ཆོས་རྒྱན་གྱིས་ཀྱང་དེ་ཁོ་ན་བཞིན་དུ་གསུངས་སོ།   ཞེས་དང་།   རྗེ་བླ་མ་རང་གི་ཞལ་ནས།   སྟོང་ཉིད་མ་རྟོགས་བར་དུ།   ཡོད་པ་ཙམ་དང་།   བདེན་པར་ཡོད་པའི་ཁྱད་པར་ནམ་ཡང་ཕྱེ་མི་སྲིད་ཅིང་དེ་བཞིན་བདེན་པ་མེད་པ་དང་།   མེད་པ་ཙམ་གྱི་ཁྱད་པར་ཡང་འབྱེད་མི་ནུས་ཞེས་གསུངས་ཤིང་ཐལ་རང་ལ་ཆོས་ཅན་མཐུན་སྣང་བ་མེད་པའི་རྒྱུ་མཚན་མཐར་ཐུག་ཀྱང་དེ་ཡིན་པར་གསུངས་པས།   ལྟ་བ་མ་རྟོགས་གོང་དུ་བདེན་གྲུབ་ཟུར་དུ་ངོས་ཟིན་པ་ག་ལ་སྲིད།   དེས་ན་དགག་བྱ་ངོས་འཛིན་ཁུལ་བྱས་པ་དེ་ལ་ཡིད་རྟོན་ག་ལ་ཡོད་ཅེས་བརྗོད་པ་བཞིན།   གསར་ཕྱོགས་ཀྱི་མཁས་པའི་ངག་སྒྲོན་ནས་བྱུང་བའི་ཀ་བ་ཀ་བས་མི་སྟོང་ཀ་བ་བདེན་གྲུབ་ཀྱིས་སྟོང་།   བུམ་པ་བུམ་པས་མི་སྟོང་བུམ་པ་བདེན་གྲུབ་ཀྱིས་སྟོང་ཞེས་ཆོས་ཅན་ལ་བདེན་གྲུབ་ཀྱི་ཁྱད་པར་སྦྱར་བ་འདི་ཀོ་རྗེ་རིན་པོ་ཆེའི་གསུང་གི་ཚིག་ཟིན་ལ་མེད་པར་ཕྱིས་བྱོན་སློབ་བརྒྱུད་ལ་ལས་རྗེའི་ལྟ་བ་གསལ་ཁ་འདོན་སྐབས་བརྗོད་པ་ཡིན་པ་སོགས་ལྕང་སྐྱའི་གསུང་ལས་རྗེས་སུ་དཔོག་ནུས་སོ།།    ཀུན་རྫོབ་ཐ་སྙད་ཀྱི་སྣང་བ་ཚད་གྲུབ་ཏུ་མེད་པར་ཐད་ཀར་འགོག་འོས་པའི་ཚུལ་དེ་སྔ་འགྱུར་ལུགས་འཛིན་བོད་པ་སྤྲུལ་སྐུ་ནས་ཀྱང་ལྟ་གྲུབ་ཤན་འབྱེད་དུ་འདི་ལྟར་གསུངས་འདུག་སྟེ།   དོན་དམ་རྣམ་གྲངས་དཔྱོད་པའི་སྐབས།།    བདེན་གཉིས་ཕྱེས་ཏེ་ཀུན་རྫོབ་ཀྱི།   སྣང་བ་མི་འགོག་དགག་བྱ་ལ།   ཁྱད་པར་སྦྱར་ཏེ་བདེན་གྲུབ་འགོགདེའི་ཕྱིར་ཡང་དག་དོན་དམ་ངོར།།    བསྒྲུབ་བྱ་བདེན་སྟོང་རྣམ་གྲངས་ཙམ།   བསྒྲུབ་འདི་རང་རྒྱུད་ལྟ་བ་སྟེ།།    ཞེས་དང་།   རིགས་པའི་དགག་བྱ་ཁྱབ་ཆེ་བས།།    ཆད་ལྟར་འགྱུར་གྱི་དོགས་པ་སྟེ།   རྟེན་འབྱུང་མི་ཤེས་དངོས་སྨྲ་ལས།།    དབུ་མར་སྨྲ་རྣམས་དོགས་མི་འཚལ།   ཞེས་དང་།   ཕྱི་འགྱུར་ལ་ལ་འདི་རྗེས་མཐུན།།    སྣང་བ་བཀག་ན་ཆད་ལྟ་ཟེར།།    ཚུར་མཐོང་ཙམ་ཞིག་མཁྱེན་པར་ཟད།   དགག་བྱ་བདེན་གྲུབ་ཡན་གར་འགོག།   དགག་བྱའི་སྣང་ཚུལ་ངེས་སོ་ལོ།།    ཞེས་པ་སོགས་ཏེ།   ཀུན་རྫོབ་སྣང་བ་ཐད་ཀར་མི་འགོག་པར་དགག་བྱ་བདེན་གྲུབ་ཀྱི་ཁྱད་པར་སྦྱར་བ་ནི་རྣམ་གྲངས་པའི་དོན་དམ་ཙམ་སྒྲུབ་པར་བྱེད་པའི་དབུ་མ་རང་རྒྱུད་པའི་འདོད་ཚུལ་ཡིན་ཏེ་ཐལ་འགྱུར་བའི་བཞེད་དགོངས་མིན་པ་དང་།   ཆད་ལྟར་འགྱུར་གྱི་དོགས་ཏེ་དགག་བྱར་བདེན་གྲུབ་ཀྱི་ཁྱད་པར་སྦྱར་བ་འདི་ཚུར་མཐོང་ཚད་མའི་ལུགས་ཙམ་ཞིག་མཁྱེན་པར་ཟད་དོ།།     

 ཐ་སྙད་ཚད་གྲུབ་ཁས་མ་བླངས་ཀྱང་རྟེན་འབྲེལ་ལ་ཡིད་རྟོན་མེད་པར་མི་འགྱུར་བའི་ཚུལ་འདི་ཀླུ་སྒྲུབ་དགོངས་རྒྱན་དུ་དགེ་ཆོས་གོ་སླ་བའི་དཔེ་ལ་སྦྱར་ནས་འདི་ལྟར་གསུངས་ཡོད་དེ།   སྤྱིར་ཚད་མས་གྲུབ་པ་བྱ་བ་འདི་ཀུན་རྫོབ་ཀྱི་སྣང་བར་རགས་པ་རྣམས་ཕྲ་ཞིང་ཞིབ་ཏུ་བཏང་བའི་དགོས་པ་རྒྱ་ཆེན་པོ་འདིའི་ཆེད་དུ་མཁས་པ་རྣམས་ཀྱིས་ཚུལ་གསུམ་གྱི་རིགས་པས་གྲུབ་པ་བྱ་བ་དང་དོན་གཅིག་ཅིང་།   དོན་ལ་ཀུན་བཏགས་ཀྱི་མ་རིག་པའི་ཡུལ་གྱི་ཁྱད་པར་འགའ་ཞིག་དགོས་པ་རྒྱ་ཆེན་པོའི་དོན་དུ་མཁས་པ་རྣམས་ཀྱིས་རྟོག་གེའི་རིགས་པས་ཆེས་གསལ་དུ་བཏང་བ་ཞིག་འདུག་ལ།   སྤྱིར་ཚད་གྲུབ་བྱ་བ་དང་།   ཡིད་ཆེས་པ།   བསླུ་མེད།   བསྙོན་མེད་སོགས་རྟོགས་གེའི་རིག་པས་སྣོན་པ་བཏབ་མ་བཏབ་ཙམ་གྱི་ཁྱད་པར་ལས།   རིགས་དྲུག་ཀུན་གྱི་རྒྱུ་ལ་རང་བྱུང་དུ་ཡོད་པའི་ཀུན་རྫོབ་ཀྱི་རྣམ་ཤེས་འདི་ཁ་ཕྱོགས་བསྒྱུར་ལུགས་ཀྱིས་སྣང་བ་ཙམ་གྱི་ཁྱད་པར་ལས།   རིགས་དྲུག་ཀུན་གྱི་རྒྱུ་ལ་རང་བྱུང་དུ་ཡོད་པའི་ཀུན་རྫོབ་གྱི་རྣམ་ཤེས་འདི་ཁ་ཕྱོགས་བསྒྱུར་ལུགས་ཀྱིས་སྣང་བ་ཙམ་ལས་གཞན་དུ་མེད་ཅིང་།   བུ་ཡི་ལག་པ་མེ་དང་ཕྲད་ན་ཨ་ཚ་ཚ་ཟེར་བ་དེ།   བསླུ་མེད།   བསྙོན་མེད་ཁས་ལེན་སོགས་ཡིན་ལ།   ཕ་ཡིས་མེ་ཚ་བ་ཡིན།   ལག་པ་ཤ་ཡིན་པས་མེ་ལ་ཐུག་ན་ཚ་སོགས་རྒྱུ་མཚན་དང་སྦྱར་བའི་བཀའ་བཀྱོན་གནང་བ་དེ་ལུང་རིགས་ཀྱི་ཚད་མས་གྲུབ་ལུགས་ཡིན།   དེས་ན་ཇི་སྲིད་ས་རྡོ་རི་བྲག་ལ་སོགས་པའི་སྣང་པའི་སྣང་བ་འདི་དག་མ་ཡལ་བ་དེ་སྲིད་དུ་མཆོག་གསུམ་རྒྱུ་འབྲས་རྟེན་འབྲེལ་ལ་སོགས་པའི་སྣང་བ་ཡང་ཡལ་བའི་དོན་མེད་ལ།   དགོས་པའི་སྣང་བ་སྔོན་དུ་ཡལ་ནས།   མི་དགོས་པའི་སྣང་བ་རྗེས་སུ་ལུས་ན་སོ་སོའི་སྐྱེ་བོ་ཆོས་མེད་ཐ་ཤལ་བའི་རང་བཞིན་རང་བཞིན་ལས་འོས་ཅི་ཡོད།   ཅེས་གོ་བ་ཆུ་ཐུབ་ཀྱི་རིགས་པ་དཔེ་ལ་དྲངས་ཏེ་བརྗོད་པ་དང་།   ཚུལ་དེ་ཡང་བོད་པ་སྤྲུལ་སྐུ་ནས།   སྣང་བ་དཔྱད་བཟོད་བདེན་པ་གཉིས་ཆར་འགོགརྟེན་འབྱུང་སྣང་བའི་ངང་ཚུལ་འགོག་མ་ལགས།   ཞེས་པ་སྟེ།   ཇི་ལྟར་སྣང་བ་དེ་ཉིད་སྟོང་པར་ངེས་དགོས་པས་ན།   སྣང་བ་དཔྱད་བཟོད་དུ་འགྱུར་བ་ནི་བདེན་པ་གཉིས་ཆར་དུ་ཡང་ཞལ་གྱིས་མི་བཞེས་པའི་སྒོ་ནས་འགོག་པར་མཛད་དགོས་མོད་ཀྱང་།   སྣང་བ་སྟོང་པར་གཏན་ལ་ཕབ་ཟིན་པའི་ལག་རྗེས་ལ་ཤར་རྟེན་འབྱུང་སྣང་བའི་ངང་ཚུལ་ནམ་ཡང་འགོག་པར་མཛད་པ་མ་ལགས་པར་བརྗོད་ཅིང་རང་རྒྱུད་པ་སོགས་ཀྱིས་དོན་དཔྱོད་ཚད་མས་སྟོང་རྟེན་འབྱུང་དུ་མ་ངེས་གོང་དུ།   སྣང་བ་མི་འགོག་པར་དེའི་སྟེང་གི་བདེན་གྲུབ་སོགས་འགོག་པ་དང་།   ཐལ་འགྱུར་བས་སྣང་བ་དེ་ཉིད་སྟོང་པར་གཏན་ལ་ཕབ་ཟིན་པའི་རྗེས་སུ་སྟོང་པ་རྟེན་འབྱུང་དུ་ངེས་པའི་སྣང་པའི་སྣང་བ་ཙམ་ཐ་སྙད་དུ་མི་འགོག་པ་སོགས་ཚུལ་དེ་ཇི་བཞིན་རྟོགས་ན་གཞན་དཀའ་བའི་གནད་ཀྱི་མདུད་རྒྱ་རང་གྲོལ་དུ་འགྱུར་བར་བརྗོད་དོ།།  

  དེ་ཡང་ཐ་སྙད་ཚད་གྲུབ་མི་བཞེད་པའི་ཚུལ་ལུགས་སྤྱིར་དགེ་ལྡན་ཕྱོགས་ཀྱི་མཁས་པ་ཕལ་མོ་ཆེས་དབུ་མའི་གཞུང་ལུགས་སམ་ལྟ་བའི་སྐོར་འཆད་སྐབས་མི་འཐད་པའི་ཚུལ་བརྗོད་ཅིང་།   དགེ་བཤེས་ཤེས་རབ་རྒྱ་མཚོ་ནས་ཚུལ་དེ་ཉིད་འབེན་དུ་བཀོད་ནས་དགག་པ་རྒྱ་ཆེར་མཛད་ཡོད་དེ།   མི་འཇིགས་སེང་གེའི་ང་རོ་རུ།   དགག་བྱ་ཁྱབ་ཆེ་སྤྱི་དང་ཁྱད་པར་དུ།   སྟག་ལོ་ལྟ་བུའི་ཚད་མ་མེད་པ་དང་།   ཚད་མས་གྲུབ་པ་མེད་པའི་ལུགས་ངན་ལ།།    འགལ་བ་སྟོང་གི་ཐོག་སེར་འཇུག་པའི་ཕྱིར།   རྨི་ལམ་དུ་ཡང་དག་པ་མེ་སྟེར་རོ།།    ཞེས་དང་།   ཐ་སྙད་བདེན་པ་མི་འདོད་ཆད་ལྟ་དང་།།    འཕུར་བྱེད་གཤོག་ཡ་གཅིག་པའི་མཁའ་ལྡིང་ཞེས།   ཞེས་དང་།   རྒྱུ་འབྲས་རྟེན་འབྲེལ་འགོག་པའི་སྤྲོས་བྲལ་ལས།།    ཞྭ་སེར་ཆད་ལྟ་དུས་གསུམ་རྒྱལ་བའི་འོད།   ཐ་སྙད་ཚད་གྲུབ་འགོག་པའི་སྤྲོས་བྲལ་ལས།།    ཇོ་ནང་རྟག་བརྟན་ཕུན་ཚོགས་སྟོང་གིས་འཕགས།།    ཞེས་དང་།   ཐལ་འགྱུར་སྨྲ་བས་ཚད་གྲུབ་མི་བཞེད་ཅེས།   ཐལ་འགྱུར་ལུགས་བཟང་ལོག་པ་སྨྲ་བ་རྣམས།   ཐལ་འགྱུར་བ་དང་དཔག་ཚད་བྱེ་བས་རིང་།   ཞེས་ཐ་སྙད་ཚད་གྲུབ་མི་བཞེད་ན་འགལ་བའི་ཁུར་ཆེན་གྲངསམེད་ཁུར་དགོས་པའི་ཚུལ་བསྟན་པ་དང་ཆབས་ཅིག་ཏུ།   ཐ་སྙད་དུ་ཡོད་ཅེས་བདེན་གྲུབ་འགོག།།    དེ་སྣང་བས་ཡོད་མཐའ་སེལ་ཚུལ་ཡིན།།    དོན་དམ་དུ་མེད་ཅེས་གཏན་མེད་འགོག།   དེ་སྟོང་པས་མེད་མཐའ་སེལ་ཚུལ་ཡིན།།    ཞེས་དང་།   དཔྱད་ན་ཏིལ་འབྲུའི་ཆ་ཡང་མི་རྙེད་དེ།།    བརྟག་བཟོད་ཁས་ལེན་བྲལ་བ་དངོས་པོའི་གཤིས།   ཐ་སྙད་རྟེན་ཅིང་འབྲེལ་འབྱུང་མི་བསླུ་བས།   ཡོད་ཀྱང་བདེན་པར་མེད་པ་ཀླུ་སྒྲུབ་ལུགས།།    ཞེས་དང་།   ཀུན་རྫོབ་སྣང་བས་སྟོང་བ་མི་འགོག་ཡིན།།    དོན་དམ་སྟོང་པས་སྣང་བ་མི་འགོག་པའི།།    བདེན་གཉིས་འགལ་མེད་ཟུང་འཇུག་འོད་སྣང་གིས།།    མཐའ་བྲལ་དབུ་མའི་ལམ་བཟང་གསལ་བར་བྱས།   ཞེས་སོགས་རྒྱབ་རྟེན་གྱི་ལུང་དང་རྣམ་དཔྱོད་ཆེན་པོའི་ལུགས་ཀྱི་རིགས་ལམ་གྱིས་དགེ་ལྡན་ལུགས་བཟང་གི་ཕྱོགས་འདིའི་བཞེད་པ་ཆེས་གསལ་བར་བྱས་སོ།།    

གསུམ།   དབུ་མ་བ་ལ་ཁས་ལེན་མེད་པའི་སྐོར། 

དེ་ཡང་དབུ་མ་ཐལ་འགྱུར་བའི་ལུགས་ལ་ཤེས་བྱ་བདེན་པ་གཉིས་སུ་ངེས་ཤིང་ཤེས་བྱེད་ལ་ཚད་མ་གཉིས་སུ་ཁ་ཚོན་བཅད་དེ།   ཤེས་བྱེད་གང་གི་ངོར་ཤེས་བྱ་གང་ཚུལ་ཇི་ལྟར་ཁས་ལེན་མི་ལེན་སོགས་རྣམས་དབྱེ་ཞིབ་མོའི་སྒོ་ནས་དབུ་མ་བ་ལ་ཁས་ལེན་ཡོད་མེད་ཀྱི་གནད་དོན་འདི་བྱུང་།   སྔ་རབས་ཀྱི་མཁས་དབང་རྣམས་ལས་ཕྱོགས་འདིར་ཚབ་མཚོན་རང་བཞིན་གྱི་བཞེས་པ་སྟེ།   ལོ་ཙཱ་བ་པ་ཚབ་ཉི་མ་གྲགས་པའི་བུ་ཆེན་བཞི་བྱོན་པ་ལས་ཚིག་དོན་གཉིས་ཀར་མཁས་པ་རྨ་བྱ་བྱང་བརྩོན་ནས་དབུ་མ་ཐལ་འགྱུར་བ་ལ་ཐ་སྙད་ཀྱི་རྣམ་གཞག་ཁས་ལེན་ཡོད་པར་འདོད་པ་དང་།   དོན་ལ་མཁས་པ་གཙང་པ་ས་སྦོས་ནས་ཁས་ལེན་མེད་པར་འདོད་པའོ།   རྨ་བྱ་བྱང་བརྩོན་གྱི་སློབ་བརྒྱུད་དུ་བུ་སྟོན་རིན་ཆེན་གྲུབ།   རྗེ་བཙུན་རེད་མདའ་བ།   གནས་རྙིང་པ།   ཡར་འབྲོག་པ་རིན་ཆེན་ཏོགརྗེ་བཙུན་ཙོང་ཁ་པ་ལྟ་བུ་ཟབ་མོ་དབུ་མ་འཆད་པའི་མཁས་དབང་གསེར་རིའི་ཕྲེང་བ་ལྟ་བུ་བྱོན་ཏེ་ཐ་སྙད་ཀྱི་རྣམ་གཞག་ཁས་ལེན་ཡོད་པར་སྒྲུབ་ཅིང་།   ཁྱད་པར་དུ་རྗེ་བཙུན་བློ་བཟང་གྲགས་པ་ནས་ཇི་སྐད་དུ་རྟེན་འབྲེལ་བསྟོད་པ་ལས།   འབད་པ་དུ་མ་མཁས་པ་ཡི།   རྗེས་སུ་འབྲངས་ནས་ཁྱོད་ཀྱི་ནི།   དགོངས་པ་ཡང་དང་ཡང་དུ་བཙལ།།    དེ་ཚེ་རང་གཞན་སྡེ་བ་ཡི།།    གཞུང་མང་དག་ལ་སྦྱངས་པ་ན།   ཕྱི་ཕྱིར་ཐོ་ཆོམ་དྲ་བ་ཡིས།།    བདག་གི་ཡིད་མི་ཀུན་ཏུ་གདུང་།།    ཞེས་གསུངས་པ་ལྟར་སྔོན་བྱོན་མཁས་དབང་ཇི་སྙེད་ཀྱི་ཐུགས་ཀྱི་བཅུད་རྣམས་ལེགས་པར་མནོས་ཀྱང་།   ད་དུང་ཕྱོགས་འདི་ཐེ་ཚོམ་གྱི་དྲ་བ་གཙང་ཆོད་དུ་མ་ཡོང་སྟབས།   ཕྱི་ནས་བླ་མ་དབུ་མ་པ་ལ་བསྟེན་ཏེ་དབེན་པའི་གནས་སུ་ཀླུ་སྒྲུབ་ཡབ་སྲས་ཀྱི་གཞུང་ལ་ཐུགས་རྩེ་གཅིག་ཏུ་ཡང་དུ་དཔྱད་པ་ཞིབ་མོ་བཏང་བས་མཐའ་སོམ་ཉིའི་དྲ་བ་ཆོད།   ལྟ་བའི་གསང་གནད་གྲོལ།   རྒྱུད་ཀྱི་རྟོགས་པ་ཡོངས་སུ་སྨིན་ཏེ།   དགུང་ལོ་བཞི་བཅུའི་ཐོག་ནས་བཟུང་སྔ་རབས་བཤད་དགོངས་ལས་བརྒལ་ཏེ་ལྟ་བ་རང་མཚན་པ་སྨིན་ཅིང་།   དོན་དམ་པར་ཁས་ལེན་གཅིག་ཀྱང་མེད་ལ་ཐ་སྙད་དུ་ཁས་ལེན་ཐམས་ཅད་ཡོད་དོ་ཞེས་པའི་རྣམ་གཞག་རྒྱས་པར་མཛད་དེ།   སྣང་བ་རྟེན་འབྱུང་བསླུ་བ་མེད་པ་དང་།།    སྟོང་པ་ཁས་ལེན་བྲལ་བའི་གོ་བ་གཉིས།།    ཇི་སྲིད་སོ་སོར་སྣང་བ་དེ་སྲིད་དུ།།    ད་དུང་ཐུབ་པའི་དགོངས་པ་རྟོགས་པ་མེད།།    ནམ་ཞིག་རེས་འཇོག་མེད་པར་ཅིག་ཅར་དུ།   རྟེན་འབྲེལ་མི་བསླུ་མཐོང་བ་ཙམ་ཉིད་ནས།།    ངེས་ཤེས་ཡུལ་གྱི་འཛིན་སྟངས་ཀུན་ཞིག་ན།   དེ་ཚེ་ལྟ་བའི་དཔྱད་པ་རྫོགས་པ་ལགས།   ཞེས་པའི་མཐར་ཐུག་རང་རྐྱ་འཕེར་བའི་ལྟ་བའི་རྒྱལ་མཚན་བཙུགས་ཤིང་།   ཚབ་མཚོན་རང་བཞིན་གྱི་བརྩམས་ཆོས་ལམ་རིམ་ཆེ་ཆུང་དང་རྩ་འཇུག་གི་ཊིཀ་ཆེན་རྣམས་སུ་ལས་དང་པོ་བ་སྟེ་རིགས་པས་དཔྱད་པ་ངེས་ཤེས་མེད་པ་རྣམས་ཆད་ལྟའི་གཡང་ལས་སྐྱོབ་ཆེད།   ཁས་ལེན་ཡོད་མེད་དང་ཐ་སྙད་དུ་རང་མཚན་གྱིས་གྲུབ་མིན་ལ་སྣང་ཕྱོགས་སུ་འཛིན་དགོས་པའི་བླང་བྱ་བཏོན་ནོ།།  

  མཁས་མཆོག་གཙང་པ་ས་སྦོས་ཀྱི་སློབ་བརྒྱུད་དུ་སོང་བའི་བོད་སྔ་རབས་པ་རྣམས་མགྲིན་གཅིག་ཏུ་ཟུང་འཇུག་རབ་ཏུ་མི་གནས་པའི་དབུ་མའི་ལུགས་ལ་འདི་ཡིན་འདི་མིན་དང་ཡོད་མེད་ལ་སོགས་པའི་སྤྲོས་པ་གང་ཅིར་ཡང་ནི་མེད་པའི་ཕྱིར་རྣམ་པ་ཀུན་ཏུ་ཅིར་ཡང་ཁས་ལེན་མེད་པར་བཞེད་ཅིང་གཞི་དང་ལམ་དང་འབྲས་བུ་ལ་སོགས་པའི་ཐ་སྙད་ཀྱི་རྣམ་གཞག་ཐམས་ཅད་གཞན་ངོའི་ཁས་ལེན་ཙམ་དུ་བཞག་པར་མཛད།   ལུགས་འདིས་སྣང་ཕྱོགས་གཙོ་བོར་མཛད་པ་ནི་དབུ་མ་རང་རྒྱུད་པའི་ལྟ་དགོངས་སུ་འགྱུར་བར་དོགས་ཏེ་གནས་སྣང་གཉིས་ལས་བློ་གྲོས་ཆེན་པོའི་དཔྱད་བྱར་གྱུར་པའི་དབུ་མ་ཐལ་འགྱུར་བ་ནས་གནས་ཕྱོགས་གཙོ་བོར་བྱེད་དགོས་པའི་རྣམ་གཞག་མཛད།   དེས་ན་སྔ་རབས་ལུགས་འཛིན་གོ་ཤཱཀ་སྟག་གསུམ་སོགས་ནས་དོན་དམ་ལ་དཔྱོད་པའི་སྐབས་སུ་ཁས་ལེན་མེད་ལ་ཀུན་རྫོབ་ལ་དཔྱོད་པའི་སྐབས་སུ་ཁས་ལེན་ཡོད་ཅེས་བཞེད་ལ།   དཔྱོད་པའི་སྐབས་སུ་ཞེས་བརྗོད་པ་ལས་རང་ངོ་དང་གཞན་ངོའི་ཁྱད་པར་སྦྱར་བའི་རྣམ་གཞག་མཛད་ལ།   ཁས་ལེན་ཡོད་ཅེས་བརྗོད་པའང་གཞན་ངོའི་ཁས་ལེན་ཙམ་ལ་ཟད་དོ།   གསེར་མདོག་པཎ་ཆེན་ཤཱཀྱ་མཆོག་ལྡན་ནས།   འཇིག་རྟེན་ཀུན་རྗོབ་ཀྱི་བདེན་པ་ལྟ་ཞོག་རྣལ་འབྱོར་པའི་ཀུན་རྫོབ་ཙམ་ཡང་ཁས་ལེན་པ་མ་ཡིན་ཏེ།   སྤྲོས་པའི་མཚན་མ་འཐའ་དག་འགོག་པའི་ཕྱིར་རོ་ཞེས་གསུངས་པ་དང་།   ཕྱིས་བྱོན་རྒྱལ་བ་ཀློང་ཆེན་པའི་ལུགས་འཛིན་འཇུ་མི་ཕམ་ནས་གོང་ཞུས་ཀྱི་ལུགས་གཉིས་ལའང་སྐྱོན་ཡོད་པར་དམིགས་ཏེ་ངེས་ཤེས་སྒྲོན་མེར།   དེར་བརྟེན་གངས་ཅན་མཁས་པ་འགས།།    རང་ལུགས་ཁས་ལེན་ཡོད་པའི་ཕྱོགས།   ཁོ་ན་ཡང་ཡང་ཆེས་བསྒྲུབས།   དེ་ཡང་སྐབས་ཤན་མ་ཕྱེས་ན།   གཤིག་དོན་ཅིར་ཡང་མ་གྲུབ་ཕྱིར།།    མཐའ་གཅིག་ཁས་ལེན་ཡོད་པའང་དཀའ།།    ཞེས་དང་།   ཁས་བླངས་པ་དེ་དོན་དམ་པར།།    གྲུབ་ཅིང་དཔྱད་བཟོད་ཉིད་དུ་འགྱུར།།    རང་ལུགས་ཁས་ལེན་མ་ཡིན་ན།།    རང་ལ་ཁས་ལེན་ཡོད་པ་འགལ།།    ཞེས་བརྗོད་ནས་མཐའ་གཅིག་ཏུ་ཁས་ལེན་ཡོད་པའང་སྐབས་མ་ཕྱེས་ན་རིགས་པའི་གནོད་པ་ཡོད་ཚུལ་དང་།   སྔ་རབས་པ་རྣམས་མགྲིན་གཅིག་ཏུ།   དབུ་མའི་རང་ལུགས་ཡིན་མིན་དང་།།    ཡོད་མེད་ལ་སོགས་ཅིར་ཡང་ནི།།    མེད་ཕྱིར་ཁས་ལེན་མེད་པར་འདོད།།    རང་གཞུང་རྣམས་ལས་ལམ་འབྲས་དང་།   རྟེན་འབྱུང་གྲུབ་མཐའི་རྣམ་གཞག་ཀུན།།    ཁས་བླངས་རང་ལུགས་ཡོད་བཞིན་དུ།།    ཐ་སྙད་ཐམས་ཅད་གཞན་ངོ་ལ།   སྐྱེལ་བ་ཚིག་དོན་གཉིས་ཀར་འགལ།།    ཞེས་ཁས་ལེན་མེད་པའི་ལུགས་ལའང་འགལ་བའི་ཁུར་ཆེན་ཞིག་ཡོད་པར་བརྗོད་དེ།   རང་ལུགས་ལ།   དེས་ན་དབུ་མ་ཆེན་པོའི་ངོར།།    ཁས་ལེན་ཅིར་ཡང་ཡོད་མིན་ཏེ།།    དེ་ཡིས་སྣང་སྟོང་མཉམ་ཉིད་དུ།   རྟོགས་སླད་ཡོད་མེད་ཡིན་མིན་སོགས།།    དགག་སྒྲུབ་སྤྲོས་ཀུན་བྲལ་བས་ན།།    གནས་ལུགས་དོན་བཞིན་ཆོས་ཀུན་ཀྱང་།།    ཁས་བླངས་རིགས་པས་མི་གྲུབ་ཕྱིར།།    གང་དུ་ཁས་ནི་ལེན་མི་བྱེད།།    དེ་ལྟར་གནས་ལུགས་མཐར་ཐུག་དོན།   ཁས་ལེན་མེད་ཀྱང་སྣང་ཚུལ་ལ།   ཐ་སྙད་བདེན་གཉིས་སོ་སོར་ཡང་།།    ཁས་བླངས་ཡོད་དེ་དེ་གཉིས་ཀྱང་།   བདེན་གཉིས་དབྱེར་མེད་གནས་ལུགས་ལ།   ལྟོས་ན་ཚད་མ་གཉིས་པོ་ཡང་།།    ཉི་ཚེའི་གནས་ཡིན་དེ་གཅིག་གིས།།    བདེན་གཉིས་འཛིན་པ་མི་སྲིད་ཕྱིར།   དེས་ན་ཐ་སྙད་དོན་དམ་གྱི།།    ཚད་མ་གཉིས་པོ་ཤེས་རབ་སྟེ།།    བུམ་སོགས་དེ་གཉིས་ཀྱིས་གཞན་ན།   ངོ་བོ་གཉིས་ནི་རྙེད་ན་ཡང་།   གཅིག་ཚེ་གཅིག་ནི་ཡོད་མིན་པས།།    སོ་སྐྱེའི་བློ་ལ་བདེན་པ་གཉིས།།    རེས་འཇོག་ཚུལ་ལས་མི་སྣང་ཕྱིར།   སོ་སོ་གཞལ་བའི་ཁས་ལེན་གཉིས།   ཡོད་པ་ཉིད་དུ་གྲུབ་པ་ཡིན།།    ཞེས་བདེན་གཉིས་རྣམ་པར་ཕྱེས་ཏེ་དོན་དམ་གཏན་ལ་འབེབས་པའི་སྐབས་སུ་ཁས་ལེན་ཀུན་དང་བྲལ་བ་དང་།   ཐ་སྙད་གཏན་ལ་འབེབས་པའི་སྐབས་སུ་དབུ་མ་ཆེན་པོ་ལ་ཁས་ལེན་ཡོད་ཚུལ་བརྗོད་དེ།   གནས་སྣང་གཉིས་ལས་གནས་ཕྱོགས་གཙོ་བོར་འཛིན་དགོས་ཚུལ་ཤུགས་ཀྱིས་བསྟན།   ཕྱོགས་འདིར་བོད་སྔ་ཕྱི་གཉིས་ཀྱི་བཞེད་དགོངས་མི་མཐུན་པ་ནི་གནས་ཚུལ་དང་སྣང་ཚུལ་གཉིས་ལས་གང་ཞིག་གཙོ་ཆེར་འཛིན་པའི་ཆ་ནས་བྱུང་བ་རེད་སྙམ་སྟེ།   གནས་ཕྱོགས་གཙོ་ཆེར་བྱེད་པ་ནི་ཟབ་མོ་དབུ་མ་ཆེན་པོ་འདི་ཀོ་བློ་གྲོས་ཆེན་པོ་རྣམས་ཀྱི་སྤྱོད་ཡུལ་ཡིན་པའི་ཆ་ནས་རྣམ་གཞག་མཛད་པ་ཡིན་ལ།   སྣང་ཕྱོགས་གཙོ་ཆེར་བྱེད་པ་ནི་རྟོག་བཅས་ཀྱི་བློ་ལ་བརྟེན་ནས་རྟོག་མེད་ཀྱི་ཡེ་ཤེས་འབྱུང་དགོས་པའི་ཆོས་ཉིད་བཞིན་སྨྲ་བསམ་བརྗོད་འདས་ཀྱི་མཐར་ཐུག་གི་གཞལ་ཡས་སུ་འབྱོར་བ་སྨྲ་བསམ་བརྗོད་ཡོད་ཀྱི་སྐས་རིམ་ལ་མ་བརྟེན་ཐབས་མེད་ཀྱི་ཆ་ནས་རྣམ་གཞག་མཛད་པ་ཡིན་ནོ།།  

   སྐབས་བབ་མཁས་དབང་དགེ་ཆོས་ནས་སྤྱིར་གནས་སྣང་གཉིས་ལས་གནས་ཕྱོགས་གཙོ་བོ་བྱེད་པ་འཐད་ཕྱོགས་སུ་དམིགས་ཅིང་བྱེ་བྲག་གོོ་རམས་པ་སོགས་ཀྱི་ལྟ་དགོངས་ལ་བློ་རབ་ཕྱོགས་མོད་ཀྱང་།   འོན་ཀྱང་དེ་དག་གི་ལྟ་བ་དང་རིགས་ལམ་རྗེས་བརྗོད་ཁོ་ན་མིན་ཏེ།   རང་གི་དཔྱད་སྟོབས་ཀྱི་རིགས་པ་དང་།   དོན་གྱི་གོ་བ་སྦྲོན་ལུགས་ཐུན་མིན་གང་དེས་གཞན་ལུགས་ལ་ལན་བརྗོད་པའི་ཚུལ་གྱིས་ཟབ་མོ་དབུ་མ་པ་ལ་ཁས་ལེན་མེད་ཚུལ་རིགས་དཔེ་གསུམ་གྱི་སྒོ་ནས་གསལ་ཆ་བཏོན་ཡོད་དེ།   དོན་དམ་ལ་དཔྱོད་པའི་སྐབས་སུ་དབུ་མ་པ་ལ་ཁས་ལེན་མེད་པ་དང་།   ཀུན་རྫོབ་ལ་དཔྱོད་པའི་སྐབས་སུ་ཁས་ལེན་ཡོད་པར་མི་གོ་བ།   གཉིས་འཛིན་གྱི་སྣང་བ་མ་ལོག་པའི་སོ་སྐྱེ་རྣམས་ཀྱིས་དབང་མེད་དུ་ཁས་ལེན་དགོས་པ་སྟེ།   གཞན་ངོའི་ཁས་ལེན་དུ་བཞེད་ལ།   ཆོས་ཉིད་རྟོགས་པའི་རྣལ་འབྱོར་པ་རང་ངོའི་ཁས་ལེན་ཅི་ཡང་མེད་པ་བཞིན་དབུ་མ་ལ་ཁས་ལེན་མེད་བརྗོད་དོ།།    དེ་ཡང་ཁས་ལེན་ལ་རང་ངོ་དང་གཞན་ངོ་གཉིས་སུ་ཕྱེ་བའི་ཕན་འབྲས་སུ།   སོ་སྐྱེ་རྣམ་རྟོག་ལ་རྩ་བ་གཏད་པའི་ཚུལ་གསུམ་རྟོག་གེའི་རིགས་པ་བ་རྣམས་ཀྱི་སོམ་ཉི་ཡི་དྲ་བ་སྟེ།   ཁས་ལེན་མེད་པའི་སྔ་རྒོལ་གྱི་མདུན་སར་ཁས་ལེན་ལྡན་གྱི་ཕྱི་རྒོལ་གྱིས་ལུང་རིགས་ཀྱི་སྒོ་ནས་རྩོད་པ་བྱེད་ཚེ་ལན་གང་བཏབ་ཐམས་ཅད་ཁས་ལེན་ཤ་སྟག་ཏུ་འགྱུར་བར་དོགས་པ་དེ་ཉིད་བདེ་བླག་ཏུ་སེལ་ནུས་པའི་ཕྱིར་རོ།།    གཞན་ཡང་ཀླུ་སྒྲུབ་དགོངས་རྒྱན་དུ་དཔེ་འདི་ལྟར་བཀོད་ཡོད་དེ།   ཉག་སྐེད་བུ་ལོང་མའི་མདུན་དུ་ཁྱོད་རང་འཁོར་ལོས་བསྒྱུར་བའི་རྒྱལ་པོ་ཡིན་ནོ་བྱ་བ་ཁས་ལེན་ཡིན།   བུ་ལོང་མས་འོ་ན་ཁྱོད་ཀྱིས་རང་ལུགས་སུ་ཁས་ལེན་པ་ཡིན་ནམ།   ངའི་ངོ་སྲུང་ཙམ་ཡིན་ཞེས་དྲིས་ཚེ་ངོ་སྲུང་གཏན་ནས་མ་ཡིན་གྱི།   ཁོ་བོ་རང་གི་ལུགས་ཡོན་ཞེས་བརྗོད་པ་ལས་ཐབས་གཞན་མེད་མོད།   ཁས་ལེན་དེ་འདྲ་བུ་ལོང་མ་འཇིགས་ནས་དབང་མེད་དུ་ཁས་བླངས་པ་ལས།   སེམས་ཀྱི་སྟེང་ནས་ཡིད་ཆེས་ཅུང་ཟད་ཀྱང་མེད་པ་བཞིན་དུ།   མེ་ཡིས་ཚིགཆུ་ཡིས་གྲང་།   རླུང་གི་བསྐྱོད་པ་སོགས་བུ་ལོང་མ་དང་འདྲ་བས་ཕྱི་རོལ་གྱི་ནུས་པ་འདི་དག་དབང་མེད་དུ་ཁས་ལེན་དགོས་པར་བདེན་མོད།   རང་ལུགས་ལ་ཁས་ལེན་མི་དགོས་པའི་ཁྱད་པར་ཕྱེད་དགོས་ཞེས་གསུངས་པ་བཞིན་ལག་པ་མེ་དང་འཕྲད་ཚེ་ཨ་ཚ་ཚ་ཟེར་བ་དེ་སོ་སྐྱེ་གཉིས་སྣང་ཅན་གྱི་ངོར་བསླུ་མེད།   བསྙོན་མེད།   ཁས་ལེན་ཡིན་ལ།   དེ་བཞིན་ལག་པ་ཤ་ཡིན་པས་མེ་ལ་ཐུག་ན་ཅི་ལ་མི་ཚ་ལྟ་བུ་རྒྱུ་མཚན་དང་སྦྱར་བ་འདི་ཀོ་མཁས་པ་ལུགས་ཀྱི་ལུང་རིགས་ཀྱིས་གྲུབ་པའི་ཚད་མ་ཡིན་མོད།   འོན་ཏེ་གཉིས་སྣང་ནུབ་པའི་རྣམ་པ་ཐམས་ཅན་མཁྱེན་པའི་ཡེ་ཤེས་ཀྱི་མདུན་སར།   ཚ་ཡུལ་དང་ཚ་བྱེད་གང་ཡང་མ་གྲུབ་པར་མཉམ་པ་ཉིད་དུ་གྱུར་པའི་རྒྱུ་མཚན་གྱིས་ཟབ་མོ་ཆོས་ཀྱི་དབྱིངས་ལ་འཇུག་པའི་ཐབས་མཆོག་དབུ་མ་ཐལ་འགྱུར་བ་ལ་ཚད་མ་གྲུབ་པ་མེད་ལ་ཁས་ལེན་ཀྱང་ཅི་ཡང་མེད་པར་བརྗོད་དོ།། 

  དབུ་མ་ཐལ་འགྱུར་བའི་ལུགས་ལ་ཁས་ལེན་མེད་ཅེས་བཞེད་པ་ལ།   རང་ངོའི་དང་གཞན་ངོའི་རྣམ་གཞག་གསལ་པོར་ངེས་ཐུབ་ན་ཁས་ལེན་མེད་པ་དེ་ཉིད་ཀྱང་བློ་གྲོས་ཆེན་པོའི་སྤྱོད་ཡུལ་ཉག་གཅིག་ཡིན་པ་ཤེས་ཐུབ་སྟེ།   དགེ་འདུན་ཆོས་འཕེལ་ནས།   གཞན་ངོར་ཁས་བླངས་པའི་རྣམ་གཞག་འདི་མེད་ན།   སྣང་སྲིད་དག་པ་རབ་འབྱམས་སུ་ཤར་བའི་སངས་རྒྱས་དང་ཐམས་ཅད་མ་དག་ཟག་བཅས་སུ་ཤར་བའི་སོ་སྐྱེ་གཉིས་ཀྱི་བར་དུ་ཆོས་ཚིག་གཅིག་སྨྲ་བའི་སྐལ་བ་ག་ལ་ཡོང་ཞེས་གསུངས་ཏེ།   སོ་སྐྱེ་རང་ལ་འཆར་ཚུལ་ཇི་ལྟ་བ་བཞིན་དུ་ཁས་བླངས་པའམ་ཡིད་ཆེས་པ་དེ་སོ་སྐྱེའི་རང་ལུགས་ཀྱི་ཁས་ལེན་ཡིན་ལ།   སྣང་ཚུལ་དང་གནས་ཚུལ་མི་མཐུན་པ་ཁས་ལེན་པ་དེ་འཕགས་པས་སོ་སྐྱེའི་སྣང་ཚུལ་ལྟར་ཁས་ལེན་པ་དེ་གཞན་ངོའི་ཁས་ལེན་ཡིན།   སྣང་བ་དེ་ཀའི་སྟེང་དུ་སྣང་བའི་བདེན་བཞི་ལམ་ལྔ་སོགས་ཁས་ལེན་པ་དོན་ལ་འཁྲུལ་སྣང་ཁས་ལེན་པ་ཡིན་མོད་ཀྱི།   འཁྲུལ་སྣང་གི་རིམ་པ་འདི་ལ་མ་བརྟེན་པར་མཐར་ཐུག་གི་གནས་སུ་བགྲོད་པའི་ལམ་མེད་པས་ན།   ཡིད་ལ་ཁས་ལེན་མེད་པར་ཐག་ཆོད་ཅིང་ཁ་ནས་རྣམ་གཞག་སྣ་ཚོགས་ཁས་ལེན་དགོས་ཏེ།   ཆོས་རྣམས་གཟིངས་དང་འདྲ་ཤེས་ནས་བརྗོད་པ་ལྟར་འཁོར་བའི་ཆུ་བོའི་ཕ་རོལ་དུ་བསླེབས་ཚེ།   ས་བཅུ་ལམ་ལྔ་སོགས་ཆོས་ཀྱི་གྲུ་གཟིངས་དེ་ཉིད་འཁོར་བ་དང་ལྷན་ཅིག་ཏུ་སྤང་བར་བྱ་དགོས་པའི་ཕྱིར་རོ།།    རྒྱུ་མཚན་དེ་ལྟ་བས་ན་སྣང་བ་ཐ་སྙད་དུ་ཁས་ལེན་པ་ནི་སོ་སྐྱེའི་སྣང་ཚུལ་ལྟར་གྱི་ཁས་ལེན་ཡིན་གྱི།   དོན་དམ་པར་ཁས་ལེན་མེད་པ་ནི་ཟབ་མོ་དབུ་མའི་ངང་ཚུལ་མཐར་ཐུག་པ་ཡིན་ནོ།། 

དེ་ཡང་ཐ་སྙད་དུ་ཡོད་པ་ཁས་མ་བླངས་ན་དགག་བྱ་ཁྱབ་ཆེ་བས་ཆད་ལྟར་ལྷུང་བར་དོགས་པའི་དགེ་བཤེས་ཤེར་རྒྱམ་སོགས་དགེ་ལྡན་ལུགས་བཟང་གཙང་མར་འཛིན་པའི་མཁས་པའི་མཁས་པ་དག་ནས་ལུང་རིགས་གཉིས་ལྡན་གྱི་སྒོ་ནས་ཀླུ་སྒྲུབ་དགོངས་རྒྱན་ལ་དགག་པ་མཛད་ཡོད་དེ།   དགག་ཡིག་མི་འཇིགས་སེང་གེའི་ང་རོར།   དཔྱད་ན་ཏིལ་འབྲུའི་ཆ་ཡང་མི་རྙེད་དེ།   བརྟག་བཟོད་ཁས་ལེན་བྲལ་བ་དངོས་པོའི་གཤིས།།    ཐ་སྙད་རྟེན་ཅིང་འབྲེལ་འབྱུང་མི་བསླུ་བས།།   ཡོད་ཀྱང་བདེན་པར་མེད་པ་ཀླུ་སྒྲུབ་ལུགས།།    ཞེས་དང་།   ཁས་ལེན་མེད་པའི་གསུང་ཟིན་མང་ན་ཡང་།   ཁལ་ལེན་ཡོད་པ་རྒྱལ་བའི་དགོངས་པ་ཡིན།།    ཁས་ལེན་མེད་ལ་ཐམས་ཅད་མ་རུང་ཞིང་།།    ཁས་ལེན་ཡོད་ལ་རུང་བར་ཀླུ་སྒྲུབ་བཞེད།།    ཅེས་རྗེའི་ལྟ་བའི་སྙིང་པོ་མདོར་དྲིལ་གོ་སླའི་ངང་ནས་བརྗོད་ཡོད།   དེང་གི་མཁས་པ་འགའ་ནས་བསྟན་པའི་ལ་རྒྱ་སྲུང་བའི་ཆེད་དུ་ཀླུ་སྒྲུབ་དགོངས་རྒྱན་ལ་རྒྱུད་རིམ་ལྡན་པའི་སྒོ་ནས་ཞིབ་ཏུ་མི་དཔྱད་པར་ཚིག་སྣ་ཐན་ཐུན་རེ་སྤར་འཛིན་བྱས་ཏེ་སུན་འབྱིན་བྱེད་ཁུལ་མང་སྟེ།   ཐལ་འགྱུར་བ་ཁས་ལེན་ཡོད་པར་ཐལ།   རང་ལུགས་ཀྱི་གཞི་ལམ་འབྲས་གསུམ།   དཀོན་མཆོག་གསུམ།   འཁོར་འདས་ཀྱི་རྣམ་གཞག་ཚང་མ་རྒྱལ་བའི་དགོངས་པ་ཇི་ལྟ་བ་བཞིན་དུ་ཁས་ལེན་པའི་ཕྱིར་ཞེས་དང་།   ཐལ་འགྱུར་བ་ལ་ཁས་ལེན་ཡོད་པར་ཐལ།   ཁས་ལེན་མེད་པར་ཁས་ལེན་པ་གང་ཞིགདེ་ཡང་ཁས་ལེན་པའི་ཕྱིར་དང་།   ཐལ་འགྱུར་བ་ལ་ཁས་ལེན་ཡོད་པར་ཐལ།   ཁས་ལེན་མེད་པར་ཁས་ལེན་པ་གང་ཞིག།   དེ་ཡང་ཁས་ལེན་པའི་ཕྱིར་དང་།   ཐལ་འགྱུར་བ་ལ་ཁས་ལེན་ཡོད་པར་ཐལ།   ཁས་ལེན་མེད་པར་ཁས་ལེན་པ་གང་ཞིགདེ་ཡང་ཁས་ལེན་པའི་ཕྱིར་ཞེས་ཐལ་འཕྲེང་འཕྲེན་པ་འདུག་མོད།   དེ་ལ་དགེ་ཆོས་ཀྱི་ཀླུ་སྒྲུབ་དགོངས་རྒྱན་ཞིབ་ཏུ་མ་བལྟས་པའི་སྐྱོན་འབབ་སྟེ།   གཞུང་དེར་ཁས་ལེན་མེད་པ་ཉིད་ཆོས་ཅན་དུ་བྱས་ནས་ཁས་ལེན་ཡིན་མིན་སོགས་དཔྱད་པ་ཕན་ཆད་ཀུན་རྫོབ་དཔྱོད་པའི་སྐབས་ཡིན་ཞེས་དང་།   དོན་དམ་པ་ལ་དཔྱོད་པའི་སྐབས་སུ་ཁས་ལེན་མེད་ཅེས་སྨྲས་པ་དེ་ག་རང་ཁས་ལེན་ཡིན་སོགས་བརྗོད་པ་ནི།   ང་མནལ་ལམ་དུ་འགྲོ་བས་ཅི་ཡང་མ་སྨྲས་ཞིག་བརྗོད་པ་ན།   ཁ་ལ་མ་ཉན་པར་མནལ་ལམ་དུ་འགྲོ་བས་ཅི་མ་སྨྲས་ཞིག་བརྗོད་པ་དེ་ག་རང་མནལ་དུ་མི་འགྲོ་བའི་རྟགས་ཞེས་ཀྱལ་ཀ་བྱེད་པ་དང་འདྲ་བས་སྙིང་པོ་ཅི་ལ་ཡོད་ཅེས་དང་།   ཁས་ལེན་མེད་པའི་སྔ་རྒོལ་མཉམ་བཞག་སྨྲ་བྲལ་གྱི་ངང་དུ་བཞུགས་པ་ལ།   ཁས་ལེན་ལྡན་གྱི་ཕྱི་རྒོལ་གྱིས་ལུང་རིགས་ཀྱི་སྒོ་ནས་རྩོད་པ་བྱེད་ཚེ་ལན་གང་བཏབ་ཐམས་ཅད་ཁས་ལེན་ཤ་སྟག་ཏུ་འགྱུར་བས་ཁས་ལེན་མེད་པའི་ལྟ་བ་འདི་ཚིག་དང་སྒྲ་དང་ཁྱད་པར་རྟོག་གེ་རིག་པའི་ནང་དུ་ཤོང་བའི་གནས་མེད་པ་ཡིན་ནོ།   ཞེས་དང་།   སོ་སོའི་སྐྱེ་བོའི་རྣམ་རྟོག་ལ་རྩ་བ་གཏད་པའི་ཚུལ་གསུམ་རྟོག་གེའི་རིགས་པ་ནི་རང་གིས་རང་ཉིད་གཞོམ་པའི་ཐབས་ཙམ་བྱས་ན་བཟང་མོད།   ཁས་ལེན་མེད་པའི་ལྟ་བ་ལ་གནོད་པའི་ལག་ཆ་བྱེད་ན་ཆོས་ཀྱི་དབྱིངས་ལ་འཇུག་པའི་ཐབས་མེད་པ་སློབ་དཔོན་ཕྱོགས་ཀྱི་གླང་པོས་ཚད་མ་ཀུན་བཏུས་སུ་ཆེས་ཤིན་ཏུ་གསལ་བར་གསུངས་སོ་ཞེས་པ་སོགས་ལ་མཉམ་འཇོག་མ་བྱས་པ་དང་།   དབུ་མ་པ་ལ་ཁས་ལེན་མེད་ཅེས་བརྗོད་པ་དེ་ཉིད་ནི་དབུ་མ་པའི་ཁྱད་ཆོས་གཙོ་བོ་སྟེ།   གཞན་ཕྱོགས་མ་ལུས་པ་འགོག་པ་མ་ཟད་རང་གི་ཕྱོགས་ཀྱང་དེ་དང་མཐུན་པའི་རིགས་པ་དེ་ཉིད་ཀྱིས་དགག་པ་བྱེད་པའི་གནད་གསང་གཙོ་བོ་ལ་ཐུགས་མཉམ་མ་བཞག་པའི་སྐྱོན་དུ་སྣང་ངོ།། 

   དེ་ལྟ་བས་ན།   རྗེའི་ལུགས་ཀྱི་ལྟ་དགོངས་ལ་ཐབས་ཤེས་གཉིས་ལས་ཐབས་ཚུལ་གྱིས་ཁྱད་དུ་འཕགས་ཏེ།   གདུལ་བྱའི་བློ་དང་བསྟུན་པའི་གཞུང་ལུགས་ཀྱི་སྐས་རིམ་ཞིག་མཐར་ཐུག་འབྲས་བུ་ཆེན་པོའི་གཞལ་ཡས་སུ་བསྲིང་ཡོད་པའི་ཕྱིར་དང་།   སྔ་རབས་ལུགས་འཛིན་མཁས་དབང་རྣམས་ཀྱི་ལྟ་དགོངས་འདི་རིགས་པ་ཁོ་ནས་དཔྱད་དེ་བཞག་པའི་ལུགས་སུ་སྣང་བས་ཐབས་ཤེས་གཉིས་ལས་ཤེས་རབ་ཀྱིས་ཁྱད་དུ་འཕགས་ཏེ།   རྣམ་དཔྱོད་ཆེན་པོའི་སྤྱོད་ཡུལ་གཙོ་ཆེར་དགོངས་ནས་གཞུང་ལུགས་ཀྱི་རྣམ་གཞག་མཛད་པའི་ཕྱིར་ན།   མཐར་ཐུག་བློ་ཟད་ཆོས་འདས་ཀྱི་གོ་འཕང་དུ་མྱུར་མགྱོགས་འཕུར་གྲུ་ཞིག་བརྟེན་པ་དང་ཁྱད་མེད།   དེ་ཡང་སྔ་མ་ནི་ཡོངས་ཁྱབ་ཀྱི་རང་བཞིན་ཡོད་ལ།   ཕྱི་མ་ནི་བྱེ་བྲག་གི་རང་བཞིན་ལྡན།   ཕྱོགས་གཉིས་ལ་རང་སོ་སོའི་དགེ་མཚན་གྱི་ཆ་ཡོད་པས་ན་གཅིག་གི་ཚབ་གཅིག་གིས་བྱེད་མི་ཐུབ་ལ་བཟང་ངན་གྱི་ཁྱད་པར་ནི་དེ་བས་ཀྱང་དབྱེར་དུ་མེད་དོ།།   

བཞི།   བདེན་གཉིས་དཔྱད་པའི་སྐོར།  

དབུ་མ་འཇུག་པའི་རིག་པ་འདི་ཀོའི་ཚན་རིག་རང་བཞིན་གྱི་རིགས་ལམ་གསུམ་སྟེ།   གཞི་དབུ་མ་བདེན་གཉིས་ཟུང་འཇུགལམ་དབུ་མ་ཐབས་ཤེས་ཟུང་འཇུགའབྲས་བུ་དབུ་མ་སྐུ་གཉིས་ཟུང་འཇུག་སྟེ།   རྒྱུད་རིམ་ལྡན་ཅིང་ཕན་ཚུན་གཅིག་ལ་གཅིག་རྟེན་གྱི་ཚུལ་གྱིས་དབུ་མ་རིག་པའི་མ་ལག་འཐུས་ཚང་ཅད་དུ་གྲུབ་ཡོད།   གཞི་དབུ་མ་ནི་ལྟ་བ་གཏན་ལ་འབེབས་བྱེད་ཀྱི་རིགས་པ་སྟེ།   གཞུང་ལུགས་ཀྱི་རང་བཞིན་ལྡན་ལ།   ལམ་དབུ་མ་ནི་སྒོམ་པ་ཉམས་སུ་ལེན་བྱེད་ཀྱི་རིག་པ་སྟེ་ལག་བསྟར་གྱི་རང་བཞིན་ལྡན།   འབྲས་བུ་དབུ་མ་ནི་མཐར་ཐུག་འཚང་རྒྱ་བའི་རིག་པ་སྟེ་དམིགས་བྱ་མངོན་འགྱུར་གྱི་རང་བཞིན་ལྡན་ནོ།།    དེས་ན་བདེན་གཉིས་ཀྱི་རྣམ་གཞག་ནི་དབུ་མའི་རྨང་རྡོ་ཡིན་ལ་དབུ་མར་འཇུག་པའི་སྒོ་ཡང་ཡིན་པས་ན་སྔ་ཕྱི་མཁས་པ་རྣམས་ནས་ཕྱོགས་འདིར་ཕྲ་ཞིབ་རིགས་པའི་འཇུག་པ་ཧ་ཅང་མང་ལ་དེ་བསྟུན་གྱི་རིགས་པའི་བགྲོ་གླེང་ཡང་མི་ཉུང་བ་ཞིག་བྱུང་།   བདེན་གཉིས་རེ་རེ་ནས་ངོས་འཛིན་ཇི་ལྟར་མཛད་སྙམ་ན།   ཇི་ལྟ་བའི་གནས་ལུགས་གང་ཞིགམཉམ་བཞག་བློ་འདས་ཡེ་ཤེས་ཀྱི་ཡུལ་དུ་གྱུར་བ་ལ་དོན་དམ་བདེན་པ་དང་།   ཇི་སྙེད་པའི་སྣང་ཚུང་གང་ཞིགམཐོང་བ་ཐ་སྙད་པའི་བློ་ཡི་ཡུལ་དུ་གྱུར་བ་ལ་ཀུན་རྫོབ་བདེན་པ་ཞེས་བརྗོད་ལ།   དེ་གཉིས་ཟུང་དུ་འབྲེལ་བ་ནི་ཆོས་ཀུན་སྣང་བའི་ཆ་ནས་ཀུན་རྫོབ་ཏུ་བརྗོད་ལ་སྟོང་པའི་ཆ་ནས་དོན་དམ་དུ་བརྗོད།   དཔེར་ན་ཆུ་ནང་གི་ཟླ་བ་བཞིན་སྣང་བའི་ཆ་ནས་སྟོང་པའི་ཆ་ནས་སྣང་བའོ།   སྣང་སྟོང་ཟུང་འཇུག་གམ་བདེན་གཉིས་ཟུང་དུ་འཇུག་པ་ནི་འགལ་བ་ཡིན་ལ་གཅིག་གྱུར་ཀྱང་ཡིན་པས་ན་འདི་ཀོའང་མཚན་ཉིད་རིག་པའི་གཞལ་ཡས་ཁང་གི་རྒྱ་ཕིབས་སུ་བསྔགས་པའི་རྩོད་སྒྲུབ་སྨྲ་བའི་ཡང་སྙིང་དུ་གྲུབ་བོ།   སྤྱིར་བདེན་གཉིས་ཀྱི་དོན་གཏན་ལ་འབེབབས་ཚུལ་སྔ་ཕྱི་མཁས་དབང་དག་ནས་ཚིག་ཟིན་མི་འདྲ་བ་ཅུང་རེ་ཡོད་པ་ལས་མཐར་ཐུག་མདོ་དོན་གཅིག་ཏུ་འབབ་མོད།   བདེན་གཉིས་ལས་འཕྲོས་པའི་ལྟ་བ་འཛིན་མཚམས་མི་འདྲ་བ་མང་སྟེ།   བདེན་པ་གཉིས་ལས་གང་ཞིག་གཙོ་བོ་འཛིན་པ་དང་།   ཀུན་རྫོབ་ཏུ་ཡོད་པ་དང་དོན་དམ་དུ་མེད་པ་ཞེས་པའི་གོ་བ་ལེན་ཚུལ་མི་འདྲ་བ།   དོན་དམ་པར་མེད་པས་མེད་གོ་ཆོད་མིན་དང་ཀུན་རྫོབ་ཏུ་ཡོད་པས་ཡོག་གོ་ཆོད་མིན་སོགས་ཀྱི་རིགས་པའི་དཔྱད་ཚུལ་ཁྱད་པར་ཅུང་ཆེ་བ་ཡོད་དེ།   སྐབས་བབ་དགེ་འདུན་ཆོས་འཕེལ་ཚང་དབང་རྣོན་རིགས་པའི་རྗེས་འབྲང་ཞེས་བརྗོད་པ་ལྟར་སྔ་ཕྱི་མཁས་པའི་བཞེད་སྲོལ་ཡོད་རྒུ་རང་གི་རིགས་པའི་སྲང་མདའ་རུ་བཀྱགས་ཏེ་དཔྱད་པ་བྱས་པ་ལས་སྔ་ཕྱིའི་ལུགས་གང་ལའང་གྲགས་པའི་རྗེས་སུ་མ་འབྲང་སྟབས་ཀླུ་སྒྲུབ་དགོངས་རྒྱན་གྱི་དབུ་ནས་ཞབས་སུ་བསྡུ་བའི་དོན་ཀུན་རིགས་པ་རྣམ་དག་གི་དྲི་བསུང་འཐུལ་ཞིང་གཟུར་གནས་མཁས་པའི་ཁྱད་ཆོས་མངོན་པར་དོད་ཡོད།   སྐབས་སྐབས་སུ་སྔ་ཕྱི་མཁས་པའི་བཞེད་སྲོལ་བཀོད་དེ་རང་གི་ཐུགས་སུ་མ་སོང་བའི་རིགས་སྔ་ཕྱིའི་ལུགས་གང་དུ་སོང་རུང་ངོ་སྲུང་ཚུལ་འཆོས་ཀྱི་གཤིས་ངན་རྦད་དེ་བསྐྱུར་ནས་བདེན་པ་བདེན་ཐུབ་སྒོས་སུན་འབྱིན་མཛད་དེ་རང་བཞེད་གསལ་བརྗོད་བྱུང་ཡོད།   ཁོང་གི་གྲུབ་མཐའ་ལམ་ལུགས་ཕྱོགས་ཀྱི་རྒྱ་ལས་འགོང་པའི་ཞིབ་འཇུག་བྱེད་ཐབས་དེ་མཐའ་གཅིག་ཏུ་རང་ལུགས་གཙང་མ་གཙིགས་སུ་འཛིན་པར་དགའ་བའི་སྲོལ་རྒྱུན་གྱི་མཁས་པའི་མདུན་སར་མཛེས་པ་མ་གྱུར་སྟབས།   ཁོང་ལ།   གང་དུའང་མི་གཏོགས་གིའང་སྲོལ་མིན་ཏེ།   རྙིང་མ་མ་ཡིན་རྙིང་མ་གནད་ཀྱིས་དབེན།   གསར་མ་མ་ཡིན་གསར་མའི་སྲོལ་དང་འགལ།   ཀུན་གྱི་ལུང་རིགས་རྡོ་ཆ་འབེབས་པའི་ཡུལ།   ཀུན་ནས་ཀུན་ཏུ་རྣམ་པ་འཁྱམས་པ་ཡིན།།    ཞེས་པ་ལྟ་བུའི་ཚིག་མི་ཉུང་བ་ཞིག་ཕོག་མོད།   ཡིན་ན་ཡང་གྲུབ་མཐའ་འམ་ལུགས་ཕྱོགས་ཀྱིས་བློ་མིག་མ་ལྡོང་བའི་གཟུར་གནས་པའི་སྣང་ངོར་དགེ་འདུན་ཆོས་འཕེལ་གྱི་ཚུལ་ལུགས་འདི་ཀོ་ནི།   ཁོང་གི་ཐུགས་སྲས་ཟླ་བ་མཚན་ཅན་གྱིས།   གངས་ཅན་གསར་རྙིང་དམ་པ་གོང་མ་ཡི།།    བཞེད་སྲོལ་གཅིག་ཏུ་དྲིལ་བའི་ལེགས་བཤད་འདི།།    ཁོ་བོའི་བླ་མའི་ཐུགས་རྗེའི་དགོངས་ཀློང་ནས།།    མཁྱེན་པའི་ཉི་མ་ཕྱོགས་སུ་འཆར་བའི་ཚེ།   དམུས་ལོང་ལོག་རྟོག་སྙིང་ལ་གཟན་ན་ཡང་།   མིག་ལྡན་བློ་ཡི་གེ་སར་འཛུམ་པར་གྱུར།།    ཞེས་བརྗོད་པ་དེ་དེ་བཞིན་དུ་འདུག་སྙམ་མོ།།   

  ༡.བདེན་པ་གཉིས་ལས་གང་ཞིག་གཙོ་བོར་འཛིན་པའི་ཐད།   དེ་ཡང་བདེན་པ་གཉིས་ལས་ཀུན་རྫོབ་བམ་དོན་དམ་གང་ཞིག་གཙིགས་སུ་འཛིན་པ་ལ་སྔ་ཕྱི་བཞེད་ཚུལ་མི་འདྲ་བ་ཁ་ཤས་མཆིས་ཏེ།   སྣང་བ་ཀུན་རྫོབ་ནི་འཁྲུལ་བའི་སྣང་བ་ཁོ་ན་ཡིན་པས་སྤང་བྱ་ཡིན་ཞིང་སྟོང་ཉིད་དོན་ནི་མ་འཁྱུལ་བ་ཡང་དག་ཡིན་པས་དེ་ཉིད་ཐུགས་ཞེན་ཆེ་བའི་ཚུལ་གྱིས་རྣམ་གཞག་མཛད་པ་ནི་བོད་སྔ་རབས་པ་ཁ་ཅིག་གི་ལུགས་ཡིན།   ཐ་སྙད་ཀུན་རྫོབ་ཁོ་ན་ཙམ་གྱི་ངོས་ནས་མདོ་སྔགས་རྒྱུད་སྡེ་གོང་འོག་གི་ལྟ་བ་ཡི་མཐོ་དམན་གྱི་ཁྱད་པར་མཛད་ཆོག་པས་སྟོང་པའི་དབྱིངས་ཕར་བཅད་ནས་ཀུན་རྫོབ་བདེན་པ་གཙིགས་སུ་འཛིན་པའང་བོད་སྔ་རབས་པ་ཁ་ཅིག་གི་ལུགས་ཡིན།   སྤྱིར་གནས་ལུགས་སྣང་སྟོང་བདེན་གཉིས་ཟུང་དུ་འཇུག་པ་བཞེད་ཀྱང་།   དོན་དམ་དཔྱོད་པའི་རིགས་པ་གང་གིས་ཀྱང་སྣང་འགོག་མི་རུང་སྟེ།   འགོག་ན་ཐ་སྙད་ལ་བསྐུར་བ་བཏབ་ཅིང་ཆད་པའི་ལྟ་བར་འགྱུར་བར་དོགས་པའི་ཆ་ནས་ཀུན་རྫོབ་རྟེན་འབྲེལ་གྱི་སྣང་བ་ནས་ཡང་ཡང་དུ་བརྗོད་པའི་ལུགས་ནི་བོད་ཕྱི་རབས་རྗེ་བཙུན་ཙོང་ཁ་པ་ཆེན་པོའི་ལུགས་ཡིན།   སྣང་བ་ཐ་སྙད་བདེན་པ་དང་སྟོང་པ་དོན་དམ་བདེན་པ་གཉིས་ནི་སྣང་བ་ཐབས་དང་སྟོང་པ་ཐབས་ལས་བྱུང་བ་ཉིད་དུ་འཆར་སྟེ་གཅིག་ཤོས་ཡོད་པར་གྱུར་ན་ཅིག་ཤོས་མེད་པ་ཉིད་དུ་མི་སྲིད་པས་ཆུ་དང་རླན་ལྟར་ཡེ་ནས་འདུ་འབྲལ་མེད་པར་གནས་པས་སོ་སོར་བྱར་མེད་པ་དེ་ཡི་ཕྱིར་ན།   གཞི་ལམ་འབྲས་གསུམ་གང་ལ་ཡང་སྣང་བ་དང་དེའི་སྟོང་པ་ཉིད་དག་སོ་སོའི་ཆར་ནས་གཉིས་འཛིན་ཅན་སོ་སྐྱེའི་ངོར་གྲུབ་ཅིང་།   གནས་ལུགས་ཀྱི་དོན་དུ་ནམ་ཡང་སོ་སོར་དབྱེ་བ་ཡེ་ནས་མེད་པས་སྣང་སྟོང་ཟུང་འཇུག་ཅེས་བཞེད་པ་ནི་འཇུ་མི་ཕམ་གྱིས་མཚོན་པའི་སྔ་འགྱུར་རྙིང་མ་བའི་མཁས་གྲུབ་དག་གི་དགོངས་པ་ཡིན།   དེ་དང་ཧ་ཅང་མཐུན་ཤས་ཆེ་བ་ནི་མཁས་པའི་ཁྱུ་མཆོག་གོ་ཤཱཀ་སྟག་གསུམ་གྱིས་མཚོན་པའི་སྔ་རབས་ལུགས་འཛིན་པའི་ལྟ་དགོངས་ལགས་ཏེ།   སྟོང་བཞིན་དུ་སྣང་ལ་སྣང་བཞིན་དུ་སྟོང་བས་ན་སྣང་སྟོང་ཟུང་དུ་འཇུག་ལ།   སྣང་བ་དེ་ཉིད་ཀྱང་ཡེ་ནས་སྟོང་པ་ཉིད་ཡིན་པའི་གནད་ཀྱིས་རྟེན་འབྱུང་དུ་རང་སྣང་བ་ཡིན་པ་དང་།   སྟོང་པ་ཡིན་ལུགས་ནི་ཆོས་ཐམས་ཅད་རྟེན་འབྱུང་དུ་སྣང་རང་བཞིན་གྱིས་གྲུབ་པ་རྡུལ་ཙམ་ཡང་མེད་པའི་ཆ་ནས་སྟོང་པ་ཉིད་དང་།   ཇི་སྙད་དུ།   རྟག་ངུའི་རྟོགས་བརྗོད་ལས།   ཆོས་རྣམས་རྡུལ་ཙམ་དམིགས་པ་མེད་ན་ཡང་།།    མངོན་པར་ཞེན་རྣམས་སྐྲག་པ་སྤང་པའི་ཕྱིར།།    གཞན་ངོར་རྟེན་འབྲེལ་ཙམ་ཞིག་ཁས་ལེན་ལ།   ཞེས་གསུང་པ་སྟར།   དོན་དམ་པར་ཡོད་མེད་སོགས་སྤྲོས་པའི་མཐའ་བརྒྱད་དང་བྲལ་བས་བློས་གང་དུའང་འཛིན་མི་རུང་བ་མ་ཟད།   འཕགས་པའི་ཡེ་ཤེས་ཀྱི་སྤྱོད་ཡུལ་དུའང་མེད་དེ།   མཉམ་པ་ཉིད་ལས་ཡུལ་དང་ཡུལ་ཅན་ཞེས་འབྱེད་དུ་མེད་པའི་ཕྱིར་དང་།   ཐ་སྙད་ཀུན་རྫོབ་ཏུ་རང་བཞིན་གྱིས་གྲུབ་པ་ཁེགས་ཀྱང་ལས་འབྲས་ལ་སོགས་བྱ་བྱེད་ཐམས་ཅད་གཞན་ངོ་ཙམ་ཁས་ལེན་ཡོད་དོ།།    དེ་ལྟར་བདེན་གཉིས་ལས་འཕྲོས་པའི་ཚུལ་དེ་ཉིད་སྔ་རབས་ལུགས་འཛིན་གོ་ཤཱཀ་སྟག་གསུམ་དང་ཕྱི་རབས་རྗེ་ཙོང་ཁ་པའི་བཞེད་དགོངས་ཟུང་ནི་ཅུང་ཚབ་མཚོན་རང་བཞིན་ཅན་དུ་གྲུབ་ལ་ཕན་ཚུན་བར་རིགས་པའི་གླེང་ཀ་ཡོང་སའི་གཙོ་གནད་ཀྱང་འདི་ཉིད་ཡིན་ཏེ།   རྗེ་བློ་བཟང་གྲགས་པས་ཚེ་སྟོད་སྔ་རབས་པའི་བཞེད་དགོངས་འདི་ཀོ་ཞལ་གྱིས་བཞེས་ལ།   ཕྱིས་ན་དེ་ལ་ཐེ་ཚོམ་ཟ་སྟེ་ཀླུ་སྒྲུབ་ཡབ་སྲས་ཀྱི་གཞུང་ལ་ཡང་ཡང་དཔྱད་ཅིང་རྗེས་བཙུན་འཇམ་པའི་དབྱངས་ཀྱི་བྱིན་རླབས་ཐུགས་རྒྱུད་དུ་འཕོས་ནས་ལྟ་བ་རང་མཚན་པ་འདི་ཀོ་གྲུབ་སྟེ།   འཁོར་འདས་ཀྱི་ཆོས་ཐམས་ཅད་རང་རང་གི་གདགས་གཞིའི་ངོས་ནས་དོན་དམ་པར་གྲུབ་པ་རྡུལ་ཙམ་ཡང་མི་དམིགས་ཀྱང་།   གདགས་གཞིའི་སྟེང་དུ་མིང་དང་རྟོག་པས་ཕར་བཞག་ཙམ་དེ་ཐ་སྙད་དུ་ཚད་མས་གྲུབ་ལ།   ཆོས་རྣམས་རང་རང་གི་ངོ་བོས་སྟོང་པའི་རྒྱུ་མཚན་གྱིས་ཐ་སྙད་དུ་ཆོས་དེ་དང་དེར་གྲུབ་ཅིང་བྱ་བྱེད་སོགས་འཐད་ལྡན་དུ་ཡིན་པས།   རང་བཞིན་གྱིས་གྲུབ་པ་ཐ་སྙད་དུ་ཡང་ཁེགས་ཀྱང་ལས་འབྲས་ལ་སོགས་པའི་བྱ་བྱེད་ཐམས་ཅད་གཞན་ངོ་ཙམ་ལ་སྐྱེལ་མི་དགོས་པར་རང་ལུགས་ལ་ཡང་ཚད་གྲུབ་ཏུ་ཁས་བླངས་པས་ཆོག་པར་མ་ཟད།   རྟེན་འབྲེལ་གྱི་ཆོས་ལ་ངེས་པ་དྲངས་པ་ཉིད་ཀྱིས་རང་བཞིན་མེད་པ་ལ་ངེས་པ་ཆེར་འགྲོ་བས་སྟོང་པ་དང་རྟེན་འབྱུང་གཅིག་གྲོགས་སུ་གཅིག་འགྲོ་བའི་ཟབ་མོའི་དགོངས་པ་འདི་ཀོ་བསྟན་ནོ།།    དེ་བཞིན་སྔ་རབས་པའི་སྐྱོན་ཀྱང་དགག་བྱ་ཁྱབ་ཆེ་སྟེ།   འགོག་མཚམས་མ་ཟིན་པ་ཐལ་ཆེ་བར་སོང་བར་མཐོང་ཞིང།   དགག་བྱ་ཁྱབ་ཆེ་ན་ཆད་མཐར་ལྷུང་བ་དང་།   དོན་དམ་པ་འཕགས་པའི་མཉམ་བཞག་ཡུལ་མེད་དུ་འདོད་ན་བདེན་པ་གཉིས་ཀྱི་དབྱེ་གཞི་ཤེས་བྱ་མིན་པའམ་སངས་རྒྱས་ཇི་ལྟ་བ་ལས་ཇི་སྙེད་པའི་ཆོས་མི་མཁྱེན་པའི་སྐྱོན་འབབ་པ་དང་།   ཐ་སྙད་ཀུན་རྫོབ་ལ་ཁས་ལེན་མེད་ན་དབུ་མ་པ་ལ་རྒྱུ་འབྲས་ཀྱི་རྣམ་གཞག་སོགས་ཀྱང་ཁས་ལེན་དུ་མེད་པར་ཐལ་བ་སོགས་ཀྱི་སྐྱོན་འབབ་པ་མཐོང་བས་དེ་ལྟར་འདོམས་པར་མཛད་དོ།།    སྔ་རབས་ལུགས་འཛིན་གོ་ཤཱཀ་སྟག་གསུམ་དང་ཕྱིས་བྱོན་འཇུ་མི་ཕམ་པ་ཡབ་སྲས་སོགས་ནས་རྗེ་རིན་པོ་ཆེས་སྐྱོན་དུ་བཏོན་པ་དེ་སྐྱོན་དུ་མི་འགྲོ་ཚུལ་འདི་ལྟར་བརྗོད་ཡོད་དེ།   བོད་པ་སྤྲུལ་སྐུའི་ལྟ་གྲུབ་ཤན་འབྱེད་དུ།   རིགས་པའི་དགག་བྱ་ཁྱབ་ཆེས་པས།།    ཆད་ལྟར་འགྱུར་གྱི་དོགས་པ་དེ།   རྟེན་འབྱུང་མི་ཤེས་དངོས་སྨྲ་ལས།།    དབུ་མར་སྨྲ་རྣམས་དོགས་མི་འཚལ།།    ཐ་སྙད་ཚད་མས་ཀུན་རྫོབ་ཀྱི།།    སྣང་བ་བཀག་ཆད་ལྟར་ཟད།   དོན་དཔྱོད་ཚད་མས་དོན་དམ་པར།   ཆོས་ཀུན་བཀག་ཀྱང་ཅི་ཞིག་ཆད།།    རིགས་དེས་ཐ་སྙད་ཙམ་དུ་ཡང་།   སྐྱེ་སོགས་དཔྱད་བཟོད་མེད་པར་སྒྲུབ།   ཁས་ལེན་ཀུན་དང་བྲལ་བས་ན།   སྣང་བའི་སྤྲོས་པ་ཐད་ཀར་གཅོད།།    སྣང་ཀུན་མེད་སྣང་སྟོང་གཟུགས་དང་།   རྟོག་བཏགས་སྒྱུ་མའི་ངང་ཚུལ་དུ།   རྟོགས་ན་མི་འཆིང་དགག་མི་འཚལ།།    སྣང་བའི་ངང་ཚུལ་འགོག་མ་ལགས།།    ཚུལ་དེས་སྟོང་པ་རྟེན་འབྱུང་དུ།།    འཆར་བའི་ངེས་གསང་བླ་ན་མེད།།    གྲུབ་མཐའི་ཟབ་ཁྱད་ཀུན་གྱི་གཞི།།    ཚུར་མཐོང་ཕལ་གྱིས་མཁྱེན་མ་ལགས།།    ཞེས་ལུང་རིགས་གཉིས་ལྡན་གྱིས་སྐྱོན་སྤང་མཛད་དེ་གཞན་ངོར་རྒྱུ་འབྲས་སོགས་ཡོད་པས་ཆད་མཐར་མི་ལྷུང་བ་དང་།   ཁས་བླངས་ཐམས་ཅད་དང་བྲལ་བ་ཡིན་པས་གཞན་གྱི་ཀླན་ཀ་མི་འཇུག་པ་དང་།   ཐ་སྙད་དུ་ནི་འཕགས་པའི་མཉམ་བཞག་ཡུལ་ཅན་དང་།   ཆོས་ཀྱི་དབྱིངས་ཡུལ་དུ་བྱས་པ་ལ་བརྟེན་ནས་ཤེས་བྱ་ཡོན་ནོ་ཞེས་བརྗོད་རུང་གི་དོན་དམ་པར་གཟུང་འཛིན་མེད་པའི་མཉམ་བཞག་གིས་འདི་གཟུང་བྱའམ་ཤེས་བྱ་ཡིན་ཟེར་ན་ཚིག་དེ་དངོས་ཤུགས་གང་ནའང་འགལ་བ་ཡིན་པས།   བདེན་གཉིས་ཀྱི་དབྱེ་གཞི་ཤེས་བྱ་མིན་པར་འགྱུར་བའི་སྐྱོན་མི་འཇུག་པའི་ཚུལ་བརྗོད་དོ།།  

  དགེ་འདུན་ཆོས་འཕེལ་ནས་ཀྱང་བདེན་གཉིས་ཟུང་དུ་འཇུག་ཅིང་སྣང་བ་ཀུན་རྫོབ་མཐའ་གཅིག་ཏུ་དགག་ཏུ་མེད་པར་བཞེད་པ་ནི་ཐལ་རང་གཉིས་ལས་རང་རྒྱུད་པའི་ལྟ་བ་ལས་ཐལ་འགྱུར་བའི་ལྟ་བ་མཐར་ཐུག་མིན་པར་བརྗོད་དེ།   ཀླུ་སྒྲུབ་དགོངས་རྒྱན་དུ།   ཐལ་རང་གི་ལྟ་བའི་ཁྱད་པར་གྱི་རྩ་བ་ཡང་རང་རྒྱུད་ལ་རང་ལུགས་སུ་ཁས་ལེན་ཡོད།   དོན་དམ་པར་ཡོད།   བདེན་མེད་ཀྱང་ཡོད་པར་འདོད་པས།   བདེན་གཉིས་ཟུང་འཇུག་གི་ཁས་ལེན་དུ་གྱུར་བ་ཡིན་ལ།   ཐལ་འགྱུར་བ་ལ་ནི་ཇི་ཙམ་བདེན་མེད་དུ་མཐོང་བ་དེ་ཙམ་དུ་ཀུན་རྫོབ་ཀྱི་ཕྱོགས་རྣམས་སྒྱུ་མ་བཞིན་དུ་གྱུར་པ་བྱང་ཆུབ་སེམས་དཔའི་ས་བཅུའི་རྣམ་གཞག་དང་།།     ངེས་པ་ལྔ་ལྡན་གྱི་ལོངས་སྤྱོད་རྫོགས་སྐུ་སོགས་ཚད་མས་དཔྱད་ན་ཤིན་ཏུ་མ་གྲུབ་པ་འདི་དག་ཀྱང་ཁས་ལེན་པའི་སྐབས་ཡོད་པ་ཡིན་ནོ།   དེས་ན་ཇི་སྲིད་འཇིག་རྟེན་གྱི་རིགས་པ་ལ་སྙིང་ཐག་པ་ནས་ཡིད་ཆེས་ཡོད་པ་དེ་སྲིད་དུ་འཇིག་རྟེན་ལས་འདས་པའི་དོན་ལ་ཡིད་ཆེས་ཡོད་པ་ནམ་ཡང་མི་སྲིད་དེ།   ཟླ་བ་གྲགས་པས།   འཇིག་རྟེན་ལས་འདས་པའི་ཆོས་ནི་འཇིག་རྟེན་པ་དང་ནམ་ཡང་མཚུངས་པར་མི་རིགས་སོ་ཞེས་གསུངས་པ་ལྟར་རོ།།    འཇིག་རྟེན་གྱི་རིགས་པ་ལ་ཡིད་ཆེས་དགོས་ན་ལམ་བསྒོམ་པ་དོན་མེད་པར་འགྱུར་བའི་རྒྱུ་མཚན་དུ་བཅོམ་ལྡན་འདས་ཀྱིས་མིག་དང་རྣ་བ་སོགས་ནས་འཕགས་པའི་ལམ་བྱ་བའི་དབང་པོ་གཞན་ཞིག་ཡོད་པར་གསུངས་པས་ཚོགས་དྲུག་གི་རྣམ་ཤེས་འདི་དག་གི་སྟེང་ནས་འཁོར་བ་ཐོག་མ་མེད་པ་ནས་རྣམ་གཞག་ཐམས་ཅད་གཏན་ཕབ་ཟིན་པས་དུ་དུང་རྣམ་གཞག་འདི་ལ་རྩིས་སུ་བྱེད་དགོས་ན་སྟོང་པ་ཉིད་ལ་མོས་པའི་དགོས་པ་ཅི་ཞིག་ཡོད།   གཟུགས་སོགས་སྣང་བའི་ཆ་ལས་རིགས་པས་མི་གནོད་པ་དང་།   དེའི་རྒྱུ་མཐར་ཐུག་ཏུ་གྱུར་པའི་བདེན་འཛིན་མ་རིགས་པའི་ཞེན་ཡུལ་ལ་རིགས་པས་གནོད་པ་ཡོད་པའི་ཁྱད་ཕྱེ་བ་ནི་ཞིབ་ཏུ་རྩད་བཅད་ན་མ་རིག་པའི་ཞེན་ཡུལ་རྣམས་འཐད་ལྡན་དུ་ཡོད་པའི་ལུགས་ལས་འདའ་བ་མེད་ཅིང་།   སྟོང་ཉིད་རྟོགས་ཟིན་པ་དག་ལ་དགག་བྱའི་གཟུགས་དང་།   དགག་མི་དགོས་པའི་གཟུགས་གཉིས་ཀྱི་ཁྱད་པར་བཏོན་ཀྱང་འོས།   གོ་ཡང་ངེས་ཡིན་མོད།   གཟུགས་བདེན་གྲུབ་དང་།   གཟུགས་ཡོད་པ་གཉིས་བློ་རེ་རེ་མཉམ་དུ་འདྲེས་པས་ཐ་མལ་པ་རྣམས་ལ་འདི་ཙམ་བཀག་ནས་འདི་ཙམ་ཤུལ་དུ་བཞག་རྒྱུ་ཡིན་སོགས་ཀྱི་རྣ་གཞག་བྱས་པ་ནི་སྒྱུ་མའི་གླང་ཆེན་གྱི་སྣ་ཤུལ་དུ་བཞག་རྐང་ལག་དགག་པར་བྱེད་པ་དང་ཁྱད་ཅི་ཡོད་ཅེས་དང་།   ལས་དང་པོ་བ་རྣམས་ཀྱིས་བདེན་པར་མེད་བྱ་བའི་གོ་ལུགས་དེ་བུམ་པ་མེད་བྱ་བའི་གོ་ལུགས་དང་ཁྱད་པར་མེད་ཅིང་།   གོ་ལུགས་དེའི་དབང་དུ་བྱས་ཚེ་བུམ་མེད་རྟོགས་པའི་བློ་དེས་སྐད་ཅིག་གཉིས་པར་བུམ་པའི་དགག་གཞི་བློ་ལ་འཆར་བ་ལས་འོས་མེད་པས།   མཉམ་བཞག་གི་སྐབས་ན་ཀུན་རྫོབ་ཀྱི་སྣང་བ་མ་བྲལ་བར་བྱེད་དགོས་པ་འདི་བདེན་གཉིས་ཟུང་འཇུག་གི་དོན་ཡིན་ན་ཡ་ཆ།   ཞེས་དང་།   བདེན་གཉིས་འགལ་མེད་ཟུང་འཇུག་གི་ལུགས་འདི་མདོར་བསྡུས་ན།   སངས་རྒྱས་དང་སེམས་ཅན་གཉིས་རྟོགས་པ་གཉིས་འགལ་མེད་གཅིག་ཏུ་འདྲེས་པའི་ལུགས་སུ་སྣང་ལ་འདི་འདྲ་ཡིད་ཆེས་ན་འཁོར་འདས་བྱ་བ་ཚིགས་ཙམ་ལ་ཡིད་ཆེས་པའི་སྐབས་མེད་པ་ཡིན༎ཞེས་སོགས་གཞན་བརྗོད་ལ་ཟུར་ཟ་མཛད་པའི་སྒོ་ནས་བདེན་གཉིས་ཟུང་འཇུག་ཅེས་པ་ནི་དབུ་མའི་ལམ་གྱི་སྒོམ་བྱ་ཙམ་ལས།   ཐལ་འགྱུར་བའི་ལྟ་བ་མཐར་ཐུག་མིན་པ་དང་།   སངས་རྒྱས་དང་སེམས་ཅན་ཆོས་ཅན་མཐུན་སྣང་མེད་པས་གཞན་ངོར་ཁས་ལེན་ཙམ་དུ་ཟད་པར་བསྒྲུབས་སོ།།  

 ཇི་སྐད་དུ།   འཇིག་རྟེན་གྲགས་པའི་ཀུན་རྫོབ་མ་བརླགས་ཅིག་ཅེས་བརྗོད་པ་ལྟ་བུ་ལ་དོ་སྣང་མཛད་དྲགས་པའི་དབང་གིས།།    ཀ་བ་ཀ་བས་མི་སྟོང་ཀ་བ་བདེན་གྲུབ་ཀྱིས་སྟོང་།   བུམ་པ་བུམ་པས་མི་སྟོང་བུམ་པ་བདེན་གྲུབ་ཀྱིས་སྟོང་ཞེས་ཆོས་ཅན་ལ་བདེན་གྲུབ་ཀྱི་ཁྱད་པར་མ་སྦྱར་ཚེ་ཆད་མཐར་ལྷུང་བར་དོགས་པའི་ཕྱི་རབས་ལུགས་ལ།   དགེ་འདུན་ཆོས་འཕེལ་ནས་འཇིག་རྟེན་གྱིས་མི་གནོད་པ་ཤ་སྟག་ཁས་ལེན་དགོས་ན་འཇིག་རྟེན་གྱི་བསམ་པའི་མཐར་ཐུག་བདེན་འཛིན་ཡིན་པས།   དེས་མི་གནོད་པ་ཞིག་ཁས་ལེན་དགོས་ཀྱི།   གཟུགས་སྒྲ་སོགས་དབང་ཤེས་ཐ་མལ་པ་རྣམས་ཀྱི་ཡུལ་ཙམ་ཞིག་ཡོད་པར་ཁས་བླངས་པས་ཅི་ལ་ཕན།   ཞེས་དང་།   སློབ་དཔོན་ཟླ་བ་ནི་དོན་དམ་པ་འཆད་པ་ན་ཀུན་རྫོབ་ཀྱི་རྣམ་གཞག་ཐམས་ཅད་བཤིགཀུན་རྫོབ་བཤད་པའི་ཚེ་དོན་དམ་པའི་བདེན་པ་བཏང་སྙོམས་སུ་བཞག་ནས་འཇིག་རྟེན་གྱི་རིགས་སྟོབས་གང་ཆེ་བ་རྣམས་ཀྱི་རྗེས་འབྲང་བ་ཙམ་ཡིན་ལ།   འཇིག་རྟེན་ལས་འདས་པའི་ཡུལ་དང་ཡུལ་ཅན་གྱི་རྣམ་གཞག་ཐམས་ཅད་འཇིག་རྟེན་པའི་རིགས་པའི་ཁོངས་སུ་བསྡུས་ནས་གཏན་ལ་ཕབ་ནུས་ན་དབུ་མའི་ལམ་འཚོལ་དགོས་པའི་དོན་ཅི་ཞིག་ཡོད་ཅེས་ཟུར་ཟ་བྱས་ཡོད་པ་དང་།   བདེན་གཉིས་ལས་ཀུན་རྫོབ་སྣང་བ་གཙིགས་སུ་མ་མཛད་ཀྱང་ཕྱི་རབས་ལུགས་ཀྱི་དོགས་པར་སྐྱེ་གནས་ཏེ།   ཆད་མཐར་ལྷུང་མི་འགྲོ་བའི་རྒྱུ་མཚན་ཀྱང་དགེ་ཆོས་ཀྱིས་འདི་ལྟར་བརྗོད་ཡོད་དེ།   ཇི་སྲིད་ཀུན་རྫོབ་ཀྱི་སྣང་བ་མ་འགག་པ་དེ་སྲིད་དང་།   ཇི་སྲིད་རྣམ་ཤེས་ཀྱི་རྟེན་མ་བརྗེ་བར་དེ་སྲིད་དུ་བརྗོད་དེ།   ཇི་སྲིད་ཀུན་རྫོབ་ཀྱི་སྣང་བ་མ་འགག་པ་དེ་སྲིད་དང་།   ཇི་སྲིད་རྣམ་ཤེས་ཀྱི་རྟེན་མ་བརྗེ་བར་དེ་སྲིད་དུ་སྟོང་པ་ཉིད་མངོན་སུམ་དུ་རྟོགས་ཀྱང་།   སྔར་ཁས་བླངས་པ་དེ་དབང་མེད་དུ་ཁས་ལེན་དགོས་པ་འདི་ལ་རིགས་པས་སྒྲུབ་བྱེད་ཀྱིས་འབད་པ་བྱ་མི་དགོས།   གལ་སྲིད་ཁས་མ་བླངས་ཀྱང་།   མཐོང་བ་དང་ཐོས་པ་དང་།   མྱོང་བ་ཁོ་རང་གི་མངོན་སུམ་དུ་འགྱུར་བ་དེ་ལ།   རིགས་པས་དགག་སྒྲུབ་ཀྱི་དོན་མི་དགོས།   ཀུན་རྫོབ་ཁས་མ་བླངས་པས་ཆད་ལྟར་ལྷུང་བའི་ཉེར་ཡོད་ན་མིག་དང་རྣ་བའི་སྣང་བ་དེ་ག་ཡོད་མེད་ཀྱི་དགག་སྒྲུབ་བྱ་བར་ཟད་མོད།   བྱ་མི་དགོས་ཏེ།   ཁ་ནས་ཐམས་ཅད་མེད་ཅེས་ཚིག་ཙམ་སྨྲས་ཀྱང་།   སེམས་ཀྱི་འཛིན་ཚུལ་ལ་ཅི་ཡང་མི་གནོད་པས་དེ་ཙམ་ལ་དགག་སྒྲུབ་དོ་གལ་ཆེན་པོ་དེ་ཙམ་དགོས་པའི་རྒྱུ་མཚན་མི་སྣང་ཞེས་གསུངས་སོ།།   

 .སྟོང་ཉིད་མེད་དགག་དང་མ་ཡིན་དགག་ལས་གང་ཞིག་ངོས་འཇིན་མཛད་པའི་ཐད།   བོད་སྔ་རབས་པས་དབུ་མའི་ལྟ་བ་མཐར་ཐུག་པ་སྟེ།   གནས་ལུགས་འཐར་ཐུག་དོན་དམ་པ་ཉིད་གཉིས་སྣང་འཁོར་བའི་ཆོས་ཀྱི་སྟོང་པས་སྟོང་ཉིད་མ་ཡིན་དགག་ཏུ་སྨྲ་ལ།   རྗེ་ཙོང་ཁ་པ་ནས་ཀྱང་ལེགས་བཤད་གསེར་འཕྲེང་དུ་སྟོང་ཉིད་མ་ཡིན་དགག་ཏུ་བརྗོད་ཅིང་།   ཕྱིས་སུ་ལྟ་བ་མཐར་ཐུག་པ་དགག་བྱ་བདེན་གྲུབ་བཅད་པའི་སྟོང་ཉིད་མེད་དགག་ཏུ་འདོད་དགོས་ཞེས་ཕྱི་རྩོམ་ལམ་རིམ་ཆུང་བ་སོགས་སུ་རང་ལུགས་འཐད་ལྡན་དུ་བསྒྲུབས་ཡོད།   ཀུན་མཁྱེན་རོང་ཟོམ་ཆོས་བཟང་ལས་བརྒྱུད་པའི་འཇུ་མི་ཕམ་སོགས་སྔ་འགྱུར་རྙིང་མའི་ལུགས་འཛིན་རྣམས་ཀྱིས།   ཟུང་འཇུག་ཡེ་ཤེས་ཆེན་པོའི་ངོར་མེད་དགག་ཅེས་བྱ་བ་དགག་བྱ་བདེན་གྲུབ་ལ་སོགས་པ་བཀག་ཤུལ་གྱི་མེད་རྐྱང་ངམ་སྟོང་རྐྱང་དང་།   མ་ཡིན་དགག་ཅེས་དགག་བྱ་བཀག་ཤུལ་དུ་ཆོས་ཉིད་ལ་སོགས་པ་ཆོས་ཅི་ཞིག་འཕེལ་ཏེ།   དེ་གཉིས་ཀ་བློ་ཡིས་གཞན་སེལ་བའི་སྒོ་ནས་བརྟགས་པ་ཙམ་ལས་རང་གི་ངོ་བོས་མ་གྲུབ་པའི་ཕྱིར་ན་གཤིས་ལུགས་མཐར་ཐུག་པའི་དོན་ལ་ཁས་ལེན་ཐམས་ཅད་དང་བྲལ་བས་མེད་དགག་དང་མ་ཡིན་དགག་གཉིས་ཀར་ཁས་མི་ལེན་ཏེ།   གནས་ལུགས་མཐར་ཐུག་པ་ནི་དགག་པ་སྟེ་མེད་དགག་དང་སྒྲུབ་པ་སྟེ་མ་ཡིན་དགག་ལ་སོགས་པའི་གཉིས་ཆོས་ཐམས་ཅད་དང་བྲལ་བ་ཡི་བློ་འདས་སྨྲ་བསམ་བརྗོད་མེད་སོ་སོ་རང་རིག་པའི་ཡེ་ཤེས་ཀྱི་སྤྱོད་ཡུལ་གདོད་མའི་ཆོས་ཉིད་ཡོད་པའི་ཕྱིར་རོ།   དེ་ལྟ་ནའང་གནས་སྐབས་ཆོས་ཐམས་ཅད་ཀྱི་ངོ་བོ་སྟོང་པ་ཉིད་གཏན་ལ་འབེབས་ཚུལ་ཁོ་ནར་བསམ་ནས་ནི་མེད་དགག་དང་མ་ཡིན་དགག་གང་ཡིན་ཞེས་དྲི་ན་མེད་དགག་ཉིད་ཡིན་ཞེས་ཁས་ལེན་པར་བྱའོ་ཞེས་འཇུ་མི་ཕམ་པས་ངེས་ཤེས་སྒྲོན་མེར་གསལ་པོར་གསུང་ཡོད།   རྗེ་ཙོང་ཁ་པ་ནས་སྟོང་ཉིད་མ་ཡིན་དགག་ཏུ་འདོད་པ་ནི་དངོས་སྨྲ་བའི་ལྟ་བ་གཏན་ལ་འབེབས་ཚུལ་ཡིན་པར་གོ་ནས།   རང་ལུགས་ལ་མེད་དགག་གི་སྟོང་ཉིད་དང་རྟེན་འབྱུང་འགལ་མེད་དུ་གོ་བའི་རྣམ་གཞག་མཛད་མོད།   ཕྱིས་བྱོན་རྗེ་རིན་པོ་ཆེའི་སློབ་བརྒྱུད་དག་གིས།   ཀུན་རྗོབ་རྣམས་རང་གི་ངོ་བོས་མི་སྟོང་པར་དགག་བྱ་ཡན་གར་བ་བདེན་གྲུབ་ཀྱིས་སྟོང་པར་བཞེད་པ་ནི་སྟོང་ཉིད་མ་ཡིན་དགག་ཏུ་སོང་འདུག་ཅེས་འཇུ་མི་ཕམ་གྱི་རབ་གསལ་བརྒལ་ལན་དང་དགེ་ཆོས་ཀྱི་ཀླུ་དགོངས་སུ་ཡང་ཡང་བརྗོད་ཡོད།   དགེ་ཆོས་རང་ནས་ཚུལ་འདིའི་ཐད་ལ་གསང་སྔགས་རྙིང་མ་བའི་བཞེད་ཚུལ་འཐད་ཕྱོགས་སུ་དམིགས་ཏེ།   རྣམ་རྟོག་གི་བུ་ག་ཆུང་ངུ་འདིར་རྣམ་པ་ཐམས་ཅད་མཁྱེད་པའི་ཡེ་ཤེས་ཀྱི་གཟིགས་པའི་མཐའ་དང་བྲལ་བའི་ཆོས་དབྱིངས་ནམ་མཁའ་ཆེན་པོ་དེ་མེད་དགག་དང་མ་ཡིན་དགག་སོགས་ཀྱི་གཟུགས་སུ་བཀོད་པ་ག་ལ་ནུས་ཞེས་བརྗོད་དེ་སྔ་ཕྱི་ལུགས་གང་དུ་འདོད་ནའང་རིགས་པའི་གནོད་བྱ་མང་པོ་ཡོད་པར་གཟིགས་སོ།།  

  དེ་ལྟར་དགག་བྱ་ལ་དོན་དམ་གྱི་ཁྱད་པར་སྦྱར་མ་སྦྱར་དང་དེའི་དབང་གིས་ཐ་སྙད་དུ་རང་མཚན་གྱིས་གྲུབ་པ་སོགས་ཞལ་གྱིས་བཞེས་སོགས་སྔོན་བྱོན་མཁས་པ་ཆེན་པོའི་བར་དགོས་དབང་གིས་ཕན་ཚུན་རིགས་པའི་བརྒལ་བརྟག་བྱས་པའི་གནད་རྣམས་ཡིག་ཚོགས་ཀྱི་ངལ་བ་མ་འཛེམ་པར་སྐབས་སྐབས་སུ་ལུགས་འདིའི་བཞེད་ཚུལ་འདི་དང་ལུགས་འདིའི་བཞེད་ཚུལ་གན་ཞེས་བརྗོད་ནས་དགེ་ཆོས་ཀྱིས་ཀླུ་དགོངས་སུ་རྩལ་དུ་བཏོན་ནས་བརྗོད་པའི་དཀའ་གནད་རྣམས་ཀྱི་གཞི་གང་ཡིན་པ་གསལ་བཤད་བྱས་པ་ཡིན་གྱི།   ལྟ་གྲུབ་སྣ་ཚོགས་ཀྱི་ཤན་ནི་ཁོ་བོ་ལྟ་བུ་བློ་ཆུང་རྣམས་ལྟ་ཅི།   གཞུང་བརྒྱ་སྨྲ་བའི་མཁས་གྲུབ་ཆེན་པོ་དག་གིས་ཀྱང་རང་བཞེད་གཙང་མར་འཛིན་པ་ཙམ་ལས་ཡིན་མིན་གྱི་སྒྲོས་ཐག་བཅད་ཐུབ་ཡོད་པ་ནི་སྲིད་མཐའ་ཙམ་མོ།།   

.ཐ་སྙད་དུ་ཡོད་པས་ཡོད་གོ་ཆོད་མིན་སོགས་ཀྱི་ཐད།   དེ་ཡང་བདེན་གཉིས་ཀྱི་རྣམ་གཞག་མཛད་སྐབས།   སྔ་རབས་པ་ཕལ་གྱིས་ཐ་སྙད་དུ་ཡོད་པས་ཡོད་གོ་མི་ཆོད་ལ།   དོན་དམ་པར་མེད་པས་མེད་གོ་ཆོད་ཟེར་བ་དང་།   ཕྱི་རབས་ཕལ་གྱིས་ཀུན་རྫོབ་ཏུ་ཡོད་པས་ཡོད་གོ་ཆོད་ལ།   དོན་དམ་པར་མེད་པས་མེད་གོ་མི་ཆོད་ཅེས་བརྗོད།   འཇུ་མི་ཕམ་སོགས་སྔ་འགྱུར་རྙིང་མའི་ལུགས་འཛིན་རྣམས་ཀྱིས་གོང་བཞེད་ཕྱོགས་གཉིས་ཀའི་བཞེད་ཚུལ་ལས་ཅུང་གསལ་ཁ་ཐོན་པའི་ཚུལ་གྱིས།   ཐ་སྙད་དུ་ཡོད་པས་ཐ་སྙད་དུ་ཡོད་པའི་གོ་ཆོད་ལ།   དོན་དམ་པར་ཡོད་པའི་གོ་མི་ཆོད་པ་དང་།   དོན་དམ་པར་མེད་པས་དོན་དམ་པར་མེད་པའི་གོ་ཆོད་ལ།   ཐ་སྙད་དུ་མེད་པའི་གོ་མི་ཆོད་ཅེས་ཟེར་ར།།    སྔ་རབས་པས་གནས་སྣང་གཉིས་ལས་གནས་ཕྱོགས་གཙོ་ཆེར་མཛད་པའི་དབང་གིས།   གཟུགས་ནས་རྣམ་མཁྱེན་བར་གྱི་ཆོས་ཐམས་ཅད་བློས་ཕར་བཏགས་པ་ཙམ་ལས་རང་བཞིན་གྱིས་གྲུབ་པ་རྡུལ་ཙམ་མེད་པས་ན།   ཐ་སྙད་དུ་ཡོད་པ་སྣང་རུང་རང་བཞིན་གྱིས་གྲུབ་པ་དབེན་པས་ཡོད་གོ་མི་ཆོད་པ་དང་།   ཆོས་ཀུན་དོན་དམ་དུ་ཡོད་མེད་སོགས་མཐའ་བཞི་ལས་འདས་པའམ་ཡང་ན་སྤྲོས་པའི་མཐའ་བརྒྱད་དང་བྲལ་བས་ན་མེད་པའི་གོ་ཆོད་པར་གསུངས་ལ།   ཕྱི་རབས་པས།   སྤྱིར་སྣང་སྟོང་གཉིས་ལ་ཉེ་རིང་བྱེད་མི་ཉན་ཅིང་།   སྣང་བའི་ཆོས་ཀུན་འཇིག་རྟེན་ན་གཏན་མེད་དུ་བཞེད་པ་ཤིན་ཏུ་ཉུང་ལ།   ཡོད་པའི་ཆོས་འདི་དག་ཡོད་ཀྱང་ཡོད་ལ་བདེན་པའང་ཡིན་པར་འདོད་པའི་གང་ཟག་ནི་ཤིན་ཏུ་མང་ཕྱིར།   མེད་པ་ཆད་མཐའ་ལྷུང་བ་ལས་ཡོད་པ་རྟག་མཐའ་ལྷུང་བ་མང་བས།   གདུལ་བྱའི་བློ་ཁ་བཀྲིད་པའི་ཆེད་དུ་སྣང་ཕྱོགས་ལ་གཙིགས་སུ་བྱེད་དེ་ཡང་ཡང་དཔྱད་པ་བྱེད་པའི་ཆ་ནས།   ཀུན་རྫོབ་ཏུ་ཡོད་པ་ཡོད་གོ་ཆོད་དེ།   ཀུན་རྫོབ་ཐ་སྙད་གཏན་མེད་དུ་འདོད་ན་ཆད་མཐར་ལྷུང་བའི་ཕྱིར་དང་།   ཀུན་རྫོབ་ཏུ་ཡོད་ན་ཡོད་ན་པས་ཁྱབ་པའི་ཕྱིར་རོ།།    དོན་དམ་དུ་མེད་པའི་མེད་གོ་མི་ཆོད་དེ།   དོན་དམ་དུ་མེད་ན་མེད་པས་མ་ཁྱབ་པའི་ཕྱིར་ཏེ།   རང་བཞིན་གྱིས་གྲུབ་པ་རྡུལ་ཙམ་མེད་རུང་སྣང་བ་རྟེན་འབྱུང་དུ་ཡོད་ཕྱིར་མེད་གོ་མི་ཆོད་ཅེས་བརྗོད།   རྗེ་བཙུན་ཤེས་རབ་རྒྱ་མཚོས་ཚུལ་འདི་ཀོ་དགག་ལན་མི་འཇིགས་སེང་གེའི་ང་རོ་རུ།   དེའི་རྒྱུ་མཚན་གྱིས་དོན་དམ་པར་མེད་པས་གོ་མི་ཆོད།   ཐ་སྙད་དུ་ཡོད་པས་གོ་ཆོད་བྱས་པ་ཡིན།   དེ་ཡང་འཐད་དེ།   དོན་དམ་དཔྱོད་པས་བདེན་པ་གྲུབ་མ་གྲུབ་དཔྱད་པ་ཡིན་ཕྱིར།   དེས་མ་རྙེད་པ་བདེན་གྲུབ་མ་རྙེད་པ་དང་རྙེད་པ་བདེན་མེད་རྙེད་པའི་ཕྱིར་ལ།   བདེན་པར་མེད་པས་མེད་གོ་མི་ཆོད་མི་ཕྱིར་ཏེ།   བདེན་པར་མེད་ན་མེད་པས་མ་ཁྱབ་པའི་ཕྱིར་ཞེས་དང་།   ཀུན་རྫོབ་དཔྱོད་པས་ཐ་སྙད་དུ་ཡོད་མེད་དཔྱད་པ་ཡིན་པས་དེས་མ་རྙེད་པ་ཐ་སྙད་དུ་མེད་པས་རྙེད་པ་དང་རྙེད་པ་ཐ་སྙད་དུ་ཡོད་པ་རྙེད་པ་ཡིན་པའི་ཕྱིར་ལ།   ཐ་སྙད་དུ་ཡོད་པས་ཡོད་གོ་ཆོད་པའི་ཕྱིར་ཏེ།   ཐ་སྙད་དུ་ཡོད་ན་ཡོད་པས་ཁྱབ་པའི་ཕྱིར་ཞེས་ཕྲ་ཞིབ་ཆུ་ཐུབ་ཀྱི་རིགས་པས་དཔྱད་པར་བྱས་སོ།།   

 དགེ་འདུན་ཆོས་འཕེལ་ནས་ཕྱི་རབས་ལུགས་ཀྱིས་གཟུགས་སོགས་དོན་དམ་པར་མེད་ཀྱང་མེད་པ་མ་ཡིན།   ཡང་ན་དོན་དམ་པར་ཡོད་པའམ་བདེན་པར་ཡོད་པ་རིགས་པས་འགོག་རིགས་ཀྱང་།   ཡོད་པ་ཙམ་འགོག་མི་རིགས་ཞེས་ཁྱད་པར་འབྱེད་པ་སྟེ།   དགག་བྱ་ལ་དོན་དམ་གྱི་ཁྱད་པར་སྦྱར་བ་ལ་ཐུགས་སུ་མ་སོང་བས་ན་དོགས་སློང་འདི་ལྟར་བྱས་ཡོད་དེ།   དོན་དམ་པར་མེད་པས་མེད་གོ་མི་ཆོད།   ཀུན་རྫོབ་ཏུ་ཡོད་པས་ཡོད་གོ་ཆོད་བྱ་བ་འདི་དོན་ལ་འཕགས་པའི་ཡེ་ཤེས་ཀྱིས་མི་རྙེད་པས།   མེ་རྙེད་པའི་གོ་མ་ཆོད།   སོ་སྐྱེའི་རྣམ་རྟོག་གིས་རྙེད་པས་རྙེད་གོ་ཆོད་བྱ་བ་ཡིན་འདུག་ལ།   རང་བཞིན་གྱིས་གྲུབ་པ་དོན་དམ་པར་མེད་རི་བོང་རྭ་དོན་དམ་པ་མེད་སོགས།   སྟོང་གཞི་ཆོས་ཅན་གཏན་ནས་མི་སྲིད་པའི་རིགས་འདི་འདྲ་མ་གཏོགས་ནམ་ཡང་དོན་དམ་དུ་མེད་པས་མེད་གོ་ཆོད་པ་རྙེད་ན།   མེད་གོ་མི་ཆོད་པ་ཙམ་དུ་མ་ཟད་ཀྱིས་ཡོད་གོ་ཆོད་པར་འདུགཅེས་དོན་དམ་པར་མེད་པས་མེད་གོ་མི་ཆོད།   ཡོད་གོ་ཆོད་པར་གྱུར་བའི་ཚུལ་དེ།   རི་བོང་གི་རྭ་དོན་དམ་པར་མེད་ཅེས་དགག་བྱ་ལ་ཁྱད་པར་སྦྱར་ཚེ།   ཀུན་རྫོབ་ཏུ་ཡོད་པ་ཤུགས་ལ་གོ་ཞིང་།   གཞན་དུ་ན་རི་བོང་རྭ་དོན་དམ་པར་མེད་ཅེས་པ་དང་རི་བོང་རྭ་མེད་ཅེས་པ་གཉིས་ལ་ཚིག་གི་ནུས་པའི་ཁྱད་པར་ཅི་ཡོད་ཅེས་དྲི་བའི་ཚལ་གྱིས་སྐྱོན་བསྟན་ཡོད།   རང་ལུགས་ནི་དགག་བྱ་ལ་དོན་དང་བདེན་གྲུབ་སོགས་ཀྱི་ཁྱད་པར་སྦྱར་མི་དགོས་པ་སྟེ།   ཚུལ་དེ་ནི་ལྕང་སྐྱ་རིན་པོ་ཆེས་གསུང་པ་ལྟར།   སྣང་བ་ལིང་ལིང་འདི་རང་སོར་བཞག་ནས།   དགག་རྒྱུ་རྭ་ཅན་ཞིག་འཚོལ་འདུག་སྟེ།   ཞེས་གསུངས་པའི་ཚུལ་ལས་མ་འདས་པར་དགོངས་སོ།།   

    ༤.ཡོད་མིན་མེད་མིན་ཐད།   རྗེ་བཙུན་ཤེས་རབ་རྒྱ་མཚོས་དགག་ཡིག་མི་འཇིགས་སེང་གེའི་ང་རོ་རུ།   རིགས་པས་བདེན་གྲུབ་འགོག་གི་བུམ་པ་མིན།།    ཚད་མས་བུམ་པ་འཇོག་གི་བདེན་གྲུབ་མིན།   ཐོ་བས་སྦྲང་འཇོམས་ཕ་ཡི་མགོ་མིན་པས།   ཡོད་མིན་མེད་མིན་མིང་གིས་ཅི་ཞིག་བགྱིད།།    ཅེས་དང་།   ཡོད་པའི་རྩ་བ་བདེན་གྲུབ་ཡིན་ན་མེད།།    མེད་པའི་རྩེ་མོ་ཀུན་རྗོབ་ཡིན་ན་ཡོད།།    འདིས་ཀྱང་ཡོད་མེད་གཙང་མར་ཐག་ཆོད་པས།།    ཡོད་མིན་མེད་མཆིལ་མ་བཞིན་དུ་བོར།།    བདེན་པའི་ས་བོན་རྫུན་པར་ཤེས་པ་མེད།   རྫུན་པ་མྱོང་ཚེ་བདེན་སྣང་དེ་ག་རང་།།    འདི་ཡང་ཐ་སྙད་ཚད་གྲུབ་མེད་པ་དང་།།    ཡོད་མིན་མེད་མིན་འཇོམས་པའི་སྟ་རེ་ཡིན།།    ཞེས་གསུངས་པ་ལས་བྱུང་བའི་ཡོད་མིན་མེད་མིན་གྱི་སྐོར་འདིའང་སྔ་ཕྱི་མཁས་པའི་བཞེད་ཚུལ་ཅུང་མི་འདྲ་སྟེ།   གཞུང་ལས།   ཡོད་མིན་མེད་མིན་ཡོད་མེད་གཉིས།།    གཉིས་ཀའི་བདག་ཉིད་མེད་པའང་མིན།།    ཞེས་པ་ལ་བོད་སྔ་རབས་པས།   བློས་མཐའ་བཞི་གང་དུ་ཡང་མི་འཛིན་པའི་དོན་ཅན་ཏེ།   ཆོས་ཉིད་སྤྲོས་པའི་མཐའ་བརྒྱད་དང་བྲལ་བ་ནི་མཐར་ཐུག་གི་དོན་དུ་འགྲེལ་ལ།   ཕྱི་རབས་པས།   ཡོད་མིན་མེད་མིན་ཞེས་པའི་དོན་ནི་དོན་དམ་དུ་ཡོད་པ་མ་ཡིན།   ཀུན་རྫོབ་ཏུ་མེད་པ་ཡང་མ་ཡིན།   བློས་ཀྱང་དེ་ལྟར་འཛིན་དུ་མི་རུང་ཞེས་པ་ལས་ཡོད་མིན་མེད་མིན་སྒྲ་ཇི་བཞིན་ཁས་ལེན་དུ་མི་རུང་བར་བཞེད་ལ།   སྔ་རབས་པའི་བཞེད་ཚུལ་ཀྱང་ཧྭ་ཤང་མ་ཧྭ་ཡ་ནའི་ལྟ་བ་དང་མཚུངས་ཞེས་དགག་པར་མཛད།   ཕྱི་རབས་ལུགས་ཀྱིས་ངོས་འཛིན་དེ་ལྟར་བྱེད་པའི་རྩ་བའང་གོང་དུ་ཡང་ཡང་ཞུས་པ་ལྟར།   བདེན་གཉིས་སམ་སྣང་སྟོང་གཉིས་ལ་སྤྱིར་ཉེ་རིང་བྱེད་མི་ཉན་པ་སྟེ་འགལ་མེད་ཟུང་འཇུག་ཡིན་རུང་གདུལ་བྱའི་བློ་དང་བསྟུན་ཕྱིར།   སྣང་བ་གཙིགས་སུ་བྱེད་དགོས་པའི་རྐྱེན་གྱིས་ཀུན་རྫོབ་ཀྱི་རྣམ་གཞག་ཐམས་ཅད་འཐད་པར་འཇོག་དགོས་པ་ལས།   སྔ་རབས་པའི་ལུགས་ལྟར་ཀུན་རྫོབ་ཀྱང་རང་ངོ་དང་གཞན་ངོའི་ཁྱད་པར་ཅན་དུ་ཕྱེས་ནས་གཞན་ངོ་ལས་རང་ངོ་ཁས་མ་བླངས་ན་ཆད་མཐའ་ལྷུང་བར་དོགས་པ་མཛད་དོ།   དགེ་འདུན་ཆོས་འཕེལ་ནས་ཚུལ་ལུགས་འདི་ཡང་བོད་སྔ་རབས་པའི་བཞེད་ཚུལ་མཐད་ལྡན་དུ་དགོངས་ནས་ཕྱི་རབས་ཀྱི་བཞེད་པར་འདི་ལྟར་ཟུར་ཟ་བྱས་ཡོད་དེ།   ཡོད་དམ་མེད་པའི་ཕྱོགས་འཇིག་པ་ཞེས།   བཅོམ་ལྡན་འདས་ཀྱིས་ལུང་དུ་བསྟན་པའི་ཀླུ་སྒྲུབ་ཀྱི་ལྟ་བ་དེ་ཡོད་པ་བདེན་པར་ཡོད་པ་དང་།   མེད་པ་དོན་དམ་པར་མེད་པར་བྱས་ནས་དོན་འཇིག་རྟེན་གྱི་ཡོད་པ་དང་མེད་པ་གཉིས་ཀྱི་ཁོངས་སུ་སླར་ཡང་འདུ་བ་བྱེད་པ་འདིས་ཀླུ་སྒྲུབ་ཀྱི་བསྟན་པའི་སྙིང་པོ་བཤིག་པ་ཡིན་ནམ་བཟུང་བ་ཡིན་པ་ཁོ་བོས་ཆ་མ་འཚལ་ཏོ།   ཞེས་དང་།   དེང་སང་གི་མཁས་པ་རྣམས་ཀྱིས།   ཡོད་པ་མིན།   མེད་མ་མིན་བྱ་མའི་ལུང་ཞིག་རྣ་བས་ཐོས་ཚེ།   ཐོག་མར་ལུང་དེ་གསུང་མཁན་སུ་ཡིན་རྩད་གཅོད་གཅོད་བྱེད།   གལ་ཏེ་ལུང་དེ་བོད་སྔ་མའི་མཁས་པ་ཞིག་གི་གསུང་འདུག་ན།   དེ་འདྲ་ཟེར་མཁན་དེ་ཆད་ལྟ་བ་བླུན་པོ་ཡོན་ཞེས་བརྙས་བཅོས་བྱེད།   གལ་ཏེ་ལུང་དེ་སངས་རྒྱས་དང་ཀླུ་སྒྲུབ་སོགས་ཀྱི་གསུང་ཡིན་པར་ངོས་ཟིན་ན།   ཡོད་པ་མིན་གསུངས་པ་བདེན་པར་ཡོད་པ་མིན་བྱ་བའི་དོན་ཡིན།   མེད་པ་མིན་བྱ་བ་ཀུན་རྫོབ་ཏུ་མེད་པ་མིན་བྱ་བའི་དོན་ཡིན་སོགས་ཚིག་གི་ལྷན་པ་སྣ་ཚོགས་བཏབ་ནས་རང་གི་ཞེ་འདོད་དང་འགྲིགས་པ་ཞིག་བྱེད་དེ།   དོན་ལ་སངས་རྒྱས་ལ་དགག་པ་བཏབ་ན་མི་ངན་ལྟ་ངན་གྱི་མིང་ཐོགས་པ་ལ་འཇིགས།   བོད་སྔ་མ་ལ་དགག་པ་བྱེད་ཐུབ་ན།   མཁས་པ་དཔའ་བོའི་མིང་ཐོགས་པའི་ཁྱད་པར་དེ་ཙམ་མ་གཏོགས།   ཡོད་མིན།   མེད་མིན།   བརྗོད་མིན།   སྤྲོས་བྲལ་སོགས་ཀྱི་ཐ་སྙད་ནི།   མདོ་དང་རིགས་ཚོགས་དང་།   བོད་སྔ་མའི་མཁས་པ་དག་གི་གསུང་རབ་ལ་མང་ཉུང་མི་འདུགདེས་ན་བོད་སྔ་མའི་མཁས་པ་རྣམས་ཀྱིས།   གནས་ལུགས་བརྗོད་དུ་མེད་པ།   བསམ་དུ་མེད་པ་སོགས་གསུངས་པ་ལ།   འགའ་ཞིག་གིས་ནི་བླུན་པོ་དང་།   ཆད་ལྟ་བ་ཞེས་དགག་པ་བྱེད།   འགའ་ཞིག་གིས་ཅུང་ཟད་གུས་པའི་ཚུལ་བྱས་ཏེ།   བོད་སྔ་མའི་མཁས་གྲུབ་ཁོང་ཚོའི་ཐུགས་ཀྱི་དགོངས་ཚུལ་ལ་ནི་མི་འགྲིག་པ་ཆེར་མེད་མོད་ཀྱི།   ཁ་ནས་བཤད་པའི་ཚེ་རྗེ་བླ་མ་ལྟ་བུའི་ཞིབ་ཆ་མ་ཐོན་པ་ཙམ་ཡིན་ཟེར།   དེ་བདེན་ན་བཅོམ་ལྡན་འདས་ཀྱིས་ཀྱང་ཐུགས་ཀྱི་དགོངས་ཚུལ་ལ་མི་འགྲིག་པ་མེད་མོད་ཀྱི།   ཞལ་ལས་གསུངས་པའི་ཚེ་ནི།   སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན།།    ཞེས་དང་།   ཡིན་པ་ལ་སྤྱོད་ན་མཚན་མ་ལ་སྤྱོད་དོ།   ཡོད་པ་མིན་པ་ལ་སྤྱོད་ན་མཚན་མ་ལ་སྤྱོད་དོ་སོགས་ཀྱི་ལྷན་པ་མཛེས་པོ་དེ་ཚོ་སྣང་མེད་དུབཞག་འདུག་པས།   སངས་རྒྱས་ཁོང་ཡང་ཆོས་སྟོན་ཚུལ་ལ་ཞིབ་ཆ་མེད་པ་ཞིག་འདུག།   དེས་ན་བོད་སྔ་མ་དང་།   སངས་རྒྱས་གཉིས་ཀ་འགོག་ན་ཡོང་མཉམ་དུ་ཁོག་ཅིགའཇོག་ན་ཡང་མཉམ་དུ་ཞོག་ཅིགམི་ཁ་སྡང་མི་སྡང་ལ་འཇིགས་ནས་ལྕེ་སྣ་ཚོགས་སུ་བསྒྱུར་ཏེ་མགོ་སྐོར་སྣ་ཚོགས་མི་གཏོང་བར་ཞུ།   ཞེས་བོད་སྔ་རབས་པའི་ལྟ་བའི་ཕྱོགས་སྐྱོར་དུ་ལངས་ཏེ།   ཕྱི་རབས་མཁས་པ་རེ་ཟུང་ནས་སྔ་རབས་པ་ལ་ཆད་ལྟ་བླུན་པོ་ཞེས་སྐྱོན་བརྗོད་མཛད་པ་ལ་གཟུར་གནས་ཀྱི་ལན་སྦྲོན་པའོ།།    

 དཔྱད་གཞིའི་ཡིག་ཆ།  

མཁས་དབང་དགེ་འདུན་ཆོས་འཕེལ་གྱི་གསུང་རྩོམ་ཕྱོགས་བསྒྲིགས་ཞེས་པ་སི་ཁྲོན་མི་རིགས་དཔེ་སྐྲུན་ཁང་གི་པར་མ།  

རྗེ་བཙུན་ཤེས་རབ་རྒྱ་མཚོ་འཇམ་དཔྱལ་དགྱེས་པའི་བློ་གྲོས་ཀྱི་གསུང་རྩོམ་པོད་གསུམ་ཅན།   མཚོ་སྔོན་མི་རིགས་དཔེ་སྐྲུན་ཁང་གི་པར་མ།  

 པཎ་ཆེན་ཤཱཀྱ་མཆོག་ལྡན་གྱི་གསུང་དབུ་མ་ལ་འཇུག་པ་རྩ་བ་དང་འགྲེལ་བ་བཞུགས་ཞེས་པ་སི་ཁྲོན་མི་རིགས་དཔེ་སྐྲུན་ཁང་གི་པར་མ།  

 སྟག་ཚང་ལོ་ཙཱ་བའི་གསུང་གྲུབ་མཐའ་ཀུན་ཤེས་ཀྱི་རྩ་འགྲེལ་ཞེས་པ་མི་རིགས་དཔེ་སྐྲུན་ཁང་གི་པར་མ།།   

 གོོ་རམས་པ་བསོད་ནམས་སེང་གེའི་གསུང་ལྟ་བའི་ཤན་འབྱེད་ཐེག་མཆོག་གནད་ཀྱི་ཟླ་ཟེར་ཞེས་བྱ་བ་ཤིང་པར་མ།  

གུང་ཐང་འཇམ་པའི་དབྱངས་བསྟན་པའི་སྒྲོན་མེའི་གསུང་འབུམ།   མི་རིགས་དཔེ་སྐྲུན་ཁང་གི་པར་མ།  

 འཇུ་མི་ཕམ་པའི་གསུང་ངེས་ཤེས་སྒྲོན་མེའི་རྩ་འགྲེལ་དང་སྤྱོད་འཇུག་ཤེར་འགྲེལ་དང་དབུ་མ་རྒྱན་གྱི་རྩ་འགྲེལ་ཞེས་པ་སི་ཁྲོན་མི་རིགས་དཔེ་སྐྲུན་ཁང་གི་པར་མ།  

 ཐུའུ་བཀྭན་ཆོས་ཀྱི་ཉི་མའི་གྲུབ་མཐའ་ཞེས་པ་མི་རིགས་དཔེ་སྐྲུན་ཁང་གི་པར་མ།  

བོད་པ་སྤྲུལ་སྐུའི་གསུང་ལྟ་གྲུབ་ཤན་འབྱེད་གནད་ཀྱི་སྒྲོན་མེ་ཞེས་བྱ་བ་སི་ཁྲོན་མི་རིགས་དཔེ་སྐྲུན་ཁང་གི་པར་མ།  

ཚུལ་ཁྲིམས་རྒྱ་མཚོའི་གསུང་ཚད་མའི་དཀའ་གནད་གསལ་བར་བྱེད་པའི་དུས་ཀྱི་མེ་ལོང་ཞེས་བྱ་བ་མི་རིགས་དཔེ་སྐྲུན་ཁང་གི་པར་མ།  

 ལོག་སྨྲའི་ཚང་ཚིང་སྲེག་པའི་ལུང་རིགས་རྡོ་རྗེའི་མེ་ལྕེ་ཞེས་བྱ་བ་ཀན་སུའུ་མི་རིགས་དཔེ་སྐྲུན་ཁང་གི་པར་མ།  

 དུས་རབས་ཉི་ཤུ་པའི་བོད་ཀྱི་ངོ་མཚར་བའི་རབ་བྱུང་ཞེས་བྱ་བ་ཀྲུང་གོའི་བོད་རིག་པ་དཔེ་སྐྲུན་ཁང་གི་རྒྱ་ཡིག་པར་མ།  

རྗེ་རིན་པོ་ཆེའི་རྟེན་འབྲེལ་བསྟོད་པ་མཚོ་སྔོན་མི་རིགས་དཔེ་སྐྲུན་ཁང་གི་པར་མ།  

བསྟོད་པ་དོན་ལྡན་མའི་རྩ་འགྲེལ་ཐེ་ཝན་པར་མ།  

 བོད་ལྗོངས་ཞིབ་འཇུག་གོ་བདུན་ལོའི་དེབ་གསུམ་པ་དང་གོ་བརྒྱད་ལོའི་དེབ་དང་པོ།  

 ལྟ་བ་བསམ་བློ་ལག་ལེན་ཞེས་བྱ་བ་ཀན་སུའུ་མི་རིགས་དཔེ་སྐྲུན་ཁང་གི་པར་མ།  

 ཉི་མ་རྒྱལ་མཚན་གྱི་རྩོམ་དགག་ལན་རྡོ་རྗེའི་མེ་ལྕེ་སོགས་ལ་ལན་དུ་སྤྲིངས་པ་རང་བྱུང་བདེན་པའི་གཏམ་གཡུལ་རྒྱལ་ལྷའི་རྔ་སྒྲ་ཞེས་བྱ་བ།

མཁས་དབང་དགེ་འདུན་ཆོས་འཕེལ་ལ་དཔྱད་པ་ཚངས་པའི་དྲང་ཐིག་ཅེས་བྱ་བ་སི་ཁྲིན་མི་རིགས་དཔེ་སྐྲུན་ཁང་གི་པར་མ།

མཁས་དབང་དགེ་འདུན་ཆོས་འཕེལ་གྱི་གསུང་རྩོམ་-བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་གི་པར་མ།

དཔའ་རིས་རབ་གསལ་གྱི་གསུང་འབུམ་ཀྲུང་གོའི་བོད་རིག་པ་དཔེ་སྐྲུན་ཁང་གི་པར་མ།

རྩོམ་སྒྲིག་འགན་ཁུར་བ།:ངག་དབང་།
རྩོམ་ཡིག་ཡོང་ཁུངས།:ཀྲུང་གོའི་བོད་རིག་པའི་དྲ་བ།